Header Ads

ກະລຶມວາງແຜນການເຄື່ອນໄຫວໃນໂອກາດເປີດປີທ່ອງທ່ຽວລາວ 2018





ເພື່ອກະກຽມໃຫ້ແກ່ງານເປີດປີທ່ອງທ່ຽວລາວ2018 ແລະ ທ່ອງທ່ຽວເມືອງກະລຶມ ໃຫ້ໄດ້ຮັບປະສິດທິພາບສູງ ນັ້ນໃນວັນທີ 17 ພະຈິກ 2017 ນີ້ ເມືອງກະລຶມ ແຂວງເຊກອງ ໄດ້ຈັດກອງປະຊຸມປຶກສາຫາລືກະກຽມແຜນການເຄື່ອນໄຫວຈັດຕັ້ງປະຕິບັດວຽກງານໃນໂອກາດເປີດປີທ່ອງທ່ຽວລາວ 2018 ຂື້ນຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງ ທ່ານ ສາຍຄຳ ແກ້ວບຸນປານ ຮອງເຈົ້າເມືອງກະລຶມ ມີບັນດາທ່ານຄະນະກຳມະການຈັດງານດັ່ງກ່າວເຂົ້າຮ່ວມຢ່າງພ້ອມພຽງ.




ທ່ານ ສຸດສັກສິດ ຍິດແສນຫວັງ ກຳມະການພັກເມືອງ ຫົວໜ້າຫ້ອງການຖະແຫຼງຂ່າວ-ວັດທະນະທຳ ແລະ ທ່ອງທ່ຽວ ເມືອງກະລຶມລາຍງານໃຫ້ຮູ້ວ່າ: ການເປີດປີທ່ອງທ່ຽວເມືອງກະລຶມ 2018 ນີ້ແມ່ນ ໄດ້ຊຸກຍູ້ເຄື່ອນໄຫວຈັດຕັ້ງປະຕິບັດຕາມແນວທາງນະໂຍບາຍຂອງພັກ,ລະບຽບກົດໝາຍຂອງລັດຢ່າງເຂັ້ມງວດ ແລະ 4 ແຜນໃຫຍ່ ຂອງອົງຄະນະພັກແຂວງວາງອອກ ເພື່ອສ້າງຈິດສຳນຶກ,ຍົກສູງຄວາມຮັບຮູ້ຂອງສັງຄົມ,ຍາດແຍ່ງໂອກາດທ່າອ່ຽງການທ່ອງທ່ຽວຂອງໂລກ,ພາກພື້ນສຸມເຂົ້າໃນການພັດທະນາ ແລະ ສົ່ງເສີມການທ່ອງທ່ຽວຢູ່ລາວເວົ້າລວມເວົ້າສະເພາະຢູ່ເມືອງກະລຶມໃຫ້ເຂັ້ມແຂງ ໃນນີ້ມີຫຼາຍບັນຫາຕົ້ນຕໍຕອ້ງໄດ້ປັບປຸງເພື່ອຮັບໃຊ້ໃນງານເປີດປີທ່ອງທ່ຽວເມືອງກະລຶມ 2018 ເປັ້ນຕົ້ນ ປັບປຸງບູລະນະສະຖານທີ່ທ່ອງທ່ຽວໃຫ້ສວຍງາມ,ເພື່ອດຶງດູດນັກທ່ອງທ່ຽວ,ປັບປຸງນິຕິກຳ,ລະບຽບການຄຸ້ມຄອງທີ່ມີຢູ່ແລ້ວໃຫ້ເຮັດກຸມຂື້ນຕື່ມ,ເຜີຍແຜ່ໂຄສະນາອອກທາງສື່ຕ່າງໆເປັນປະຈຳ,ເອົາໃຈໃສ່ປັບປຸງຍົກສູງຄຸນນະພາບທາງດ້ານການບໍລິການດ້ານການທ່ອງທ່ຽວ ພ້ອມກັນນີ້ຍັງໄດ້ວາງແຜນການຈັດຕັ້ງປະຕິບັດບັນດາກິດຈະກຳໃນການຈັດງານດັງກ່າວຢ່າງລະອຽດໂດຍສະເພາະ ວາງແຜນສົ່ງເສີມກິດຈະກຳ ປະກອບມີ 19 ລາຍການ,ແຜນການພັດທະນາພື້ນຖານໂຄງລ່າງການທ່ອງທ່ຽວ 11 ລາຍການ ແລະ ວາງແຜນການຈັດຊື້ຈັດຈ້າງ-ສ້າງແຜນວຽກແຜນງານການແບ່ງຄວາມຮັບຜິດຊອບໃຫ້ຄະນະກຳມະການ ໂດຍປະສານສົມທົບຢ່າງລະອຽດຈະແຈ້ງໂດຍສະເພາະການຮ່ວມມືກັບຂະແໜງການທີ່ກ່ຽວຂ້ອງທາງພາກລັດ ແລະ ເອກະຊົນຢ່າງກົມກຽວ ທັງນີ້ກໍເພື່ອໃຫ້ການເຄື່ອນໄຫວຈັດຕັ້ງປະຕິບັດວຽກງານເປີດປີທ່ອງທ່ຽວຢູ່ເມືອງກະລຶມໄດ້ຮັບຜົນສຳເລັດ ແລະ ມີບັນຍາກາດຟົດຟື້ນຕາມຈຸດປະສົງລະດັບຄາດໝາຍທີ່ວາງໄວ້ເທື່ອລະກ້າວ.





ຂ່າວ: ທ ອັດສະວິນ ແສງສີຈັນ (ນັກຂ່າວ ເມືອງກະລຶມ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.