Header Ads

ສະມາຄົມທຸລະກິດທ່ອງທ່ຽວແຂວງຈໍາປາສັກແລະຣາຊະອານາຈັກໄທເພີ່ມທະວີການຮ່ວມມື




ວັນທີ 5 ພະຈິກ 2017 ຜ່ານມາ ຢູ່ທີ່ໂຮງແຮມຈໍາປາສັກແກຣນ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈໍາປາສັກຮ່ວມກັບ ສະມາຄົມທຸລະກິດທ່ອງທ່ຽວຂອງແຂວງ ໄດ້ຈັດພິທີພົບປະແລກປ່ຽນດ້ານທຸລະກິດທ່ອງທ່ຽວ ລະຫວ່າງ ສະມາຄົມທຸລະກິດທ່ອງທ່ຽວແຂວງຈໍາປາສັກ ແລະ ສະມາຄົມທຸລະກິດທ່ອງທ່ຽວແຫ່ງຣາຊະອານາຈັກໄທ ໂດຍໃຫ້ກຽດເຂົ້າຮ່ວມຂອງທ່ານ ນາງ ມາລາ ຈັນທະລາມ ຮອງຫົວໜ້າພະແນກ ຖວທ ແຂວງ ຜູ້ຊີ້ນໍາວຽກງານທ່ອງທ່ຽວ. ທ່ານ ສຸພາລຶກ ສຸຣາງກຸນ ນາຍົກສະມາຄົມທຸລະກິດທ່ອງທ່ຽວແຫ່ງຣາຊະອານາຈັກໄທ, ມີປະທານສະມາຄົມທຸລະກິດທ່ອງທ່ຽວແຂວງຈໍາປາສັກ, ແຂກຖືກເຊີນ ແລະ ບັນດາຫົວໜ່ວຍທຸລະກິດທ່ອງທ່ຽວຂອງ 2 ຝ່າຍເຂົ້າຮ່ວມ.

ທ່ານ ນາງ ມາລາ ຈັນທະລາມ ໄດ້ຍົກໃຫ້ເຫັນການພັດທະນາດ້ານການທ່ອງທ່ຽວໃນ 4 ກຸ່ມການທ່ອງທ່ຽວ, ການສົ່ງເສີມການຈັດງານເທດສະການ, ງານບຸນປະເພນີຂອງເຜົ່າຕ່າງໆ, ການສ້າງກິດຈະກໍາອື່ນໆເພື່ອໂຄສະນາການທ່ອງທ່ຽວ ແລະ ພາຍໃນແຂວງປະກອບມີແຫຼ່ງທ່ອງທ່ຽວທາງທໍາມະຊາດ, ປະຫວັດສາດ, ວັດທະນະທໍາ ລວມທັງໝົດ 216 ແຫ່ງ. ໃນໄລຍະ 9 ເດືອນ ຜ່ານມາສາມາດດຶງດູດນັກທ່ອງທ່ຽວທີ່ເຂົ້າມາທ່ຽວແຂວງຈໍາປາສັກ ຈໍານວນທັງໝົດ 5 ແສນກ່ວາຄົນ, ໃນນັ້ນ ນັກທ່ອງທ່ຽວພາຍໃນ 3 ແສນກ່ວາຄົນ, ນັກທ່ອງທ່ຽວສາກົນ 1 ແສນກ່ວາຄົນ, ນັກທ່ອງທ່ຽວຊາຍແດນ 70 ພັນກ່ວາຄົນ, ທຽບໃສ່ໄລຍະດຽວເພີ່ມຂຶ້ນ 56%, ທຽບໃສ່ແຜນການປະຕິບັດໄດ້ 71 % (ແຜນການ 7 ແສນກ່ວາຄົນ). ນອກນີ້, ພາຍໃນແຂວງມີໂຮງແຮມ, ເຮືອນພັກ, ຣີສອດ, ຮ້ານອາຫານ, ໂຮງແຮມຂຽວອາຊຽນ ແລະ ເຮືອນພັກແຮມປະຊາຊົນມາດຕະຖານອາຊຽນ ຫຼື ໂຮມສະເຕອາຊຽນ (HomeStay) ໄວ້ຄອຍບໍລິການນັກທ່ອງທ່ຽວຢ່າງພຽງພໍ.

ທ່ານ ສຸພາລຶກ ສຸຣາງກຸນ ກ່າວວ່າ: ຈຸດປະສົງໃນການເດີນທາງມາແຂວງຈໍາປາສັກເທື່ອນີ້ກໍ່ເພື່ອສຶກສາເສັ້ນທາງການທ່ອງທ່ຽວທີ່ມີການພັດທະນາ, ການບໍລິການທີ່ມີການຂະຫຍາຍຕົວຂຶ້ນເລື້ອຍໆ ແລະ ເປັນການເພີ່ມທະວີການພົວພັນ, ການຮ່ວມມືລະຫວ່າງນັກທຸລະກິດທ່ອງທ່ຽວຂອງ 2 ຝ່າຍ. ການພົບປະໃນຄັ້ງນີ້ຈະເຮັດໃຫ້ທຸລະກິດການທ່ອງທ່ຽວລະຫວ່າງ 2 ຝ່າຍໄດ້ຮັບການພັດທະນາກ້າວຂຶ້ນ.
ໂອກາດນີ້, ນັກທຸລະກິດແຕ່ລະກຸ່ມຂອງທັງ 2 ຝ່າຍກໍ່ໄດ້ມີການພົບປະແລກປ່ຽນບົດຮຽນໃນການເຄື່ອນໄຫວທຸລະກິດ ເຊິ່ງກັນ ແລະ ກັນ ເພື່ອແນໃສ່ຈັບຄູ່ທຸລະກິດຮ່ວມກັນ ທັງເປັນການເຮັດໃຫ້ການດໍາເນີນທຸລະກິດມີຄວາມເຂັ້ມແຂງ.
ຂ່າວ: ຈັນນທະວີສັກ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.