Header Ads

ລັດຖະມົນຕີປະຈໍາສໍານັກງານນາຍົກລັດຖະມົນຕີລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດນິຕິກໍາລຸ່ມກົດໝາຍຢູ່ແຂວງໄຊຍະບູລີ

 
ແຂວງໄຊຍະບູລີ   : ທ່ານ ສາດສະດາຈານ ປອ ຈະເລີນ ເຢຍເປົາເຮີ ກໍາມະການສູນກາງພັກ, ລັດຖະມົນຕີ ປະຈໍາສໍານັກງານ ນາຍົກລັດຖະມົນຕີ, ພ້ອມຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດນິຕິກໍາລຸ່ມກົດໝາຍ ຢູ່ແຂວງ ໄຊຍະບູລີ, ໂດຍການຕ້ອນຮັບຂອງທ່ານ ເພັດພິໄຊ ສູນວິໄລ ກໍາມະການພັກແຂວງ, ຫົວໜ້າຫ້ອງວ່າການແຂວງ, ມີຄະນະກໍາມະການຈັດຕັ້ງປະຕິບັດລຸ່ມກົດໝາຍຂັ້ນແຂວງ, ມີພະນັກງານຫຼັກແຫຼ່ງພາຍໃນຫ້ອງວ່າການແຂວງ ໄຊຍະບູລີໃຫ້ການຕ້ອນຮັບຢ່າງອົບອຸ່ນ.



ໂອກາດດັ່ງກ່າວ ທີມງານຂອງ ລັດຖະມົນຕີ ປະຈໍາສໍານັກງານ ນາຍົກລັດຖະມົນຕີ ແມ່ນໄດ້ຮັບຟັງການລາຍງານກ່ຽວກັບສະພາບການການຈັດຕັ້ງປະຕິບັດນິຕິກໍາລຸ່ມກົດໝາຍ ຈາກ ທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງ, ເຊິ່ງທ່ານໄດ້ໃຫ້ຮູ້ວ່າ: ພາຍຫຼັງທີ່ໄດ້ຮັບບັນດາມະຕິ, ດໍາລັດ, ຄໍາສັ່ງ, ຂໍ້ຕົກລົງ ແລະ ແຈ້ງການຂອງຂັ້ນເທີງ, ແຂວງກໍ່ໄດ້ຮີບຮ້ອນຈັດຕັ້ງຜັນຂະຫຍາຍມາເປັນຂອງແຂວງ ແລະ ມອບໃຫ້ພະແນກການ, ຂະແໜງການທີ່ກ່ຽວຂ້ອງ ຈັດຕັ້ງປະຕິບັດຕົວຈິງເປັນຕົ້ນແມ່ນໄດ້ຄົ້ນຄົ້ວໃນການຈັດຕັ້ງຜັນຂະຫຍາຍບັນດານິຕິກໍາລຸ່ມກົດໝາຍ ໂດຍສົມທົບກັບພາກສ່ວນທີ່ກ່ຽວຂ້ອງລົງເກັບກໍາຂໍ້ມູນຕ່າງໆທີ່ຕິດພັນກັບການຊຸກຍູ້ບັນດານິຕິກໍາລຸ່ມກົດໝາຍ



ຜ່ານມາແຂວງແມ່ນໄດ້ຮັບເອກະສານຕ່າງໆຂອງນິຕິກໍາລຸ່ມກົດໝາຍໃນການຄົ້ນຄົ້ວຈັດຕັ້ງຜັນຂະຫຍາຍ, ຕິດຕາມ ແລະ ຊຸກຍູ້ວຽກງານຕ່າງໆທີ່ປິ່ນອ້ອມຢູ່ພາຍໃນແຂວງ, ໂດຍສະເພາະແມ່ນຄໍາສັ່ງຂອງທ່ານນາຍົກລັດຖະມົນຕີ ໄດ້ຈໍານວນ 6 ສະບັບ, ດໍາລັດໄດ້ 5 ສະບັບ, ຂໍ້ຕົກລົງໄດ້ 3 ສະບັບ ແລະ ແຈ້ງການຂອງລັດຖະບານ ຈໍານວນ 7 ສະບັບ, ພ້ອມດຽວກັນແຂວງກໍ່ໄດ້ຈັດຕັ້ງຄົ້ນຄົ້ວຜັນຂະຫຍາຍ ແລະ ມອບໃຫ້ຄະນະທີມງານຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດ ແລະ ກວດກາເບິ່ງໃນຂໍ້ມູນຕົວຈິງ, ຈາກນັ້ນ ແຂວງກໍ່ໄດ້ອອກນິຕິກໍາລຸ່ມກົດໝາຍຂັ້ນແຂວງໄດ້ 3 ສະບັບ ແລະ ອີກ 2 ສະບັບແມ່ນກະກຽມຜ່ານກອງປະຊຸມສະພາປະຊາຊົນແຂວງຮັບຮອງໃນຂັ້ນຕໍ່ໄປ, ສ່ວນໂຄງການຂະໜາດໃຫຍ່ທີ່ລັດຖະບານອານຸຍາດ 2 ໂຄງການຄື: ໂຄງກາານໄຟຟ້າພະລັງງານຄວາມຮ້ອນຫົງສາ ແມ່ນສໍາເລັດ 100 % ສາມາດຜະລິດພະລັງງານໄດ້ 12. 582 ຈີກາວັດຕໍ່ຊົ່ວໂມງ ແລະ ໂຄງການກໍ່ສ້າງເຂື່ອນໄຟຟ້າພະລັງງານນໍ້າຂອງ ຈັດຕັ້ງປະຕິບັດໄດ້ 84 %,ປະຈຸບັນພວມຟື້ນຟູອາຊີບ ແລະ ຊີວິດການເປັນຢູ່ໄລຍະຍາວຂອງບັນດາບ້ານທີ່ໄດ້ຮັບຜົນກະທົບ.



ຂ່າວ: ແຂວງໄຊຍະບູລີ   (ມີເດຍລາວ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.