Header Ads

ຄະນະຜູ່ແທນວິທະຍຸກະຈາຍສຽງແຫ່ງຊາດຫວຽດນາມຢ້ຽມຢາມແຂວງຫຼວງພະບາງ




ຕອນແລງຂອງວັນທີ່ 18 ພະຈິກນີ້ ຄະນະຜູ່ແທນວິທະຍຸກະຈາຍສຽງແຫ່ງຊາດຫວຽດນາມ ນຳໂດຍທ່ານ ຫວຽນເທກິ ຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດຫວຽດນາມ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ ໃຫ້ກຽດຕ້ອນຮັບຄະນະຜູ້ແທນທ່ີສະໜາມບີນສາກົນຫຼວງພະບາງນຳໂດຍ ທ່ານ ໂພສີ ແກ້ວມະນີວົງ ຜູ້ອຳນວຍການໃຫຍ່ວິທິຍຸກະຈາຍສຽງແຫ່ງຊາດລາວພ້ອມດ້ວຍຄະນະ. ຈາກນັ້ນ ຄະນະຜູ້ແທນໄດ້ເຂົ້າພົບປະກັບ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ຢູ່ຫ້ອງຮັບແຂກຂອງໂຮງແຮມຈິດຈະເລີນ ໂອກາດນີ້ ທ່ານເຈົ້າແຂວງຫຼວງພະບາງ ໄດ້ສະແດງຄວາມຍີນດີຕ້ອນຮັບຢ່າງອົບອຸ່ນ ໃນການມາຢ້ຽມຢາມຂອງຄະນະຜູ້ແທນ ເພາະເປັນການເສີມສ້າງສາຍພົວພັນການຮ່ວມມືືລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ຈະເລີນງອກງາມຍີ່ງຂື້ນ ໂດຍສະເພາະແມ່ນການສະເຫຼີມສະຫຼອງປີສາມັກຄີ ລາວ-ຫວຽດນາມ, ຫວຽດນາມ-ລາວ ໃນປີ 2017 ນີ້ ໃຫ້ເປັນຂະບວນການຝົດຝື້ນ ແລະ ກວ້າງຂວາງ. 



ທ່ານ ຄຳຂັນ ຈັນທະວີສຸກ ກ່າວຕື່ມວ່າ ໃນໄລຍະຜ່ານມາລັດຖະບານ ກໍ່ຄືວິທະຍຸກະຈາຍສຽງແຫ່ງຊາດຫວຽດນາມ ໄດ້ໃຫ້ການຊ່ວຍເຫຼືອແຂວງຫຼວງພະບາງ ໃນການກໍ່ສ້າງສະຖານີຖ່າຍທອດ ວິທະຍຸ-ໂທລະພາບ ອັນເປັນພື້ນຖານອັນດີ ໃຫ້ແກ່ການພັດທະນາເສດຖະກິດ-ສັງຄົມຂອງແຂວງ ໂດຍສະເພາະແມ່ນການກະຈາຍຂໍ້ມູນຂ່າວສານ ອັນເປັນປະໂຫຍດຂອງພັກ-ລັດຖະບານແຫ່ງ ສປປ ລາວ ກໍ່ຄືຂອງອົງການປົກຄອງແຂວງຫຼວງພະບາງ ໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຢ່າງເລິກເຊີ່ງ ພ້ອມທັງນຳໄປຈັດຕັ້ງຜັນຂະຫຍາຍໃນຊີວິດຕົວຈີງຫຼາຍຂື້ນ ເຮັດໃຫ້ແຂວງຫຼວງພະບາງ ໄດ້ຮັບການພັດທະນາດ້ວຍບາດກ້າວທີ່ດີ. ທ່ານເຈົ້າແຂວງໄດ້ຖືໂອກາດນີ້ ຂໍການສະໜັບສະໜູນຈາກຄະນະນຳຂອງວິທະຍຸກະຈາຍສຽງແຫ່ງຊາດຫວຽດນາມ ຊ່ວຍໂຄສະນາປີທ່ອງທ່ຽວລາວ ປີ 2018 ໃຫ້ກ້ວາງຂວາງ ເພື່ອເປັນການດືງດູດເອົານັກທ່ອງທ່ຽວ ເຂົ້າມາທ່ອງທ່ຽວ ສປປ ລາວ ໂດຍສະເພາະມາທ່ອງທ່ຽວຫຼວງພະບາງ ໃຫ້ນັບມື້ນັບຫຼາຍຂື້ນ.

ຕອນທ້າຍ ທ່ານ ຫວຽນເທກິ ໄດ້ສະແດງຄວາມຂອບໃຈ ທີ່ທ່ານເຈົ້າແຂວງ ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງໄດ້ລາຍງານກ່ຽວກັບ ວຽກງານຂອງວິທະຍຸກະຈາຍສຽງແຫ່ງຊາດຫວຽດນາມໂດຍຫຍໍ້ ແລະ ຖືໂອກາດເຊີນທ່ານເຈົ້າແຂວງຫຼວງພະບາງ ເດີນທາງໄປຢ້ຽມຢາມ ວິທະຍຸກະຈາຍສຽງແຫ່ງຊາດຫວຽດນາມ ຕາມເວລາເໝາະສົມຕື່ມອີກ. ໂອກາດການມາຢ້ຽມຢາມແຂວງຫຼວງພະບາງຄັ້ງນີ້ ທ່ານເຈົ້າແຂວງຫຼວງພະບາງ ໄດ້ເປັນກຽດຈັດງານລ້ຽງຕ້ອນຮັບຄະນະຜູ້ແທນ ຢ່າງສົມກຽດ, ສ່ວນວັນທີ່ 19 ພະຈິກ ຄະນະຜູ່ແທນວິທະຍຸກະຈາຍສຽງແຫ່ງຊາດຫວຽດນາມ ໄດ້ເດີນທາງໄປຢ້ຽມຢາມສະຖານີຖ່າຍທອດ ລະບົບວິທະຍຸ-ໂທລະພາບ ທີ່ໄດ້ໃຫ້ການຊ່ວຍເຫຼືອ ເຊີ່ງຕັ້ງຢູ່ບ້ານຜານົມເມືອງຫຼວງພະບາງ, ຢ້ຽມຢາມ ສະຖານີວິທະຍຸກະຈາຍສຽງແຂວງຫຼວງພະບາງ ແລະ ທ່ຽວຊົມສະຖານທີ່ທ່ອງທ່ຽວທີ່ສຳຄັນຂອງເມືອງມໍລະດົກໂລກຫຼວງພະບາງ ຈາກນັ້ນໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ນະຄອນຫຼວງວຽງຈັນ ດ້ວຍຄວາມສະຫວັດດີພາບ ໃນຕອນແລງຂອງວັນດຽວກັນນີ້.


ໂດຍ: ອາພຸດເດດ ບຸບຜາ (ວິທະຍຸກະຈາຍສຽງແຫ່ງຊາດ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.