Header Ads

ພະແນກ ຮສສ ເຊກອງ ຮ່ວມກັບອົງການເກັບກູ້ລະເບີດ ປາຖະກະຖາເອກກະສານສໍາຄັນຂອງພັກ ແລະ ຂອງຊາດ





ພະແນກແຮງງານ ແລະ ສະຫວັດດີການ-ສັງຄົມ ແຂວງເຊກອງ ຮ່ວມກັບອົງການເກັບກູ້ລະເບີດ ໄດ້ຈັດພິທີປາຖະກະຖາ 7 ເອກກະສານສຳຄັນຂອງພັກ, ຂອງຊາດ ຂຶ້້ນໃນວັນທີ 28 ພະຈິກ 2017 ນີ້ ຢູ່ທີ່ຫ້ອງປະຊຸມອົງການເກັບກູ້ລະເບີດ ປະຈໍາແຂວງເຊກອງ ໂດຍການເປັນປະທານຂອງທ່ານ ຄຳເບື້ອງ ເລຫວຽດມ່ວງ ຮອງເລຂາຄະນະພັກຮາກຖານ, ຮອງຫົວໜ້າພະແນກແຮງງານ ແລະ ສະຫວັດດີການ-ສັງຄົມແຂວງ ພ້ອມດ້ວຍຄະນພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານລັດຖະກອນ ພາຍໃນພະແນກ ແລະ ອົງການເກັບກູ້ລະເບີດເຂົ້າຮ່ວມຢ່າງພ້ອມພຽງ.



ທ່ານ ຄຳເບື້ອງ ເລຫວຽດມ່ວງ ຮອງເລຂາຄະນະພັກຮາກຖານ, ຮອງຫົວໜ້າພະແນກແຮງງານ ແລະ ສະຫວັດດີການ-ສັງຄົມ ໄດ້ໃຫ້ກຽດປະຖະກະຖາບັນດາເອກກະສານສຳຄັນຄື: ເອກກະສານວັນຄ້າຍວັນເກີດປະທານ ໄກສອນ ພົມວິຫານຄົບຮອບ 97 ປີ(13/12/1920-13/12/2017), ວັນສະຖາປະນາ ສປປ ລາວ ຄົບຮອບ 42 ປີ(2/12/1975-2/12/2017) ແລະ ປາຖະກະຖາປະຫວັດຄວາມເປັນມາຂອງວັນຢຸດຕິໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ,ມະຕິຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃໄລຍະໃໝ່ ເລກທີ 26/ຄບສພ, ລົງວັນທີ 3/8/2017 ແລະ ສານຂອງທ່ານນາຍົກລັດຖະມົນຕີ ເນື່ອງໃນງານຈັດຕັ້ງພິທີສະຫຼອງວັນສາກົນຢຸດຕິໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ວັນທີ 25 ພະຈິກ 2017 ຈາກທ່ານ ອົບມາ ລາດຕະກຸນ ເລຂາໜ່ວຍພັກ, ຮອງຫົວໜ້າພະແນກ ຮສສ, ນອກນັ້ນ ຍັງໄດ້ຮັບຟັງການເລົ່າມູນເຊື້ອວັນຄ້າຍວັນເກີດຂອງທ່ານ ຟຣິດລິກ ອັງແກນ ຄົບຮອບ 97 ປີ (28/11/1920-28/11/2017), ວັນມະຫາປະຕິວັດເດືອນຕຸລາ ລັດເຊຍ ຄົບຮອບ 100 ປີ(7/11/1917-7/11/2017) ຈາກທ່ານ ພະຂັນໄຊ ສີຫາເທບ ຮອງເລຂາໜ່ວຍພັກພະແນກ ຮສສ, ຈາກນັ້ນ ຍັງໄດ້ຮັບຟັງສະພາບລວມກ່ຽວກັບການຄຸ້ມຄອງທີ່ດິນໃນໄລຍະຜ່ານມາ ແລະ ທິດທາງຕົ້ນຕໍໃນການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ຕື່ມອີກ.



ທັງນີ້ກໍເພື່ອສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ, ສະມາຊິກພັກ, ນັກຮົບໃນກໍາລັງປະກອບອາວຸດ ແລະ ທົ່ວປວງຊົນລາວ ກໍ່ຄືບັນດາພະນັກງານ-ລັດຖະກອນພາຍໃນພະແນກ ຮສສ ແລະ ອົງການເກັບກູ້ລະເບີດປະຈໍາແຂວງເຊກອງ ໃຫ້ມີຄວາມຮັບຮູ້ເຂົ້າໃຈຢ່າງເລິກເຊິ່ງເຖິງຄວາມຫມາຍສໍາຄັນຂອງວັນດັ່ງກ່າວ ແລະຍົກສູງເຊີດຊູມານະຈິດປະຕິວັດ, ຄົ້ນຄວ້າຮໍ່າຮຽນ, ຝຶກຝົນຫລໍ່ຫລອມທັດສະນະຂອງພະນັກງານ, ສະມາຊິກພັກ ໃຫ້ມີທັດສະນະຫລັກຫມັ້ນຄຸນທາດການເມືອງຫນັກແຫນ້ນ ມີຄຸນສົມບັດສິນທໍາປະຕິວັດ, ເສີມຂະຫຍາຍມູນເຊື້ອອັນສະຫງ່າອົງອາດຂອງການປະຕິວັດເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດອັນແສນຮັກຂອງພວກເຮົາໃຫ້ສືບຕໍ່ກ້າວຂຶ້ນສູ່ຄວາມຈະເລີນວັດທະນາຢ່າງບໍ່ຢຸດຢັ້ງ.

ພາບ-ຂ່າວ: ພຸດທະສອນ/ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.