Header Ads

ເອກະຊົນຈີນ ສຶກສາ-ສຳຫລວດ-ອອກແບບ ເສັ້ນທາງຫລວງທ້ອງຖິ່ນ ແຂວງສະຫວັນນະເຂດ



ບໍລິສັດ ເຈີຈຽງຄອນເທັກເຊິນອິນແວດເທີເມັນກຣຸບ ຈຳກັດ ແຫ່ງ ສປ ຈີນ ໄດ້ເຊັນບົດບັນທຶກຄວາມເຂົ້າໃຈ (MOU) ການສຶກສາຄວາມເປັນໄປໄດ້ຂອງ ໂຄງການພັດທະນາ ດ້ານໂຄງລ່າງເສັ້ນທາງ ຫວງທ້ອງຖິ່ນ 5 ເມືອງ ໃນແຂວງສະຫວັນນະເຂດ ກັບ ພະແນກໂຍທາທິການ ແລະ ຂົນສົ່ງແຂວງ ໃນອາທິດຜ່ານມາ ໂດຍມີທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ປະສົງສິນ ຈະເລີນສຸກ ຫົວໜ້າພະແນກ ຍທຂ ແຂວງ, ເຈົ້າເມືອງ-ຮອງເຈົ້າເມືອງ, ມີພາກສ່ວນກ່ຽວຂ້ອງ ແລະ ພະນັກງານຂອງ ບໍລິສັດດັ່ງກ່າວເຂົ້າຮ່ວມ.

ທ່ານ ສົມສີ ຜ່ອງສີ ຮອງຫົວໜ້າຂະແໜງຄຸ້ມຄອງທາງບົກ
ໄດ້ໃຫ້ຮູ້ວ່າ: ບົດບັນທຶກ MOU ສະບັບນີ້ມີອາຍຸ 18 ເດືອນ ນັບແຕ່ມື້ລົງລາຍເຊັນເປັນຕົ້ນໄປ ຫລັງຈາກນັ້ນ ແມ່ນໂມຄະ,  ເຊິ່ງຜູ້ລົງທຶນ ຈະໄດ້ດຳເນີນ ການສຶກສາຄວາມເປັນໄປໄດ້ ເພື່ອສະເໜີແຂວງ ພັດທະນາເປັນທາງປູຢາງ 2 ຊັ້ນ ໃນ 5 ເສັ້ນຄື: ເສັ້ນທາງຫລວງຂອງແຂວງ ທາງເລກທີ 2.6312 ແຕ່ແຍກທາງເລກ 9 (ບ້ານຫນອງບົວທອງ) ເມືອງອຸທຸມພອນ ຫາບ້ານດົງດອກໄມ້, ເມືອງຈຳພອນ, ຍາວ 22 ກິໂລແມັດ; ທາງເລກທີ 2.6310 ແຕ່ແກ້ງກອກ(ເມືອງຈຳພອນ) ຫາປາກຊ່ອງ ຫາບ້ານນາໂພ, ເມືອງສອງຄອນ, ລວງຍາວ 33 ກິໂລແມັດ; ທາງ ເລກທີ 2.6302 ແຕ່ບ້ານນາໂພ ຫາບ້ານທ່າປະຊຸມ, ເມືອງສອງຄອນ, ຍາວ 18 ກິໂລແມັດ; ທາງຫລວງຂອງເມືອງ ເລກທີ 3.6507 ແຕ່ແຍກທາງເລກ 9 (ບ້ານບົວຄຳ) ເມືອງອາດສະພັງທອງ ຫາເທສະບານເມືອງຊົນນະບູລີ, ຍາວ 44 ກິໂລແມັດແລະ ເສັ້ນທາງຫລວງຊົນນະບົດ ເລກທີ 5.6499 ແຕ່ບ້ານບຶງຊ້າງ ເມືອງຊົນນະບູລີ ຫາບ້ານສອງຄອນ ຫາບ້ານລະຫານ້ຳ ເມືອງສອງຄອນ,  ຍາວ 45 ກິໂລແມັດ,  ລວມຄວາມຍາວຂອງເສັ້ນທາງ ທັງຫມົດ 162. ກິໂລແມັດ.
 
ໃນການເຊັນ
MOU ສຶກສາຄວາມເປັນໄປໄດ້ ແມ່ນບາດກ້າວທຳອິດຂອງການລົງທຶນ ເຊິ່ງຜູ້ລົງທຶນຈະປະຕິບັດ 3 ວຽກຫລັກຄື: ສຳຫລວດ-ອອກແບບ ແລະ ຄິດໄລ່ປະເມີນລາຄາ, ໂດຍນຳໃຊ້ມາດ ຕະຖານເຕັກນິກ ຂອງກະຊວງໂຍທາທິການ ແລະຂົນສົ່ງ, ສ້າງບົດວິພາກເສດຖະກິດ-ເຕັກນິກ, ສ້າງບົດວິເຄາະເບື້ອງຕົ້ນ ງບົດປະເມີນຜົນກະທົບຕໍ່ສັງຄົມ; ບົດປະເມີນຜົນກະທົບ ຕໍ່ສິ່ງແວດລ້ອມ; ແຜນການຄຸ້ມຄອງ ແລະ ຕິດຕາມກວດກາ ດ້ານສິ່ງແວດລ້ອມ ແລະ ແຜນການຄຸ້ມຄອງ ແລະ ຕິດຕາມກວດກາດ້ານສັງຄົມ.

 
ທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.