Header Ads

ທ່ານຫົວໜ້າດ່ານສາກົນວັງເຕົ່າ ຊີ້ແຈງ ການເກັບເງິນຄ່າທຳນຽມຄົນເຂົ້າ-ອອກເມືອງ





ທ້າຍເດືອນຕຸລາ 2017 ຜ່ານມາ ນັກຂ່າວໜັງສືພິມຈຳປາໃໝ່ ໄດ້ຮັບອະນຸຍາດໃຫ້ສຳພາດທ່ານ ບຸນຍະເດດ ທອງສະຫວັນ ເລຂາຄະນະພັກຮາກຖານ ຫົວໜ້າດ່ານສາກົນວັງເຕົ່າ ເຖິງຜົນງານການຊີ້ ນຳໆໃນໄລຍະຜ່ານມາ ຊຶ່ງທ່ານໄດ້ໃຫ້ສຳພາດເຖິງຜົນງານການຊີ້ນຳ-ນຳພາຫຼາຍວຽກຄື: ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານຈັດເກັບລາຍຮັບ ແລະ ວຽງການນໍາພາ-ຊີ້ນໍາອົງການຈັດຕັ້ງມະຫາຊົນ. ພ້ອມນີ້ ທ່ານ ຍັງໄດ້ໃຫ້ຄວາມກະຈ່າງແຈ້ງຕໍ່ການເກັບເງິນຄ່າທຳນຽມຄົນເຂົ້າ - ອອກເມືອງ ຕື່ມອີກ.

ທ່ານ ບຸນຍະເດດ ທອງສະຫວັນ ໃຫ້ຮູ້ວ່າ: ໃນວຽກງານປ້ອງກັນຊາດ-ປ້ອງກັນຄວາມສະຫງົບ ຄະນະພັກໄດ້ເຫັນດີເປັນເອກະພາບກັນ ໃຫ້ແຕ່ລະໜ່ວຍພັກຜັດປ່ຽນກັນເປັນເຈົ້າພາບຈັດກອງປະຊຸມແລກປ່ຽນ ຖອດຖອນບົດຮຽນໃນແຕ່ລະເດືອນຕົ້ນຕໍແມ່ນແລກປ່ຽນຂໍ້ມູນຂ່າວສານສະພາບການເຄື່ອນໄຫວຂອງກຸ່ມຄົນບໍ່ດີ ທີ່ຫວັງກໍ່ຄວາມບໍ່ສະຫງົບ ລວມທັງພວກເຄື່ອນໄຫວຄ້າຂາຍເຖື່ອນ, ຄ້າຂາຍຢາເສບຕິດ, ສິ່ງຜິດກົດໝາຍ ແລະ ບັນຫາການເຂົ້າ-ອອກເມືອງທີ່ບໍ່ຖືກຕ້ອງຕາມລະບຽບກົດໝາຍ. ຈາກນັ້ນກໍ່ກໍານົດທິດທາງໃນການຕ້ານ, ສະກັດກັ້ນ ແລະ ແກ້ໄຂບັນຫາ ຈິ່ງສາມາດຮັກສາໄດ້ຄວາມສະຫງົບຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ບ້ານ ແລະ ກຸ່ມບ້ານໃນຂອບເຂດທີ່ຕົນຮັບຜິດຊອບ, ເຮັດໃຫ້ປາກົດການຫຍໍ້ທໍໍ້ຕ່າງໆຫຼຸດນ້ອຍຖອຍລົງເທື່ອລະກ້າວ.

ສໍາລັບວຽກງານການຈັດເກັບລາຍຮັບເຂົ້າງົບປະມານ ໃນປີ 2017 ຄະນະພັກໄດ້ເອົາໃຈໃສ່ນໍາພາ-ຊີ້ນໍາແຕ່ລະໜ່ວຍພັກ, ແຕ່ລະຂະແໜງການທີ່ກ່ຽວຂ້ອງໃຫ້ຕັ້ງໜ້າຈັດຕັ້ງປະຕິບັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ດ້ວຍຄວາມຫ້າວຫັນ, ຊື່ສັດ, ໂປ່ງໃສ ແລະ ມີຄວາມຮັບຜິດຊອບສູງ. ໃນນັ້ນ ວຽກງານພາສີປະຈໍາດ່ານ ແມ່ນໄດ້ເອົາໃຈໃສ່ກວດກາສິນຄ້ານໍາເຂົ້າ ແລະ ສິນຄ້າຍ່ອຍຈາກພາກສ່ວນບໍລິສັດ ຫຼື ບຸກຄົນທີ່ນໍາເຂົ້າ ຢ່າງລະອຽດ. ເວລາກວດກາພົບເຫັນບໍລິສັດ ຫຼື ບຸກຄົນນໍາເຂົ້າສິນຄ້າແບບຊຸກເຊື່ອງທີ່ລັກສະນະລັກລອບໜີພາສີ ເຈົ້າໜ້າທີ່ກໍ່ໄດ້ສ້າງບົດບັນທຶກ ພ້ອມປັບໃໝຕາມລະບຽບການທີ່ວາງໄວ້. ວຽກງານຊັບສິນ, ອາກອນ ແລະ ວຽກງານນໍາເຂົ້າອາຫານ ແລະ ຢາ, ວຽກງານກວດກາພາຫະນະເຂົ້າ-ອອກ, ວຽກງານກັກກັນພືດ-ສັດ ແລະ ວຽກງານກວດກາຄຸນນະພາບນໍ້າມັນ ກໍ່ໄດ້ປະຕິບັດຕາມລະບຽບການ, ກວດກາ ແລະ ຄຸ້ມຄອງທາງດ້ານວິຊາການຂອງແຕ່ລະໜ່ວຍງານ ເຊິ່ງແຕ່ເດືອນມັງກອນ ຫາເດືອນ ຕຸລາ 2017 ສາມາດຈັດເກັບລາຍຮັບເຂົ້າງົບປະມານໄດ້ 444 ຕື້ກ່ວາກີບ, ທຽບໃສ່ແຜນການປີ ປະຕິບັດໄດ້ 71,67%.

ສ່ວນວຽກງານນໍາພາ-ຊີ້ນໍາອົງການຈັດຕັ້ງມະຫາຊົນ ຄະນະພັກ-ຄະນະດ່ານ ໄດ້ຊີ້ນໍາໃຫ້ສຸມໃສ່ສະຫຼຸບກວດກາຕີລາຄາປະເມີນຜົນການເຄື່ອນໄຫວວຽກງານປະຈໍາປີເພື່ອກະກຽມໃຫ້ແກ່ການກວດກາປະເມີນຜົນສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານປະຈໍາປີ 2017. ຈາກນັ້ນກໍ່ເນັ້ນໃສ່ການອອກແຮງງານ, ການຮັກສາອະນາໄມໃນຂອບເຂດບໍລິເວນດ່ານໃຫ້ມີຄວາມເປັນລະບຽບ, ສະອາດຈົບງາມທັງເປັນການສ້າງຜົນງານຕ້ອນຮັບວັນສຳຄັນຕ່າງໆ.

ສະເພາະບັນຫາການເກັບຄ່າທໍານຽມຄົນເຂົ້າ-ອອກເມືອງ ຜ່ານດ່ານສາກົນວັງເຕົ່າ ທີ່ສັງຄົມໃຫ້ຄວາມສົນໃຈ ແລະ ສົ່ງຂ່າວວ່າ ເກັບແພງກ່ວາດ່ານອື່ນນັ້ນ, ທ່ານ ຫົວໜ້າດ່ານສາກົນວັງເຕົ່າຊີ້ແຈງວ່າ: ການເກັບຄ່າທໍານຽມ ຫຼື ຄ່າບໍລິການຄົນເຂົ້າ-ອອກເມືອງ ແມ່ນປະຕິບັດຕາມລັດຖະບັນຍັດຂອງປະທານປະເທດ ແຫ່ງ ສປປ ລາວ ສະບັບເລກທີ 003/ປປທ, ລົງວັນທີ 26 ທັນວາ 2012 ວ່າດ້ວຍຄ່າທໍານຽມ ແລະ ຄ່າບໍລິການ ແລະ ປະຕິບັດຕາມຂໍ້ຕົກລົງຂອງທ່ານເຈົ້າແຂວງໆຈໍາປາສັກ ສະບັບເລກທີ 1650/ຈຂ.ຈສ, ລົງວັນທີ 18 ພະຈິກ 2015 ວ່າດ້ວຍການຄຸ້ມຄອງ ແລະ ນໍາໃຊ້ເງິນຄ່າບໍລິການລ່ວງເວລາຂອງດ່ານສາກົນວັງເຕົ່າ.

ຖ້າເຂົ້າ-ອອກໃນໂມງລັດຖະການ ແຕ່ເວລາ 8-16 ໂມງ(ວັນຈັນ-ວັນສຸກ) ຜູ້ທີ່ໃຊ້ໜັງສືຜ່ານແດນ(ພັດສະປອດ) ແມ່ນບໍ່ໄດ້ເສຍ, ຜູ້ທີ່ໃຊ້ໜັງສືຜ່ານແດນ ແລະ ໃບຜ່ານແດນຊົ່ວຄາວ ຄ່າທໍານຽມ 10 ພັນກີບ/ຄົນ/ຄັ້ງ. ຖ້າເຂົ້າ-ອອກນອກໂມງລັດຖະການ 6-8 ໂມງ, 16-20 ໂມງ ລວມທັງວັນພັກທາງລັດຖະການ ວັນເສົາ ແລະ ວັນທິດ ຫຼື ວັນພັກອື່ນໆທາງລັດຖະການ ຫຼື ວັນພັກທົດແທນ, ຜູ້ທີ່ໃຊ້ໜັງສືຜ່ານແດນ(ພັດສະປອດ) ຄ່າທໍານຽມລ່ວງເວລາ 10 ພັນກີບ, ຜູ້ທີ່ໃຊ້ໜັງສືຜ່ານແດນ ຫຼື ປື້ມຜ່ານແດນຄ່າທໍານຽມ 10 ພັນກີບ ແລະ ຄ່າທໍານຽມລ່ວງເວລາ 10 ພັນກີບ ລວມເປັນ 20 ກີບ. ຈຸດບໍລິການຈ່າຍເງິນແມ່ນຫ້ອງເບີ 2.ຖ້າວ່າມີການເກັບຄ່າທໍານຽມຫຼາຍກ່ວານັ້ນ ແມ່ນບໍ່ຖືກຕ້ອງ ເຊິ່ງອາດຈະເປັນການສວຍໂອກາດຂອງເຈົ້າໜ້າທີ່ກ່ຽວຂ້ອງບາງສະຫາຍ ເຊິ່ງຄະນະພັກ-ຄະນະດ່ານພວກເຮົາກໍ່ໄດ້ເອົາໃຈໃສ່ຕິດຕາມກວດກາ ພ້ອມທັງນໍາພາ-ຊີ້ນໍາຢ່າງໃກ້ຊິດ ເພື່ອຈະປັບປຸງແກ້ໄຂໃຫ້ດີຂຶ້ນກ່ວາທີ່ຜ່ານມາ.

ພາບ ແລະ ຂ່າວ: ນສພ ຈໍາປາໃໝ່
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.