Header Ads

ທ່ານ ຈັນສີ ໂພສີຄໍາ ໂອ້ລົມພະນັກງານການນໍາແຂວງຈໍາປາສັກ




ແຂວງຈໍາປາສັກ : ວັນທີ 3 ພະຈິກ 2017 ຢູ່ທີ່ຫ້ອງວ່າການປົກຄອງແຂວງຈໍາປາສັກ ທ່ານ ປອ. ບຸນຖອງ ດີວິໄຊ ກໍາມະການສູນກາງພັກ ເຈົ້າແຂວງຈໍາປາສັກ ພ້ອມດ້ວຍການນໍາຂອງແຂວງ ໄດ້ໃຫ້ກຽດຕ້ອນຮັບທ່ານ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ ໃນໂອກາດມາເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ແຂວງຈໍາປາສັກ.

ທ່ານ ປອ. ບຸນຖອງ ດີວິໄຊ ໄດ້ລາຍງານສະພາບການຊີ້ນໍາ-ນໍາພາລວມ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນ 9 ເດືອນ 2017 ຜ່ານມາໂດຍສັງເຂບ ເຊິ່ງສາມາດນໍາພາຈັດຕັ້ງປະຕິບັດວຽກງານແຕ່ລະດ້ານຢ່າງມີຜົນສໍາເລັດ ເປັນຕົ້ນ: ໄດ້ເຮັດໃຫ້ເສດຖະກິດຂອງແຂວງ ສືບຕໍ່ຂະຫຍາຍຕົວດ້ວຍຈັງຫວະທີ່ໝັ້ນທ່ຽງ, ຄາດຄະເນໝົດປີ 2017 ຂະຫຍາຍຕົວໃນລະດັບ 8,11%, ສ້າງມູນຄ່າລວມຍອດຜະລິດຕະພັນພາຍໃນ (GDP) ໄດ້ປະມານ 14.106 ຕື້ກີບ, ສະເລ່ຍຕໍ່ຫົວຄົນໄດ້ 19 ລ້ານ ກ່ວາກີບຕໍ່ຄົນ. ດ້ານໂຄງປະກອບເສດຖະກິດຫັນປ່ຽນທີ່ຕັ້ງໜ້າ: ຂະແໜງກະສິກໍາ-ປ່າໄມ້ກວມ 26%, ຂະ ແໜງອຸດສາຫະກໍາກວມ 35% ແລະ ຂະແໜງບໍລິການກວມ 35% ຂອງ GDP ແລະ ໃນ 9 ເດືອນຜ່ານມາ ມູນຄ່າການສົ່ງອອກຜົນຜະລິດສິນຄ້າທັງໝົດບັນລຸໄດ້ 193 ລ້ານກ່ວາໂດລາສະຫະລັດ, ທຽບໃສ່ໄລຍະດຽວກັນເພີ່ມຂຶ້ນ 19%, ທຽບໃສ່ແຜນການປີປະຕິບັດໄດ້ 92%. 

ໂອກາດນີ້, ທ່ານ ຈັນສີ ໂພສີຄໍາ ກໍ່ໄດ້ໃຫ້ກຽດໂອ້ລົມຕໍ່ພະນັກງານການນໍາຂອງແຂວງຈໍາປາສັກ ໂດຍໄດ້ເນັ້ນໜັກຫຼາຍບັນຫາເພື່ອແນໃສ່ໃຫ້ແຂວງຈໍາປາສັກມີການພັດທະນາວ່ອງໄວ, ມີຄວາມເຂັ້ມແຂງຮອບດ້ານ, ມີຄວາມສະຫງົບທົ່ວສັງຄົມ ເປັນຕົ້ນ: ໃຫ້ສືບຕໍ່ຜັນຂະຫຍາຍຜົນສໍາເລັດບັ້ນດໍາເນີນຊີວິດການເມືອງປັບປຸງປົວແປງພັກໃຫ້ເກີດຜົນປະໂຫຍດໃນຄະນະພັກແຕ່ລະຂັ້ນ. ເອົາໃຈໃສ່ປັບປຸງວຽກງານກໍ່ສ້າງພັກໃຫ້ມີຄວາມເຂັ້ມແຂງ ແລະ ໜັກແໜ້ນ. ເອົາໃຈໃສ່ກ່ຽວກັບການເຄື່ອນໄຫວຂອງພັກແມ່ນໃຫ້ຖືເອົາປະຊາຊົນເປັນກົກ, ຕິດພັນກັບມະຫາຊົນ ເພື່ອເຮັດໃຫ້ກໍາລັງແຮງຂອງພັກເຕີບໃຫຍ່ເຂັ້ມແຂງ. ພັກຕ້ອງຖືເອົາຄວາມສາມັກຄີເປັນປຶກແຜ່ນເພື່ອເປັນກໍາລັງແຮງຂອງຜົນສໍາເລັດໃນການຊີ້ນໍາ-ນໍາພາ. ເອົາໃຈໃສ່ໃນການສັບຊ້ອນພະນັກງານເຂົ້າໃສ່ຕໍາແໜ່ງງານໃຫ້ແທດເໝາະກັບມາດຖານ, ເງື່ອນໄຂຕາມຄວາມເປັນຈິງ. ເອົາໃຈໃສ່ສ້າງບ້ານພັດທະນາເພື່ອປົກປັກຮັກສາໝາກຜົນຂອງການປະຕິວັດໃຫ້ມີການພັດທະນາກ້າວຂຶ້ນໃນແຕ່ລະດ້ານ. ຮັບປະກັນຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍຂອງສັງຄົມ. ເອົາໃຈໃສ່ສ້າງໂຄງປະກອບເສດຖະກິດໃນດ້ານກະສິກໍາ, ອຸດສາຫະກໍາ, ການຄ້າໃຫ້ມີຄວາມເຂັ້ມແຂງ. ອອກແຮງສ້າງຊັບພະຍາກອນມະນຸດໃຫ້ມີຄຸນນະພາບເທົ່າທຽມກັບປະເທດໃກ້ຄຽງແລະ ພາກພື້ນ.


ຂ່າວ-ພາບ: ຈັນທະວີສັກ (ຈໍາປາໃໝ່)
------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.