Header Ads

ພາກລັດ-ທຸລະກິດ ຮ່ວມຫາລືປັບປຸງການທ່ອງທ່ຽວ



ເພື່ອ​ຊອກ​ຫາ​ທາງ​ໃນ​ການ​ອຳນວຍ​ຄວາມ​ສະດວກ​ໃຫ້​ແກ່​ນັກທ່ອງ​ທ່ຽວ ​ທີ່​ຈະ​ເຂົ້າ​ມາ​ຢ້ຽມຢາມ ​ສປປ ລາວ ໃຫ້​ນັບ​ມື້​ຫຼາຍ​ຂຶ້ນ ໂດຍ​ສະເພາະ ໄລຍະ​ສະເຫຼີມ​ສະຫຼອງ​ປີ​ທ່ອງ​ທ່ຽວ​ລາວ 2018 ໃຫ້ມີ​ຄວາມ​ຄຶກຄື້ນ ກົມ​ຄຸ້ມ​ຄອງການທ່ອງທ່ຽວ ກະຊວງ​ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້​ຮັບ​ການ​ສະໜັບສະໜູນຈາກ​ໂຄງການ​ພັດທະນາ​ໂຄງລ່າງ​ພື້ນຖານ ເພື່ອ​ສົ່ງເສີມ​ການທ່ອງ​ທ່ຽວ ຈັດ​ກອງ​ປະຊຸມ​ປຶກສາຫາລືລະຫວ່າງ​ພາກ​ລັດ-ພາກທຸລະ​ກິດ ກ່ຽວ​ກັບ​ການ​ສະໜັບສະ​ໜູນ​ວຽກ​ງານ​ການທ່ອງທ່ຽວຂອງ ​ສປປ ລາວ ຂຶ້ນວັນ​ທີ 24 ພະຈິກ 2017 ທີ່​ໂຮງແຮມ​ເມືອງແທັງ ນະຄອນຫຼວງ​ວຽງ​ຈັນ ເປັນປະທານ​ຂອງ​ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ​ກະຊວງ ຖວທ ມີ​ພາກ​ລັດ-ພາກ​ທຸລະ​ກິດທ່ອງ​ທ່ຽວ​ເຂົ້າ​ຮ່ວມ.

ກອງ​ປະຊຸມ​ໃນ​ຄັ້ງ​ນີ້ ໄດ້​ຈັດຂຶ້ນ​ເພື່ອ​ພົບ​ປະ ແລະ ປຶກສາ​ຫາລືກັບ​ບັນດາ​ພາກສ່ວນ​ທີ່​ກ່ຽວຂ້ອງ ເພື່ອ​ສົ່ງເສີມ​ການ​ສ້າງ​ກິດຈະກຳປີ​ທ່ອງ​ທ່ຽວ 2018 ຫາລື​ບັນດາພາກສ່ວນ​ກ່ຽວຂ້ອງ ທັງ​ພາກລັດ-ພາກ​ທຸລະ​ກິດ ເພື່ອ​ຮ່ວມ​ກັນຊອກ​ຫາ​ຊ່ອງ​ທາງ ໃນ​ການ​ອຳນວຍ​ຄວາມ​ສະດວກ​ໃຫ້​ນັກ​ທ່ອງທ່ຽວ ທັງ​ເປັນ​ການ​ຮ່ວມ​ກັນ​ປຶກສາ​ຫາລື ກ່ຽວ​ກັບ​ການ​ແກ້​ໄຂວຽກ​ງານ​ທີ່​ຄົງ​ຄ້າງ​ຂອງ​ຫົວໜ່ວຍ​ທຸລະ​ກິດ ພ້ອມ​ກັນ​ນີ້ ກໍ່​ສະເໜີ​ໃຫ້​ພາກ​ທຸລະ​ກິດ​ທີ່​ຕິດ​ພັນດ້ານ​ການທ່ອງທ່ຽວ​ໃຫ້​ມີ​ການຮ່ວມ​ມື ແລະ ນຳ​ໃຊ້​ແຮງ​ງານຂອງ​ຕົນ ເພື່ອ​ເຮັດ​ໃຫ້​ປີ​ທ່ອງ​ທ່ຽວລາວ​ມີ​ຄວາມ​ສຳເລັດ ກອງ​ປະຊຸມ​ໃນ​ຄັ້ງ​ນີ້ ເປັນ​ການ​ຢຶດ​ຖື​ນະໂຍ​ບາຍ​ພາກ​ລັດ ພາກ​ທຸລະ​ກິດ ແລະ ສັງຄົມ​ຕ້ອງ​ໄດ້​ຮ່ວມ​ມື​ກັນ ປັບປຸງ​ພັດທະນາ​ຂະແໜງການດັ່ງກ່າວ ເພື່ອ​ໃຫ້​ໄດ້ຜົນ​ປະໂຫຍດຮ່ວມ​ກັນ.

ສຳລັບ​ກອງ​ປະຊຸມ​ໃນ​ຄັ້ງ​ນີ້ ໄດ້ເປີດ​ໂອກາດ​ໃຫ້​ພາກ​ທຸລະ​ກິດ ສະເໜີ​ບັນຫາ​ໃນ​ການ​ດຳເນີນ​ທຸລະກິດ​ການທ່ອງທ່ຽວ ໄດ້​ມີ​ຫຼາຍ​ບັນຫາ​ທີ່​ພາກ​ທຸລະ​ກິດ​ສະເໜີ​ໃຫ້ພາກ​ລັດ​ຊ່ວຍ​ແກ້​ໄຂ ເປັນຕົ້ນ ຫາມາດ​ຕະການ​ຄຸ້ມ​ຄອງລາຄາໂຮງແຮມ ຮ້ານ​ອາຫານ​ໃຫ້​ມີ​ລາຄາ​ທີ່​ແທດເໝາະ ກວດຄືນ​ອັດຕາເຂົ້າ​ຊົມ​ແຫຼ່ງ​ທ່ອງ​ທ່ຽວ ກວດຄືນບໍລິສັດ​ທ່ອງ​ທ່ຽວ ປ້ອງ​ກັນ​ການສວຍໂອກາດ​ບໍລິສັດ​ທີ່​ບໍ່​ມີ​ຕົວ​ຕົນ ສ້າງ​ນິຕິ​ກຳ​ຄຸ້ມ​ຄອງ​ການ​ທ່ອງທ່ຽວ​ ຕ້ອງ​ມີ​ຄວາມ​ເອກະ​ພາບ​ໃນການເຄື່ອນໄຫວ ການ​ຕິດຕາມກວດກາ ແລະ ການ​ບໍລິການຂອງ​ເຈົ້າ​ໜ້າທີ່ ຄວນ​ມີ​ການ​ປັບປຸງ ແລະ ບັນຫາ​ອື່ນໆ​ອີກ​ຈຳນວນ​ໜຶ່ງ ເຊິ່ງ​ບັນຫາ​ທີ່​ສະເໜີໃນ​ກອງ​ປະຊຸມ​ນີ້ ແມ່ນ​ທາງ​ພາກສ່ວນ​ທີ່​ກ່ຽວຂ້ອງ​ຈະ​ນຳໄປ​ຄົ້ນຄວ້າ​ພິຈາລະນາ​ແກ້​ໄຂ​ ໃຫ້​ສອດຄ່ອງ​ກັບ​ສະພາບ​ຄວາມ​ເປັນ​ຈິງ.

ໃນ​ປີ 2016 ໄດ້​ມີ​ນັກ​ທ່ອງທ່ຽວ​ສາກົນ​ເຂົ້າ​ມາ​ທ່ອງ​ທ່ຽວໃນ ​ສປປ ລາວ ຈຳນວນ 4,2 ລ້ານເທື່ອ​ຄົນ ສ້າງ​ລາຍ​ຮັບທັງ​ໝົດ 724 ລ້ານ​ໂດ​ລາ​ສະຫະລັດ ໂດຍອີງ​ຕາມ​ຕົວ​ເລກ​ສະຖິຕິ​ການ​ທ່ອງທ່ຽວທີ່​ໄດ້​ກ່າວ​ມາ​ນັ້ນ ສັງເກດເຫັນ​ວ່າ ການທ່ອງທ່ຽວ​ຢູ່ ​ສປປ ລາວ ເປັນ​ຂະແໜງການ​ໜຶ່ງ​ທີ່ເປັນ​ທ່າແຮງ​ ໃນ​ການ​ປະກອບສ່ວນ​ເຂົ້າ​ໃນ​ການ​ສ້າງ​ລາຍ​ຮັບເຂົ້າ​ປະເທດ ເຊິ່ງ​ຈັດ​ເປັນ​ອັນ​ດັບ​ທີ 4 ຮອງ​ຈາກ​ຂະແໜງການ​ບໍ່​ແຮ່ ອຸດສາຫະກຳ ແລະ ໄຟຟ້າ ສະເພາະ​ປີ 2018 ໃຫ້​ມີ​ນັກ​ທ່ອງທ່ຽວ​ເຂົ້າ​ມາ​ບໍ່​ຕໍ່າ​ກວ່າ 5 ລ້ານຄົນ ແລະ ສ້າງ​ລາຍ​ຮັບ​ໃຫ້​ໄດ້ປະມານ 900 ລ້ານ​ໂດ​ລາ.

ເພື່ອ​ດຶງ​ດູດ​ນັກ​ທ່ອງ​ທ່ຽວ​ໃຫ້ເຂົ້າ​ມາ​ຢ້ຽມຢາມ ​ສປປ ລາວ ເພີ່ມ​ຂຶ້ນ ​ສປປ ລາວ ແມ່ນ​ໄດ້​ເລັ່ງໃສ່​ປັບປຸງ​ດ້ານ​ພື້ນຖານ​ໂຄງ​ລ່າງ ພັດທະນາ​ຖະໜົນ​ຫົນທາງ ພັດທະ​ນາ​ແຫຼ່ງ​ທ່ອງ​ທ່ຽວ ແນໃສ່ແຫຼ່ງ​ທ່ອງ​ທ່ຽວ​ທີ່​ສາມາດ​ຕອບສະໜອງ​ເສດຖະກິດ​ໄດ້​ໂດຍ​ໄວ ພ້ອມ​ທັງ​ໄດ້​ພັດທະນາ​ບຸ​ຄະລາກອນ ໂດຍ​ການ​ສົ່ງ​ບຸລະ​ຄາ​ກອນໄປ​ເຝິກອົບຮົມ​ການ​ຈັດ​ສັນ​ການທ່ອງ​ທ່ຽວ ແລະ ສົ່ງເສີມການ ຂະຫຍາຍ​ການ​ເຊື່ອມ​ໂຍງ​ທາງອາກາດ ພັກ​ດັນ​ໃຫ້​ມີ​ສາຍ​ການບິນ​ໂດຍ​ກົງ​ຈາກ​ປະເທດ​ທີ່​ມີ​ລາຍຮັບ​ສູງ ສົ່ງເສີມ​ການ​ຮ່ວມ​ມື​ການທ່ອງ​ທ່ຽວ​ລະຫວ່າງ​ຊາຍ​ແດນ ປັດຈຸບັນ ​ສປປ ລາວ ມີ​ບໍລິສັດທ່ອງ​ທ່ຽວ​ທັງ​ໝົດ 430 ບໍລິສັດ. 
ພາບ ແລະ ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.