Header Ads

ລາວ-ຈີນ ມີຜົນສຳເລັດຫລາຍດ້ານ ໃນການເປັນຄູ່ຮ່ວມມື ຍຸດທະສາດຮອບດ້ານ



ໃນ​ວັນ​ທີ 9 ພະຈິກ 2017 ທ່ານ ສະ​ເຫລີ​ມ​ໄຊ ກົມມະ​ສິດ ລັດຖະມົນຕີ​ ກະຊວງການຕ່າງປະ​ເທດ ​ໄດ້​ໃຫ້​ສຳພາດ​ຕໍ່​ສື່ມວນ​ຊົນ ຈາກ ສປ ຈີນ ​ແລະ ສປປ ລາວ ກ່ຽວ​ກັບຄວາມ​ຄືບ​ໜ້າ​ ໃນ​ການ​ສ້າງສາ​ຍພົວພັນ ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ ລະຫວ່າງ ລາວ-ຈີນ ​ໃນ​ຫລາຍ​ປີຜ່ານມາ ​ເຫັນ​ວ່າ​ການ​ພົວພັນຮ່ວມ​ມື​ສອງ​ຝ່າຍ ​ໄດ້​ມີ​ການ​ຂະຫຍາຍຕົວທາງ​ດ້ານ​ ລວງ​ກວ້າງ ​ແລະ ​ເລີກ ​ເຊິ່ງສະ​ແດງ​ອອກ​ຢ່າງ​ຈະ​ແຈ້ງ​ ໃນ​ຫລາຍໆ​ດ້ານ.

ທ່ານ ສະ​ເຫລີ​ມ​ໄຊ ກົມມະ​ສິດ ​ໄດ້​ໃຫ້​ຮູ້​ວ່າ: ສປປ ລາວ ​ແລະ ສປ ຈີນ ມີ​ສາຍ​ພົວພັນ​ທີ່​ດີ​ນຳ​ກັນ​ມາ​​ຍາວ​ນານ, ໃນ​ປີ 2009 ລາວ ​ແລະ ສປ ຈີນ ​ໄດ້​ມີ​ການ​ເພີ່ມ​ທະວີ​ ການ​ພົວພັນ ​ແລະ ຍົກ​ລະດັບ​ການ​ພົວພັນ​ຮ່ວມ​ມື​ສອງ​ຝ່າ​ຍ​ ເປັນການ​ພົວພັນ​ແບບ​ຄູ່​ຮ່ວມ​ມື​ ຍຸດ​ທະ​ສາ​ດຮອບດ້ານ​​ຍາວ​ນານ, ​ເຊິ່ງ​ການ​ຍົກ​ລະດັບ​ ການ​ພົວພັນ​ຮ່ວມ​ມື​ສອງ​ຝ່າຍ​​ ແມ່ນ​ສອດຄ່ອງ​ກັບ ​ຍຸກ​ສະ​ໄໝ​ໃໝ່. ຕະຫລອດ​ໄລຍະ​ທີ່​ຜ່ານ​ມາ ພາຍຫລັງ​ສອງ​ປະ​ເທດ ​ໂດຍ​ສະ​ເພາະ​ການ​ນຳ​ ພັກ-ລັດ ​ຂອງ​ສອງ​ປະ​ເທດ ​ໄດ້​ມີ​ການ​ຍົກ​ລະດັບ​ການ​ຮ່ວມ​ມື​ ໃນ​ຮູບ​ແບບຄູ່​ຮ່ວມ​ມື​ ຍຸດ​ທະ​ສາດ​ຮອບດ້ານ ​ເຫັນ​ວ່າ ​ການ​ພົວພັນຮ່ວມ​ມື​ສອງ​ຝ່າຍ ລາວ-ຈີນ ​ໄດ້​ມີ​ການ​ຂະຫຍາຍຕົວ ທາງ​ດ້ານ​ລວງ​ກວ້າງ ​ແລະ ​ເລີກ, ​ເຊິ່ງສະ​ແດງ​ອອກ​ຢ່າງ​ຈະ​ແຈ້ງ ​ໃນ​ດ້ານ​ການ​ເມືອງ ​ໄດ້​ມີ​ການ​ແລກປ່ຽນ ​ຄະນະ​ຜູ້​ແທນ​ຂັ້ນ​ສູງ, ການ​ນຳ​ພັກ​-ລັດ ຂອງ​ສອງ​ປະ​ເທດ​ໄດ້​ມີ​ ການ​ແລກປ່ຽນ​ການ​ຢ້ຽມຢາມ ​ໄປມາຫາສູ່​ກັນ​ຢ່າງ​ເປັນ​ປະຈຳ ​ເຊິ່ງ​​ໄດ້​ເຮັດ​ໃຫ້​ມີ​ການ​ ເຂົ້າ​ອົກ​ເຂົ້າ​ໃຈ ​ແລະ ​ໄວ້​ເນື້ອ​ເຊື່ອ​ໃຈ​ ເຊິ່ງກັນ ​ແລະ ກັນ ລະຫວ່າງ​ການ​ນຳ​ ພັກ-ລັດ​ ຂອງ​ສອງ​ປະ​ເທດ ກໍ​ຄື​ປະຊາຊົນ​ສ​ອງຊາດ​ລາວ-ຈີນ ​ໃຫ້​ນັບ​ມື້​ເພີ່ມ​ທະວີ​ເລື້ອຍໆ​ມາ; ​ໃນ​ດ້ານ​ເສດຖະກິດ​ ກໍ​ຈະ​ເຫັນ​ວ່າ ການ​ພົວພັນ​ຮ່ວມ​ມື​ ໃນ​ດ້ານ​ເສດຖະກິດ​ໄດ້​ມີ​ການ​ ຂະຫຍາຍ​ຕົວກ້າວ​ຂຶ້ນ​ແບບ​ກະ​ໂດດ​ຂັ້ນ ​​ໂດຍສະ​ແດງ​ອອກ​ ໃນ​ດ້ານ​ການ​ລົງທຶນຜ່ານ​ມາ ສປ ຈີນ ​ເປັນ​ຜູ້​ລົງທຶນ​ອັນ​ດັບ​ໜຶ່ງ​ຂອງ​ ສປປ ລາວ ​ໃນ​ໄລຍະ​ຫລາຍ​ປີ, ​ເຊິ່ງແມ່ນ​ໝາກຜົນ​ຂອງ​ການ​ຮ່ວມມື​ແບບ​ຄູ່​ຮ່ວມ​ມື​ ຍຸດ​ທະ​ສາດ​ຮອບດ້ານ ລະຫວ່າງ ລາວ-ຈີນ; ​ໃນ​ດ້ານ​ການ​ຄ້າ​ ຂອງ​ສອງ​ປະ​ເທດ ​​​ເຖິງ​ວ່າ​ຈະ​ມີ​ມູນ​ຄ່າ​ການ​ຄ້າ​ຍັງ​ຕໍ່າ ​ຢູ່ຫລາຍ​ກວ່າພັນ​ລ້ານ​ໂດ​ລາ​ສະຫະລັດ ​ໃນ​ໄລຍະ​ທີ່​ຜ່ານ​ມາ ​ແຕ່ສັງ​ເກດ​ເຫັນ​ວ່າ ​ທ່ວງທ່າ​ການ​ຂະຫຍາຍ​ໂຕ​ ການ​ແລກປ່ຽນ​ການ​ຄ້າ​ ລະ​ຫວ່າງ​ສອງ​ປະ​ເທດ ນັບ​ມື້​ນັບ​ເພີ່ມ​ຂຶ້ນ. ປີຜ່ານມາ​ມູນ​ຄ່າ​ການ​ຄ້າ ​ສອງ​ປະ​ເທດ​ກໍ​ເພີ່ມ​ຂຶ້ນກວ່າ 20%; ​ໃນການ​ຮ່ວມ​ມື​ດ້ານຂົງ​ເຂດ ວັດ​ທະນະ​ທຳ​-ສັງຄົມ ​ໄດ້​ມີ​ການຂະຫຍາຍຕົວ​ ຢ່າງ​ກວ້າງຂວາງ ບໍ່ວ່າ​ຈະ​ເປັນ​ການ​ແລກປ່ຽນ​ ທາງ​ດ້ານ​ວັດທະນະທຳ ລາວ-ຈີນ, ການ​ທ່ອງ​ທ່ຽວ ​​ໃນ​ໄລຍະ​ຜ່ານ​ມາ ​ເຫັນ​ໄດ້​ຈຳນວນ​ ຂອງ​ນັກ​ທ່ອງ​ທ່ຽວຈີນ ທີ່​ມາ​ທ່ອງທ່ຽວ​ຢູ່ ສປປ ລາວ​ ​ເພີ່ມ​ຂຶ້ນ ປັດຈຸ​ບັນ​ ກໍ​ເພີ່ມ​ຂຶ້ນ​ເກືອບ​ລ້ານ​ຄົນ. ​ອັນ​ນີ້ກໍ​ແມ່ນ​ໝາກຜົນ ​ຂອງ​ການ​ປະຕິບັດ​ນະ​ໂຍບາຍ ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ ຂອງ​ສອງ​ພັກ-ລັດ ​ແລະ ປະຊາຊົນ​ສອງ​ຊາດ ລະຫວ່າງ ລາວ-ຈີນ ​ໃນ​ໄລຍະ​ທີ​ຜ່ານ​ມາ.

ພ້ອມ​ນີ້, ທ່ານ​ລັດຖະມົນຕີ ຍັງ​ໃຫ້​ຮູ້ຕື່ມ​ວ່າ: ພາຍຫລັງ​ທີ່ປະທານ ສີຈີ້​ນຜີ​ງ ​ໄດ້​ປະ​ກາດ​ຂໍ້​ລິ​ເລີ່​ມ “ໜຶ່ງ​ແລວ​ທາງ​ໜຶ່ງ​ເສັ້ນທາງ” ​ໃນ​ປີ 2013 ລັດຖະບານ ສປປ ລາວ​ ກໍ​ໄດ້​ສະໜັບສະ​ໜູນ ​ແລະ ​ເຂົ້າ​ຮ່ວມ​ຢ່າງ​ຫ້າວ​ຫັນ​ ​ໃນ​ການຈັດ​ຕັ້ງ​ປະຕິບັດ ​ບັນດາ​ມາດ​ຕະການ​ ກໍ​ຄື​ ໂຄງການ​ຕ່າງໆບົນ​ພື້ນຖານ ຂອງ​ຂໍ້​ລິ​ເລີ່​ມ “ໜຶ່ງ​ແລວ​ທາງ​ໜຶ່ງ​ເສັ້ນທາງ” ​ເຊິ່ງສິ່ງ​ທີ່ ສປປ ລາວ ຈະ​ໄດ້​ຮັບ​ໃນ​ອານາ​ຄົດ​ ແມ່ນ​ມີ​ຫລາຍ​ອັນ, ອັນ​ພົ້ນ​ເດັ່ນ​ເຫັນ​ວ່າ ທາງ​ດ້ານ​ທີ່​ຕັ້ງຂອງ ສປປ ລາວ ​ແມ່ນ​ຢູ່​ໃນ​ໃຈກາງ​ຂອງ​ພາກ​ພື້ນ ນອນຢູ່​ໃນ​ແລວ​ທາງຂອງ​ຂໍ້​ລິ​ເລີ່​ມ ດັ່ງກ່າວ ​ເຊິ່ງ​ເຫັນ​ໄດ້​ພົ້ນ​ເດັ່ນ​ ກໍ​ຄື ​ໂຄງການ​ສ້າງ​ທາງ​ລົດ​ໄຟ​ດ່ວນ​ ຈາກ​ພາກ​ໃຕ້​ຂອງ​ຈີນ ​ແຂວງ​ຢຸນໜານ ສູ່​ນະຄອນຫລວງ​ວຽງ​ຈັນ ບໍ່​ພຽງ​ແຕ່​ຈະ​ອຳ​ນວຍ​ຄວາມ​ສະດວກ ​ໃຫ້​ແກ່​ການ​ຂົນ​ສົ່ງລະຫວ່າງ​ ລາວ-ຈີນ ​ເທົ່າ​ນັ້ນ ​ແຕ່​ຍັງ​ຈະ​ເປັນ​ ສິ່ງ​ອຳ​ນວຍຄວາມ​ສະດວກ ​ໃຫ້​ແກ່​ປະ​ເທດ​ໃຫ້​ຄຽງຢູ່​ໃນ​ ພາກ​ພື້ນ​ອາຊີ-ປາຊີ​ຟິກ ສາມາດ ​ນຳ​ໃຊ້ແລວ​ທາງ ຫລື ​ເສັ້ນທາງ​ດັ່ງກ່າວ ​ໃນ​ການ​ຂົນ​ສົ່ງ​ສິນຄ້າ, ການ​ຂະຫຍາຍ​ການ​ຮ່ວມ​ມື​ ທາງ​ດ້ານ​ເສດຖະກິດ​ ຢູ່​ໃນ​ພາກ​ພື້ນ ກໍ​ຄື​ ຢູ່​ໃນ​ໂລກ​ເຊັ່ນ​ດຽວ​ກັນ.

ຂ່າວ: ສົມ​ຫວັງ ພາບ: ​ໄອ່​ຄຳ /ຂປລ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.