Header Ads

ຄາດພາຍໃນ 10 ປີ ດາວທຽມລາວຈະກຸ້ມທຶນ





ອຳນວຍການ ບໍລິສັດ ດາວທຽມ ລາວ ອາຊີ ປາຊີຟິກ ທ່ານ ຕິງ ຢົງປິງ ໄດ້ແຈ້ງຕໍ່ນັກຂ່າວໃນວັນທີ 20 ພະຈິກນີ້ວ່າ ຄາດວ່າພາຍໃນ 10 ປີ ໂຄງການດາວທຽມລາວທີ່ມີມູນຄ່າການລົງທຶນ 200 ກວ່າລ້ານໂດລາສະຫະລັດ ຈະສາມາດກຸ້ມທຶນພາຍຫຼັງທີ່ລາວປ່ອຍດາວທຽມດວງທຳອິດຂຶ້ນສູ່ວົງໂຄຈອນໃນເດືອນ ພະຈິກ 2015 ແລະ ມາຮອດປະຈຸບັນມີບໍລິສັດພາຍໃນ 5 ບໍລິສັດ ໃນນັ້ນມີ ບໍລິສັດ ລາວໂທລະຄົມ, ຢູນິເທວ, ກອງຄຸ້ມຄອງການບິນທາງອາກາດ ແລະ ໂຄງການທາງລົດໄຟລາວ-ຈີນ ໄດ້ເຊົ່າສັນຍານດາວທຽມລາວ ແລະ ບໍລິສັດຕ່າງປະເທດຈຳນວນໜຶ່ງ ຈາກ ຮົງກົງ (ສປຈີນ) ແລະ ປະເທດຈີນຕອນໃຕ້ ແລະ ອິນໂດເນເຊຍ ເຊິ່ງ ກວມອັດຕາສ່ວນຫຼາຍກວ່າໝູ່ ໄດ້ເຊົ່າໄປແລ້ວ 5 ຕຣານສະປອນເດີ (ປ່ອງຮັບສົ່ງຜ່ານສັນຍານ) ແລະ ຍັງຈະເຊົ່າອີກ 3 ຕຣານສະປອນເດີ ໃນອະນາຄົດອັນໃກ້ນີ້. 



ທ່ານ ຕິງ ຢົງປິງ ກ່າວວ່າ ການຄາດຄະເນໄລຍະກຸ້ມທຶນຂອງດາວທຽມລາວນັ້ນ ແມ່ນອີງໃສ່ບົດຮຽນຂອງອຸດສາຫະກຳດາວທຽມຂອງຫຼາຍປະເທດໃນທົ່ວໂລກ.


ທາງບໍລິສັດດາວທຽມລາວ ໄດ້ກຳນົດ ຕຣານສະປອນເດີ ໄວ້ 17 ປ່ອງ ໃນຈຳນວນທັງໝົດ 22 ປ່ອງ ໄວ້ສຳລັບລູກຄ້າຕ່າງປະເທດ. ຢ່າງໃດກໍຕາມ ທາງບໍລິສັດ ມີແຜນຈະປຶກສາຫາລືກັບໜ່ວຍງານກ່ຽວຂ້ອງຂອງລັດຖະບານເພື່ອສ້າງນິຕິກຳມາຄຸ້ມຄອງທຸລະກິດທີ່ກ່ຽວຂ້ອງເພື່ອເຮັດໃຫ້ມີບັນຍາກາດການແຂ່ງຂັນທາງດ້ານການບໍລິການກ່ຽວກັບສັນຍານດາວທຽມທີ່ຍຸຕິທຳ ແລະ ຖືກຕ້ອງຕາມກົດໝາຍຂອງ ສປປ.ລາວ.




ທ່ານ ຕິງ ຢົງປິງ ກ່າວອີກວ່າ ດາວທຽມລາວໃນເບື້ອງຕົ້ນໄດ້ຮັບການອອກແບບມາໃຫ້ມີອາຍຸການໃຊ້ງານ 15 ປີ ແຕ່ພາຍຫຼັງມີການປັບປຸງລະບົບ ຈຶ່ງສາມາດເຮັດໃຫ້ດາວທຽມລາວມີອາຍຸການໃຊ້ງານເພີ່ມຂຶ້ນເປັນ 16,5 ປີ. 


 ແຫຼ່ງຂ່າວ: ຂປລ 

-----------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.