Header Ads

ພົບປະນັກທຸລະກິດ ເພື່ອລະດົມທຶນໃຫ້ແກ່ງານເປີດປີທ່ອງທ່ຽວທີ່ເຊກອງ




ຄະນະນໍາແຂວງເຊກອງໄດ້ຈັດກອງປະຊຸມພົບປະນັກທຸລະກິດ, ຜູ້ປະກອບ ເພື່ອເປັນການລະດົມທຶນໃຫ້ແກ່ງານເປີດປີທ່ອງທ່ຽວລາວປີ 2018 ຂຶ້ນເມື່ອວັນທີ 16 ພະຈິກຜ່ານມາ ໂດຍມີທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ, ບັນດາທ່ານຮອງເຈົ້າແຂວງ, ຫົວໜ້າ-ຮອງພະແນກ, ນັກທຸລະກິດ-ຜູ້ປະກອບການທັງພາກລັດ ແລະ ເອກະຊົນເຂົ້າຮ່ວມ.



ໃນກອງປະຊຸມໄດ້ຮັບຟັງບົດລາຍງານກ່ຽວກັບສະພາບລວມຂອງແຂວງ, ທ່າແຮງດ້ານການທ່ອງທ່ຽວ, ສິ່ງຮອງຮັບແຂກພາຍໃນ ແລະ ຕ່າງປະເທດທີ່ເຂົ້າມາທ່ຽວແຂວງເຊກອງ, ການກະກຽມເປີດປີທ່ອງທ່ຽວລາວປີ 2018 ໂດຍສະເພາະແມ່ນການກຳນົດກິດຈະກຳຕ່າງໆ, ຮັບຟັງການປະກອບຄໍາຄິດເຫັນຂອງຜູ້ລົງທຶນ ແລະ ຜູ້ປະກອບການດ້ານທຸລະກິດການທ່ອງທ່ຽວເປັນຕົ້ນແມ່ນການແກ້ໄຂສິ່ງສ້າງຄວາມຫຍຸ້ງຍາກສັບສົນ, ການສ້າງສິ່ງອໍານວຍຄວາມສະດວກດ້ານຕ່າງໆແກ່ຜູ້ລົງທຶນ, ຜູ້ປະກອບການ ແລະ ອື່ນໆ, ເຊີ່ງທັງນີີ້ເພື່ອເປັນການດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວແຂວງເຊກອງຫຼາຍຂື້ນເລື້ອອຍ.



ທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງກ່າວວ່າ: ກອງປະຊຸມຄັ້ງນີ້ ແມ່ນເປັນຄັ້ງປະຫວັດສາດ ເພາະນອກຈາກເປັນການກະກຽມຄວາມພ້ອມໃນດ້ານຕ່າງໆໃຫ້ແກ່ການສະເຫຼີມສະຫຼອງປີທ່ອງທ່ຽວລາວປີ 2018 ທີ່ແຂວງເຊກອງແລ້ວ ຍັງເປັນການຈັດກອງປະຊຸມ ເພື່ອຖອດຖອນບົດຮຽນ, ແລກປ່ຽນລະຫວ່າງພາກທຸລະກິດກັບອໍານາດການປົກຄອງແຂວງ ຊຶ່ງນັກທຸລະກິດ ແລະ ຜູ້ປະກອບການແມ່ນອົງປະກອບໜຶ່ງທີ່ສຳຄັນ ເພື່ອຜັກດັນ, ຍູ້ແຮງ ແລະ ເປັນກຳລັງແຮງໃນການພັດທະນາເສດຖະກິດ-ສັງຄົມຂອງແຂວງ.


ໃນຕອນທ້າຍ ທ່ານ ຄຳເຜີຍ ບຸດດາວຽງ ກໍໄດ້ມີຄຳເຫັນໂອ້ລົມ ໂດຍຍົກໃຫ້ເຫັນຄວາມໝາຍສຳຄັນຂອງຂະ ແໜງທ່ອງທ່ຽວເຊິ່ງເປັນຂະແໜງການເສດຖະກິດໜຶ່ງ ທີ່ປະກອບສ່ວນສຳຄັນຕໍ່ການພັດທະນາເສດຖະກິດ-ສັງຄົມຂອງແຂວງ ແລະ ການແກ້ໄຂຄວາມທຸກຍາກຂອງປະຊາຊົນ ຊຶ່ງເປັນຂະແໜງທີ່ສ້າງລາຍຮັບໂດຍກົງໃຫ້ປະຊາຊົນ.


ຂ່າວ-ພາບ : ສັນຍາ ແກ້ວໄຊຍະວົງ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.