Header Ads

ສາລະວັນ ໃຊ້ງົບເກືອບ 20 ຕື້ກວ່າກີບ ກໍ່ສ້າງສະໝາມກິລາແຂວງ



ແຂວງສາລະວັນ ໃຊ້ງົບປະມານເກືອບ 20 ຕື້ກວ່າກີບ ໃສ່ໂຄງການປັບປຸງ-ກໍ່ສ້າງພື້ນຖານໂຄງລ່າງສະໜາມກິລາຂອງແຂວງ ເພື່ອກະກຽມຄວາມພ້ອມຮັບໃຊ້ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນ ເປັນເຈົ້າພາບໃນປີ 2020.
ມາໃນວັນທີ 16 ພະຈິກ 2017 ນີ້ຢູ່ສະໝາມກິລາແຂວງສາລະວັນ ໄດ້ມີພິທີວາງສີລາລຶກໂຄງການປັບປຸງກໍ່ສ້າງສະໝາມກິລາແຂວງ, ໂດຍການເຂົ້າຮ່ວມຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ທ່ານ ພູທົງ ຄຳມະນີວົງ ຮອງເຈົ້າແຂວງ ປະທານສະມາຄົມກິລາກາຍະກຳແຂວງ, ມີ ທ່ານ ຈືຈູກັງ ບໍລິສັດອິນທະສິດກໍ່ສ້າງເຄສະຖານຈຳກັດຜູ້ດຽວ, ມີບັນດາຄະນະປະຈຳພັກແຂວງ, ກຳມະການພັກແຂວງ, ພະແນກການອ້ອມຂ້າງ ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.





ທ່ານ ສີລີສັກ ຖະໜອມຮັກ ຫົວໜ້າພະແນກສຶກສາທິການ ແລະກິລາແຂວງ ທັງເປັນເຈົ້າຂອງໂຄງການດັ່ງກ່າວ ໄດ້ລາຍງານກ່ຽວກັບການເຄື່ອນໄຫວປະຕິບັດໂຄງການດັ່ງກ່າວໃຫ້ຮູ້ວ່າ: ໂຄງການປັບປຸງ, ກໍ່ສ້າງ ແລະສ້ອມແປງສະໜາມກິລາແຂວງ ເປັນໂຄງການໜຶ່ງທີ່ບັນຈຸເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ສົກປີ 2016-2020 ແລະໄດ້ສຳຫຼວດອອກແບບມາແຕ່ປີ 2016. ສຳລັບສະໜາມກິລາເປີດປິດ ມີມູນຄ່າ 19.451.289.287 ກີບ ແລະຈະປະຕິບັດໃນ 4 ໜ້າວຽກໃຫຍ່ຄື: ກໍ່ສ້າງອັດສະຈັນບ່ອນນັ່ງຊົມ, ກໍ່ສ້າງສະໜາມກິລາ(ເດີ່ນເຕະບານ), ກໍ່ສ້າງຮ່ອງແລ່ນອ້ອມສະໜາມ ແລະກໍ່ສ້າງຮ່ອງລະບາຍນໍ້າ ໂດຍແມ່ນບໍລິສັດອິນທະສິດກໍ່ສ້າງເຄຫາສະຖານຈຳກັດຜູ້ດຽວເປັນຜູ້ຮັບເໝົາກໍ່ສ້າງ ກຳນົດເວລາການກໍ່ສ້າງ 9 ເດືອນ ນັບແຕ່ມື້ວາງສີລາລຶກເປັນຕົ້ນໄປ ແລະຄາດວ່າຈະໃຫ້ສຳເລັດໃນປີ 2019.
ໃນຕອນທ້າຍພິທີ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ທ່ານ ຈືຈຸງກັງ ກໍ່ໄດ້ຮ່ວມຕັດແຖບຜ້າ, ວາງສີລາລືກ ແລະລັ່ນຄ້ອງ 9 ບາດ ເອົາເລີກເອົາໄຊ ພ້ອມດ້ວຍແຂກທຸກພາກສ່ວນເຂົ້າຮ່ວມເປັນສັກຂິພິຍານ.






ແຫລ່ງຂ່າວ: ສາລະວັນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.