Header Ads

ພະແນກ ຖວທ ກຽມຄວາມພ້ອມແກ ງານເປີດປີທ່ອງທ່ຽວລາວ 2018







ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ )ແຂວງຈຳປາສັກ ໄດ້ຈັດກອງ ປະຊຸມປຶກສາຫາລືກະກຽມຄວາມພ້ອມໃນການເປີດງານປີທ່ອງທ່ຽວລາວ 2018 ທີ່ແຂວງຈຳປາສັກ ຊຶ່ງງານນີ້ຈະຈັດພ້ອມກັບການເປີດ ງານບຸນວັດພູຈຳປາສັກ.




 
ໃນກອງປະຊຸມໄດ້ປຶກສາຫາລືເຖິງກຳນົດການຈັດງານ, ວາລະການຈັດງານ, ຂະບວນແຫ່, ການສະ ແດງ ແລະ ອື່ນໆ. ໂດຍພິທີເປີດປີທ່ອງທ່ຽວຈະຈັດພ້ອມກັບການເປີດງານບຸນວັດພູ ຄືວັນທີ 29 ມັງກອນ 2018 ຊຶ່ງກົງກັບວັນຈັນ ອອກໃໝ່ 13 ຄຳ່ ເດືອນສາມ ( ບຸນວັດພູຈະຈັດ 3 ວັນ ແຕ່ວັນທີ 29-31 ມັງກອນ 2018). ງານເປີດປີທ່ອງທ່ຽວຈະເລີ່ມໃນຕອນບ່າຍ, ເລີ່ມດ້ວຍກ້ອນຂະບວນແຫ່ຈາກ 10 ຕົວເມືອງ ທີ່ສະແດງເຖິງເອກະລັກຂອງແຕ່ລະເມືອງ; ສ່ວນໃນເວທີເປີດງານຈະມີການສະແດງສິລະປະວັນນະຄະດີ, ການນຳຂອງແຂວງ ກ່າວເຖິງຄວາມສຳຄັນຂອງການເປີດປີທ່ອງທ່ຽວທີ່ແຂວງຈຳປາສັກ, ຕໍ່ດ້ວຍການນຳຂັ້ນ ສູນກາງ ໃຫ້ກຽດກ່າວເປີດງານ ແລະ ລັ່ນຄ້ອງ 9 ບາດ ເປີດງານປີທ່ອງທ່ຽວລາວ 2018 ທີ່ແຂວງ ຈຳປາສັກ ຢ່າງເປັນທາງການ ຊຶ່ງພາຍໃນງານຈະມີແຂກຖືກເຊີນຈາກພາຍໃນ ແລະ ຕ່າງປະເທດ ພ້ອມທັງມວນຊົນເຂົ້າ ຮ່ວມ.



ທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແຂວງກ່າວວ່າ: ຜົນກອງປະຊຸມຄັ້ງນີ້ຈະນຳ ໄປລາຍງານການນຳຂອງແຂວງ ເພື່ອຂໍທິດຊີ້ນຳຕື່ມ. ພ້ອມນີ້ເພື່ອເຮັດໃຫ້ປີທ່ອງທ່ຽວລາວ 2018 ທີ່ແຂວງຈຳປາສັກເປັນຂະບວນການຄຶກຄື້ນ, ມີແຂກທັງພາຍໃນ ແລະ ຕ່າງປະເທດມາທ່ອງທ່ຽວຢ່າງ ຫຼວງຫຼາຍນັ້ນ, ສື່ມວນຊົນຂອງແຂວງ ຕ້ອງເປັນເຈົ້າການໂຄສະນາຢ່າງແຂງແຮງ ແລະ ກວ້າງຂວາງ. ພ້ອມນີ້ ກໍ່ຂໍຮຽກຮ້ອງໃຫ້ບັນດາພະແນກການ, ກົມກອງອ້ອມຂ້າງ ແລະ 10 ຕົວເມືອງ ຈົ່ງໄດ້ຊ່ວຍໃນການ ໃນການກະກຽມໃຫ້ແກ່ປີທ່ອງທ່ຽວລາວ 2018 ເປັນຕົ້ນ ການຮັກສາຄວາມສະອາດສວຍງາມຂອງສຳນັກງານ ອົງການ ອາຄານບ້ານເຮືອນ, ຖະໜົນຫົນທາງ, ຮັກສາຄວາມສະຫງົບປອດໄພ, ມີອັດທະຍາໄສອັນດີກັບນັກ ທ່ອງທ່ຽວບໍ່ເອົາລັດເອົາປຽບເຂົາເຈົ້າ; ໃຫ້ຖືໂອກາດປີທ່ອງທ່ຽວລາວ ໂຄສະນາແຂວງຈຳປາສັກໃຫ້ເປັນທີ່ຮັບຮູ້ ແລະ ນິຍົມຊົມຊອບຂອງນັກທ່ອງທ່ຽວຫຼາຍຂຶ້ນ. 

 
ກອງປະຊຸມເພື່ອກະກຽມຄວາມພ້ອມໃຫ້ແກ່ງານເປີດປີທ່ອງທ່ຽວລາວ 2018 ທີ່ແຂວງຈຳປາສັກ ຂອງພະແນກ ຖວທ ແຂວງ ຈັດຂຶ້ນໃນວັນທີ 6 ພະຈິກ 2017 ໂດຍການເປັນປະທານຂອງທ່ານ ບົວທອງ ສຸວັນນະສານ ກຳມະການພັກແຂວງ ຫົວໜ້າພະແນກ ຖວທ ແຂວງ. ມີຄະນະພະແນກ, ຫົວໜ້າຂະແໜງ - ກອງວິຊາການທີ່ກ່ຽວຂ້ອງໃນພະແນກ ຖວທ ເຂົ້າຮ່ວມ.






ຂ່າວ: ສຸລິນ (ວິທະຍຸກະຈາຍສຽງຈໍາປາສັກ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.