Header Ads

ຕ້ອງມີການປັບປຸງຫຼາຍດ້ານຖ້າຢາກໃຫ້ຕົວເລກນັກທ່ອງທ່ຽວບັນລຸ 5 ລ້ານຄົນໃນປີ 2018



ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເລັ່ງປັບປຸງສະຖານທີ່ທ່ອງທ່ຽວທີ່ມີການຊຸດໂຊມ ແລະສະຖານທີ່ທ່ອງທ່ຽວເກົ່າແກ່ຕິດພັນກັບປະຫວັດສາດ ທີ່ເປັນທ່າແຮງໃນການດຶງດູດນັກທ່ອງທ່ຽວຕ່າງປະເທດ ໃຫ້ໄດ້ຫຼາຍເຖິງ 5.2 ລ້ານຄົນໃນປີ 2018. ຂະນະທີ່ ນັກວິຊາການຊີ້ຕົວເລກດັ່ງກ່າວຍັງເປັນສີ່ງທ້າທາຍ ສິ່ງສຳ ຄັນຄວນປັບປຸງຂອດບໍລິການທີ່ຢູ່ຕາມດ່ານເຂົ້າ-ອອກ ຕ່າງໆໃຫ້ມີລັກສະນະວ່ອງໄວ, ສັ້ນກະທັດຮັດ ແລະ ຮັບປະກັນຄວາມປອດໄພ.

ທ່ານ ສຈ. ປອ. ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວໃນກອງປະຊຸມສະໄໝສາມັນເທື່ອທີ 4 ສະພາແຫ່ງຊາດ ຊຸດທີ VIII ວ່າ: ປີທ່ອງທ່ຽວລາວ 2018 ໄດ້ມີການ ວາງແຜນ ແລະ ປັບປຸງສະຖານທີ່ສໍາຄັນ, ວັດວາອາຮາມທີ່ເກົ່າແກ່ເພື່ອຕ້ອນຮັບນັກທ່ອງທ່ຽວທີ່ຈະເດີນທາງ ເຂົ້າມາ ສປປ ລາວ ເພີ່ມຂຶ້ນເກືອບເທົ່າຕົວ ຫຼື ປະມານ 5.2 ລ້ານຄົນ. ຈຳນວນນັກທ່ອງທ່ຽວທີ່ຄາດ ວ່າຈະເຂົ້າມາຫຼາຍແມ່ນນັກທ່ອງທ່ຽວທີ່ມາຈາກ ສປ ຈີນ, ສ.ເກົາຫຼີ, ຫວຽດນາມ, ໄທ ແລະ ຈາກທະວີບເອີຣົບ. ສຳລັບບ່ອນທີ່ນັກທ່ອງທ່ຽວຈະເດີນທາງໄປທ່ຽວຫຼາຍທີ່ສຸດແມ່ນແຂວງຫຼວງພະບາງ, ນະຄອນຫຼວງວຽງຈັນ, ເມືອງວັງວຽງ ແຂວງວຽງຈັນ, ແຂວງຈຳປາສັກ ແລະ ແຂວງຕ່າງໆ.
ສສຊ ຈາກແຂວງຄຳມ່ວນ ແລະ ສສຊ ແຂວງຈຳປາສັກ ສະເໜີວ່າ:​ ຕົວເລກນັກທ່ອງທ່ຽວທີ່ຈະເດີນທາງ ເຂົ້າມາລາວໃນປີ 2018 ເປັນຕົວເລກທີ່ຂ້ອນຂ້າງສູງພໍສົມຄວນ ເພາະປີ 2016-2017 ສະຖິຕິຕົວເລກນັກ ທ່ອງທ່ຽວຫຼຸດລົງເຫັນໄດ້ຢ່າງຈະແຈ້ງ. ເພື່ອໃຫ້ຕົວເລກທີ່ຕັ້ງໄວ້ບັນລຸເປົ້າໝາຍຄວນເປີດກວ້າງການໂຄສະນາ, ຂອດບໍລິການກໍ່ເຊັ່ນກັນ ເພາະເຫັນວ່າຍັງມີການເກັບບໍລິການຈາກນັກທ່ອງທ່ຽວຫຼາຍຂັ້ນຕອນຈົນເກີນໄປ ເຮັດໃຫ້ເສຍເວລາແລ້ວເປັນທີ່ບໍ່ພໍໃຈຂອງນັກທ່ອງທ່ຽວ ຊຶ່ງຂອດບໍລິການຖືເປັນເລື່ອງທີ່ສຳຄັນຄວນ ຈະມີການ ແກ້ໄຂຢ່າງໄວເພື່ອໃຫ້ນັກທ່ອງທ່ຽວທີ່ເດີນທາງຢາກກັບມາທ່ຽວທີ່ ສປປ ລາວ ອີກຄັ້ງ.
ທີ່ມາ: ຂ່າວເສດຖະກິດ-ການຄ້າ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.