Header Ads

ມ້າງກຸ່ມແກ້ງລັກລົດຈັກ ພ້ອມຂອງກາງ 10 ກວ່າຄັນ




ໃນວັນທີ 24 ພະຈິກ 2017, ເຈົ້າໜ້າທີ່ພະແນກຕໍາຫຼວດສືບສວນ-ສອບສວນ ປກສ ນວ ໄດ້ຖະແຫຼງການມ້າງກຸ່ມແກ້ງລັກລົດຈັກ ໄດ້ຜູ້ຖືກຫາ 3 ຄົນ ພ້ອມຂອງກາງລົດຈັກ ຈໍານວນ 14 ຄັນ.

ພັຕ ເກດສະໜາ ພິຈິດ ຮອງຫົວໜ້າພະແນກຕໍາຫຼວດສືບສວນ-ສອບສວນ ໃຫ້ຮູ້ວ່າ: ໃນວັນທີ 18 ສິງຫາ 2017 ຜ່ານມາ, ເຈົ້າໜ້າທີ່ໄດ້ກັກຕົວເປົ້າໝາຍລັກຊັບພົນລະເມືອງ ( ລັກລົດຈັກ ) ຈໍານວນ 2 ຄົນ ຊື່ທ້າວ ພານຸກອນ ຫຼື ນ້ອຍ ອາຍຸ 27 ປີ ແລະ ທ້າວ ອະນຸລັກ ຫຼື ຊຽງ ອາຍຸ 18 ປີ ທັງສອງຢູ່ບ້ານດອນຕິ້ວ ເມືອງໄຊທານີ ນະຄອນຫຼວງວຽງຈັນ ພ້ອມລົດຈັກ 1 ຄັນ ແລະ ອຸປະກອນທີ່ນໍາໃຊ້ກໍ່ເຫດລັກລົດ. ຈາກນັ້ນ, ເຈົ້າໜ້າທີ່ນໍາພວກກ່ຽວມາສອບສວນຂະຫຍາຍຜົນ ແລະ ສາລະພາບວ່າ: ໃນຕົ້ນເດືອນມິຖຸນາ ຫາ ເດືອນສິງຫາ 2017 ໄດ້ເຄື່ອນໄຫວລັກລົດຈັກຂອງພົນລະເມືອງໃນຂອບເຂດ ນະຄອນຫຼວງວຽງຈັນ ຈໍານວນ 15 ຄັນ. ໃນນີ້, ເມືອງໄຊເສດຖາ ຈໍານວນ 5 ຄັນ, ເມືອງໄຊທານີ 8 ຄັນ ແລະ ເມືອງຫາດຊາຍຟອງ ຈໍານວນ 2 ຄັນ. ຈາກນັ້ນ ທ້າວ ຊຽງ ຍັງໄດ້ຊັດທອດ ຫາ ທ້າວ ຕິ່ງສົງ ຫຼື ສົງ ອາຍຸ 25 ປີ ຢູ່ບ້ານດອນຕິ້ວ ເມືອງໄຊທານີ ທີ່ເຄີຍຮ່ວມລັກລົດຈັກຢູ່ເຂດເມືອງໄຊທານີ, ມາຮອດວັນທີ 29 ສິງຫາ 2017 ຈຶ່ງຕິດຕາມຈັບຕົວຜູ້ກ່ຽວໄດ້ ພ້ອມສາລະພາບໄດ້ຮ່ວມກັນລັກລົດຈັກແທ້. ພາຍຫຼັງໄດ້ລົດທີ່ລັກມາກໍນໍາໄປຂາຍໃຫ້ຜູ້ທີ່ມາພັກເຊົາຢູ່ບ້ານໄຊສະຫວ່າງ ເມືອງໄຊທານີ ຈໍານວນ 9 ຄັນ ແລະ ບ້ານດອນຕິ້ວ 2 ຄັນ, ໃນລາຄາຄັນລະ 1.500.000 ກີບ. ຈາກນັ້ນ, ເຈົ້າໜ້າທີ່ຈຶ່ງນໍາເກັບກູ້ລົດຄືນມາໄດ້ 14 ຄັນ, ສ່ວນທີ່ຍັງເຫຼືອຍັງສືບຕໍ່ ແລະ ໄດ້ມອບຄືນໃຫ້ເຈົ້າຂອງຈໍານວນໜຶ່ງ.



ພັຕ ເກດສະໜາ ພິຈິດ ໃຫ້ຮູ້ຕື່ມວ່າ: ໃນໄລຍະ 11 ເດືອນ ປີ 2017, ປກສ ນວ ໄດ້ຮັບແຈ້ງຄວາມລົດເສຍແຕ່ລະທິດບໍ່ຕໍ່າກວ່າ 5 ຫາ 10 ຄັນ, ບາງອາທິດສູງເຖິງ 15 ຫາ 20 ຄັນ, ເຊິ່ງສາເຫດຂອງລົດເສຍ ສ່ວນໜຶ່ງເກີດຈາກເຈົ້າຂອງຊັບເລີ່ນເລິ້ ເຊັ່ນ: ຢູ່ໃນເຮືອນບໍ່ມີຮົ້ວແໜ້ນໜາ, ຄອກລົດ, ປະໄວ້ໜ້າເຮືອນ, ໜ້າຫ້ອງ ( ຫ້ອງແຖວ ), ໄປຊື້ເຄື່ອງຢູ່ແຄມທາງ ແລະ ໄປຕະຫຼາດບໍ່ຝາກລົດ ແລະອື່ນໆ ເຮັດໃຫ້ເກີດມີຊ່ອງວ່າງ ແລະ ເປັນການສ້າງເງື່ອນໄຂໃຫ້ຄົນຮ້າຍລັກໄດ້ງ່າຍ. ສະນັ້ນ, ຈຶ່ງຮຽກຮ້ອງມາຍັງພໍ່-ແມ່ປະຊາຊົນທຸກຊັ້ນຄົນພ້ອມກັນເປັນເຈົ້າການ ແລະ ມີສະຕິໃນການຮັກສາລົດໃຫ້ມີຄວາມຮັບປະກັນ ເພື່ອຫຼີກລ່ຽງການສູນເສຍ.
ທີ່ມາ:ສນພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.