Header Ads

ພິທີເຊັນສັນຍາໂຄງການກໍ່ສ້າງສູນຄົ້ນຄວ້າ, ວິໄຈຢາງພາລາລາວ ຢູ່ນະຄອນຫຼວງວຽງຈັນ



ພິທີເຊັນສັນຍາ ໂຄງການ ຮ່ວມມືສ້າງສູນຄົ້ນຄວ້າ, ວິໄຈຢາງພາລາລາວ ລະຫວ່າງ ທ່ານ ຄຳພັນ ເໝືອນສິດທິດາ ຫົວໜ້າຫ້ອງການ ກະຊວງກະສິກໍາ ແລະ ປ່າໄມ້ ຕາງໜ້າຝ່າຍລາວ ແລະ ຕາງໜ້າຝ່າຍຈີນໂດຍ ທ່ານ Chen Zu Jun ປະທານກຸ່ມບໍລິສັດພັດທະນາກະສິກໍາຢຸນນານ ຈໍາກັດ ສປ ຈີນ. ໄດ້ຈັດຂຶ້ນໃນຕອນເຊົ້າວັນທີ 15 ພະຈິກນີ້, ຢູ່ຫ້ອງການກະຊວງ ກະສິກໍາແລະປ່າໄມ້ ນະຄອນຫຼວງວຽງຈັນ. ເຊິ່ງຈັດໂດຍ ກະຊວງກະສິກໍາແລະປ່າໄມ້ ສປປ ລາວ ກັບ ກຸ່ມບໍລິສັດ ພັດທະນາກະສິກໍາຢູນນານ ຈຳກັດ ສປ ຈີນ. ໂດຍມີບັນດາຫົວໜ້າກົມ, ຫົວໜ້າສະຖາບັນ, ພາກສ່ວນທີ່ກ່ຽວຂ້ອງທັງສອງຝ່າຍ ແລະ ແຂກຮັບເຊີນເຂົ້າຮ່ວມເປັນພິຍານ.



ທ່ານ ສົມບູນ ໄຊຍະວົງ ຮອງຫົວໜ້າສູນຄົ້ນຄວ້າ ວິທະຍາສາດປ່າໄມ້ນ້ຳຊວງ ກ່າວວ່າ: ໂດຍອີງຕາມຂໍ້ຕົກລົງຂອງທ່ານລັດຖະມົນຕີກະຊວງກະສິກໍາແລະປ່າໄມ້ ສະບັບເລກທີ 4350/ກປ, ລົງວັນທີ 1 ພະຈິກ 2017. ຕັ້ງຢູ່ບ້ານໂນນສະອາດ, ເມືອງໄຊທານີ, ນະຄອນຫຼວງວຽງຈັນ ( ເຂດບໍລິເວນໜອງນ້ຳດົງໝາກຄາຍ) ເພື່ອເປັນເນື້ອທີ່ປຸກສ້າງອາຄານຈໍານວນ 5 ຫຼັງ, ປະກອບດ້ວຍອາຄານຫ້ອງການ ແລະ ຫ້ອງຝຶກອົບຮົມ 1 ຫຼັງ, ອາຄານຫ້ອງທົດລອງ 2 ຫຼັງ ແລະ ອາຄານຫໍພັກ 2 ຫຼັງ, ມູນຄ່າການກໍ່ສ້າງ10.000.000 ໂດລາສະຫະລັດ. ໄລຍະທີ 1 ແມ່ນຈະເລີ່ມປີ 2018-2020 ເປັນໄລຍະກໍ່ສ້າງຕຶກອາຄານແລະກໍ່ສ້າງພະນັກງານວິຊາການລາວ.ສ່ວນໄລຍະທີ 2, ແມ່ນຈະເລີ່ມປີ 2021-2051 ເປັນໄລຍະການຮ່ວມມືດ້ານວິຊາການ. ໂຄງການດັ່ງກ່າວປະກອບມີຫ້ອງວິໄຈຢາງພາລາ, ຫ້ອງວິໄຈພືດກະສິກໍາ, ຫ້ອງຝຶກອົບຮົມ,ແລະ ອື່ນໆ. ນອກນີ້, ຍັງຈະເປັນບ່ອນຝຶກອົບຮົມໃຫ້ແກ່ວິຊາການແລະພະນັກງານລາວ, ໄດ້ປ່ຽນປະສົບການ ແລະ ບົດຮຽນຈາກວິຊາການ ແລະ ຊ່ຽວຊານ ສປ ຈີນ ໃນການຜະລິດ ແລະ ການວິໄຈຄຸນນະພາບ ແລະ ການກໍານົດມາດຕະຖານຢາງພາລາ ແລະ ພືດກະສິກໍາ ພ້ອມທັງອອກໃບຢັ້ງຢືນຜົນຂອງການວິໄຈດັ່ງກ່າວ. 


ທ່ານ Chen Zu Jun ປະທານກຸ່ມບໍລິສັດພັດທະນາກະສິກໍາຢຸນນານ ຈໍາກັດ ສປ ຈີນ ກ່າວວ່າ: ກຸ່ມບໍລິສັດພັດທະນາກະສິກໍາຢຸນນານ ໄດ້ສ້າງຕັ້ງຂຶ້ນໃນປີ 1951, ເປັນໜຶ່ງໃນບໍລິສັດກະສິກໍາທີ່ໃຫຍ່ຂອງແຂວງຢຸນນານ, ມີເນື້ອທີ່ປູກຢາງພາລາຈໍານວນ 33,333 ເຮັກຕາ, ມີໂຮງງານປຸງແຕ່ງຢາງພາລາຈໍານວນ 35 ແຫ່ງ, ຢູ່ແຂວງຢຸນນານ ແລະ ນະຄອນຫຼວງປັກກິ່ງ, ຊຽງໄຮ, ແຂວງຊານຊີ, ແຂວງຊານຕົງ ແລະ ປະເທດທີ່ຢູ່ອ້ອມຂ້າງເຊັ່ນ: ມຽນມາ. ສໍາລັບສປປ ລາວ ມີສາຂາບໍລິສັດປະຈໍາຢູ່ແຂວງຫຼວງນໍ້າທາ, ບໍ່ແກ້ວ, ຫຼວງພະບາງ, ແຂວງໄຊຍະບູລີ.


ທີ່ມາ: ຊີອາໄອ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.