Header Ads

ປະທານສູນກາງ ແນວລາວສ້າງຊາດ ຕ້ອນຮັບ ຜູ້ແທນເຊື້ອຊາດລາວ



ໃນ​ວັນ​ທີ 9 ພະຈິກ 2017 ​ທີ່​ສູນ​ກາງ​ແນວ​ລາວ​ສ້າງ​ຊາດ ທ່ານ ​ໄຊ​ສົມ​ພອນ ພົມ​ວິຫານ ປະທານ​ສູນ​ກາງ​ ແນວ​ລາວ​ສ້າ​ງຊາດ ​ໄດ້​ຕ້ອນຮັບ​ຄະນະ​ຜູ້​ແທນ​ ຄົນ​ເຊື້ອ​ຊາດ​ລາວ ທີ່ຢູ່​ປະ​ເທດສະຫະລັດ ອາ​ເມ​ລິ​ກາ​ ເກືອບ 50 ​ທ່ານ, ນໍາພາ​​ໂດຍ​ ທ່ານ ຄໍາ​ຜຸຍ ມະນີ​ແສງ ​ໃນ​ໂອກາດ​ ມາ​​ເຄື່ອນ​ໄຫວຢ້ຽມຢາມ ສປປ ລາວ​ ແຕ່​ວັນ​ທີ 3-11 ພະຈິກ​ ​ແລະ ​ເຂົ້າ​ຮ່ວມ​ການ​ແຂ່ງຂັນ ​ກິລາກອ໊ຟ ມິດຕະພາບ ຊິງ​ຂັນ​ທ່ານ​ລັດຖະມົນຕີ ​ກະຊວງ​ການ​ຕ່າງປະ​ເທດ. ​ໂດຍ​ມີ ທ່ານ ສຸ​ວັນນາ ຜຸຍ​ຍະ​ວົງ ຫົວໜ້າ​ກົມ​ພົວພັນ​ ຄົນ​ເຊື້ອ​ຊາດ​ລາວ​ ຢູ່​ຕ່າງປະ​ເທດ, ກະຊວງ​ການ​ຕ່າງປະ​ເທດ, ມີ​​ຮອງ​ປະທານ​ສູ​ນກາງ​ ແນວ​ລາວ​ສ້າງ​ຊາດ, ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ ​ເຂົ້າ​ຮ່ວມ.

​ໃນ​ໂອກາດດັ່ງກ່າວ, ທ່ານ ​ໄຊ​ສົມ​ພອນ ພົມ​ວິຫານ ​ໄດ້ກ່າວ​ສະ​ແດງ​ ຄວາມ​ຍິນ​ດີ​ຕ້ອນຮັບ ​ພີ່ນ້ອງ​ຄົນ​ເຊື້ອ​ຊາດ​ລາວ ​ຢູ່ ສ ອາ​ເມ​ລິ​ກາ ທີ່​ໄດ້​ເດີນທາງ​ ມາ​ເຄື່ອນ​ໄຫວ​ຢ້ຽມຢາມ, ຊຶ່ງ​ເປັນ​ກິດຈະ​ກໍາ​ທີ່​ມີ​ ຄວາມ​ໝາຍ​ຄວາມສຳຄັນ ລະຫວ່າງ​ເຊື້ອ​ຊາດ​ລາວ ​ຢູ່ອາ​ເມ​ລິ​ກາ, ຊຶ່ງ​ຍາມ​ໃດ ​ພັກ-ລັດຖະບານ ກໍ​ຍັງ​ເປັນ​ຫ່ວງ​ເປັນ​ໄຍສະ​ເໝີ ​ເຖິງ​ວ່າ​ຈະ​ໄປ​ຢູ່​ໃສ, ປະ​ເທດ​ໃດ ກໍ​ບໍ່​ສາມາດ​ຕັດ​ແຍກ​ອອກ​ຈາກ​ ວົງ​ຄະນະ​ຍາດ​ເຊື້ອ​ຊາດ​ລາວ​ເຮົາ​ໄດ້. ພ້ອມ​ນີ້​, ທ່ານ​ປະທານ​ສູນ​ກາງ​ແນວລາວ ຍັງ​ໄດ້​ໂອ້​ລົມ​ຕໍ່​ ຄະນະ​ຜູ້​ແທນ​ຄົນ​ເຊື້ອ​ຊາດ​ລາວ​ ຢູ່​ຕ່າງປະ​ເທດ, ​ໂດຍ​ຍົກ​ໃຫ້ເຫັນ ການ​ສ້າງສາພັດທະນາ ​ປະ​ເທດ​ຊາດ ​ແລະ ການ​ພັດທະນາ ເສດຖະກິດ-ສັງຄົມ ​ໃນ​ການ​ນໍາພາ​ປະ​ເທດ​ຊາດ ​ໃຫ້​ຫລຸ​ດພົ້ນ​ອອກ​ຈາກ​ ສະຖານະ​ພາບ​ ຄວາມ​ດ້ອຍ​ພັດທະນາ​ ໃນ​ປີ 2020 ກ້າວ​ໄປ​ສູ່​ປະ​ເທດ ​ກໍາລັງ​ພັດທະນາ ​ທີ່​ມີ​ລາຍ​ຮັບ​ປານ​ກາງ, ສູງ ຕາມ​ທິດ​ພັດທະນາ​ສີຂຽວ ​ແລະ ຍືນ​ຍົງ, ​ແຜນ​ຍຸດ​ທະ​ສາດ​ ເພື່ອ​ນໍາພາ​ປະ​ເທດ​ຊາດ ​ຮອດ​ປີ 2030.

​ໃນ​ໂອກາດດຽວ​ກັນ, ​ທ່ານ ​ໄຊ​ສົມ​ພອນ ພົມ​ວິຫານ ຍັງ​ໄດ້​ຮຽກຮ້ອງ​ ພີ່ນ້ອງ​ຊາວ​ລາວ​ ຢູ່​ຕ່າງປະ​ເທດ ຈົ່ງ​ສືບ​ທອດ​ມູນ​ເຊື້ອ​​ ແຫ່ງ​ຄວາມ​ສາມັກຄີ​ຮັກ​ແພງ​ ທີ່​ບັນພະບຸລຸດ​ໄດ້​ສ້າງ​ມາ ແລະ ສາມາດ​ປະກອບ ສ່ວນ ​ເຂົ້າ​ໃນ​ພາລະກິດ​ສ້າງສາ​ພັດທະນາ​ ບ້ານ​ເກີດ​ເມືອງ​ນອນ​ຂອງ​ຕົນ​ ດ້ວຍ​ຫລາຍ​ວິທີ ​ເຊັ່ນ: ການ​ນໍາ​ເອົາ ​ສະພາບ​ຄວາມ​ເປັນ​ຈິງ​ ທີ່​ທ່ານ​ໄດ້​ພົບ​ເຫັນ​ໃນ ສປປ ລາວ ​ໄປ​ເຜີຍ​ແຜ່ ຫລື ສ້າງ​ຄວາມ​ເຂົ້າ​ໃຈ ​ໃຫ້​ແກ່​ເພື່ອນ​ມິດ ບໍ່​ວ່າ​ຈະ​ເປັນ​ຊາວ​ລາວ ກໍ​ຄື​ ຊາວ​ຕ່າງ​ປະ​ເທດ, ຈົ່ງ​ສືບ​ຕໍ່​ສ້າງ​ເງື່ອນ​ໄຂ​ ໃຫ້​ພີ່ນ້ອງ​ລາວ​ຢູ່​ຕ່າງປະ​ເທດ​ ໄດ້​ເຕົ້າ​ໂຮມ​ເຂົ້າກັນ​ ດ້ວຍ​ຮູບ​ການ​ໃດ​ໜຶ່ງ​ ທີ່​ເໝາະ​ສົມ ​ແລະ ຖືກຕ້ອງ; ​ສ້າງ​ເງື່ອນ​ໄຂ​ຕິດ​ຕໍ່​ພົວພັນ ​ແລະ ​ແລກປ່ຽນ​ຄວາມ​ຄິດ​ເຫັນ​ ລະຫວ່າງ ຊຸມ​ຊົນ​ຊາວ​ລາວ ຢູ່​ຕ່າງປະ​ເທດ ກັບ ສປປ ລາວ ​ໃຫ້​ຫລາຍ​ຂຶ້ນ. ນອກ​ນັ້ນ, ​ກໍ​ສ້າງ​ກົນ​ໄກ ​ແລະ ວິທີການ​ປະສານ​ງານ​ ລະຫວ່າງ​ຊຸມ​ຊົນ​ລາວ ​ຢູ່​ຕ່າງປະ​ເທດກັບ​ບັນດາ​ອົງການ​ຈັດ​ຕັ້ງ​ ທີ່​ກ່ຽວຂ້ອງ​ພາຍ​ໃນ​ປະ​ເທດ. ພ້ອມ​ກັນ​ ສ້າງ​ບັນດາ​​ແຜນ​ງານ ຫລື ​ໂຄງການ​ຮ່ວມ​ມື​ຊ່ວຍ​ເຫລືອ​ຕ່າງໆ​ ຕາມ​ສະພາບ​ເງື່ອນ​ໄຂ​ຕົວ​ຈິງ.

ຂ່າວ-ພາບ:ຂັນ​ໄຊ ( ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.