Header Ads

ປກສ ເມືອງປາກທາ ຈັບເຮໂຣອິນ 6 ເປົາ ແລະ ຢາບ້າ 90 ມັດ !!!


ວັນທີ 24 ພະຈິກ 2017, ເຈົ້າໜ້າທີ່ຕຳຫຼວດຈະລາຈອນ ປກສ ເມືອງປາກທາ ແຂວງບໍ່ແກ້ວ ໄດ້ຢຶດເຮໂຣອິນ ຈຳນວນ 6 ເປົ້າ ເທົ່າກັບ 60 ແທ່ງ, ສານປະສົມຂອງຢາໄອສ໌ ຈຳນວນ 5 ເປົາ ນໍ້າໜັກ 109 ກິໂລກຼາມ ແລະ ຢາບ້າ 90 ມັດ ເທົ່າກັບ 180.000 ເມັດ ຢູ່ຈຸດກວດກາເມືອງປາກທາ ພ້ອມກັກຕົວຜູ້ຖືກຫາ 2 ຄົນ ແລະ ລົດໃຫຍ່ 1 ຄັນ ໄປສອບສວນຂະຫຍາຍຜົນຫາທີ່ມາຂອງຢາເສບຕິດຈໍານວນດັ່ງກ່າວ.

ເຈົ້າໜ້າທີ່ວິຊາສະເພາະ ປກສ ແຂວງບໍ່ແກ້ວ ໃຫ້ຮູ້ວ່າ: ເບື່ອງຕົ້ນໃນວັນທີ 24 ພະຈິກ 2017 ເຈົ້າໜ້າທີ່ຕໍາຫຼວດຈະລະຈອນ ປກສ ເມືອງປາກທາ ໄດ້ກວດກາຍານພາຫະນະປົກກະຕິຢູ່ຈຸດກວດກາທາງເຂົ້າເມືອງ ໃນຄະນະນັ້ນພົບເຫັນລົດປຣາໂດສີປອນເງິນ ໝາຍເລກທະບຽນ ກຈ 2222 ບໍ່ແກ້ວ ຈຶ່ງສະກັດກວດກາລົດ ເຊິ່ງຜູ້ຂັບຂີ່ຊື່ ທ້າວ ຕຸ້ຍ ຫຼື ເຫີ່ມ ອາຍຸ 35 ປີ ຢູ່ບ້ານຂອນແກ້ວ ແລະ ທ້າວ ແສງທອງ ອາຍຸ 43 ປີ ຢູ່ບ້ານມ່ວງແກ້ວ ເມືອງຫ້ວຍຊາຍ ແຂວງບໍ່ແກ້ວ. ຈາກນັ້ນ, ປະມານ 10 ນາທີ ລົດແລັນຄຸຍເຊີສີຂາວ ໝາຍເລກທະບຽນ ກກ 9999 ບໍ່ແກ້ວ ຂັບຂີ່ໂດຍ ທ້າວ ຕຸ່ຍ ຫຼື ຊົມພູ ຂີ່ມາຕາມຫຼັງ ຈຶ່ງສະກັດກວດກາອີກ ເຊິ່ງພວກກ່ຽວແມ່ນເປັນໝູ່ກັນ ໄດ້ພ້ອມກັນເຈລະຈາກັບເຈົ້າໜ້າທີ່ຕໍາຫຼວດ ໂດຍບໍ່ຍອມໃຫ້ກວດລົດທັງສອງຄັນ.

ຈາກນັ້ນ, ພວກກ່ຽວກໍຂີ່ລົດແຫກດ່ານໜີໄປ ເຈົ້າໜ້າທີ່ຕໍາຫຼວດຈຶ່ງຕາມໄປ ປະມານ 20 ນາທີ ທ້າວ ຕຸ້ຍ ໄດ້ຂັບລົດຄັນດັ່ງກ່າວກັບມາຫາເຈົ້າໜ້າທີ່ ຈຶ່ງຖືກກັກຕົວ. ຈາກນັ້ນ, ເຈົ້າໜ້າທີ່ວິຊາສະເພາະ ທີ່ຕິດຕາມໄປນັ້ນ ພົບເຫັນ ທ້າວ ແສງທອງ ຫຼົບລີ້ຢູ່ແຄມປ່າ ເຂດໃກ້ຄຽງຈຸດກວດກາ. ເຈົ້າໜ້າທີ່ຈຶ່ງກວດກາເຂດດັ່ງກ່າວ ພົບຮ່ອງຮອຍລັກສະນະລາກສິ່ງຂອງໜັກ ຈຶ່ງນຳໄປພົບກະເປົ້າເປ້ລາຍທະຫານຢູ່ຕາມຮ່ອງແຄມທາງ ຫ່າງຈາກຖະໜົນປະມານ 10 ແມັດ. ເຊິ່ງໃນເປົາມີເຮໂຣອິນ 60 ແທ່ງ ໜັກ 23, ສານປະສົມຂອງຢາໄອສ໌ ຈຳນວນ 5 ເປົາ ໜັກ 109 ກິໂລກຼາມ ແລະ ຢາບ້າ 90 ມັດ ເທົ່າກັບ 180.000 ເມັດ ນໍ້າໜັກ 20,5 ກິໂລກຼາມ. ສ່ວນທ້າວ ຕຸ່ຍ ຫຼື ຊົມພູ ໄດ້ເອົາຕົວລົບໜີ.

ປັດຈຸບັນ, ເຈົ້າໜ້າທີ່ຕໍາຫຼວດກໍາລັງເລັ່ງສືບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການນໍາກັນ ແລະ ຫາທີ່ມາຂອງຢາເສບຕິດຈໍານວນດັ່ງກ່າວ ເພື່ອນໍາພັກພວກດຽວກັນມາດໍາເນີນຄະດີຕາມກົດໝາຍ.

ພາບແລະຂ່າວ: ໜັ່ງສືພິມຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.