Header Ads

ຄະນະສານອາຍາສານປະຊາຊົນຂັ້ນຕົ້ນ ນະຄອນຫຼວງວຽງຈັນຕັດສິນປະຫານຊີວິດ ຜູ້ຄ້າຂາຍຢາເສບຕິດ




ນະຄອນຫຼວງວຽງຈັນ : ໃນວັນທີ 2 ພະຈິກ 2017 ຜ່ານມານີ້, ຄະນະສານອາຍາສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ພິຈາລະນາສຳນວນຄະດີ ທ້າວ ເມັງວ່າງ ອາຍຸ 29 ປີ ພັກເຊົາຢູ່ບ້ານຕານມີໄຊ ເມືອງໄຊທານີ ຄະນະຫຼວງວຽງຈັນ ທີ່ເຈົ້າໜ້າທີ່ຕຳຫຼວດກັກຕົວໃນປີ 2016 ພ້ອມຂອງກາງຢາບ້າ 165.000 ເມັດ ແລະ ເຮໂຣອິນ 58 ແທ່ງ ເຊິ່ງຜູ້ກ່ຽວອ້າງວ່າ: ຂາຍຢາບ້າເພື່ອຜ່ອນລົດ, ຜ່ານການພິຈາລະນາສຳນວນຄະດີ ບວກກັບຫຼັກຖານ ຄະນະສານເຫັນຄວນຕັດສິນປະຫານຊີວິດ.

ໄອຍະການປະຊາຊົນ ໄດ້ຖະແຫຼງການກະທຳຜິດຂອງຈຳເລີຍວ່າ: ທ້າວ ເມັງວ່າງ ໄດ້ເລີ່ມເຄື່ອນໄຫວຊື້-ຂາຍຢາເສບຕິດ ມາແຕ່ປີ 2014. ໃນເບື້ອງຕົ້ນຊື່ນຳນາງ ວ່າງ ອາຍຸປະມານ 35 ປີ ບໍ່ຮູ້ບ່ອນຢູ່ ນັດຈຸດຊື້ຂາຍແຕ່ລະຄັ້ງແມ່ນຢູ່ຕໍ່ໜ້າໂຮງໝໍ 150 ຕຽງ ຊື້ຄັ້ງລະ 20-50 ເມັດ, 1 ອາທິດຈະຊື້ປະມານ 1-2 ຄັ້ງ, ມາເດືອນເມສາ 2015 ໄດ້ຊື້ຢາບ້ານຳຄົນຈີນ ນັດຈຸດຊື້-ຂາຍຢູ່ເຂດປະຕູໄຊ ຊື້ຄັ້ງລະ 3-6 ມັດ (ມັດລະ 2.000 ເມັດ) ຢາບ້າທີ່ຊື້ມາແມ່ນໄດ້ໄປຂາຍໃຫ້ທ້າວ ຄາມ, ທ້າວ ຄຳ ແລະ ພັກພວກຄົນອື່ນໆ ທີ່ຮ່ວມຂະບວນນຳກັນ ຢູ່ເຂດເສັ້ນທາງ 450 ປີ, ເງິນທີ່ໄດ້ຈາກການຂາຍຢາເສບຕິດນັ້ນ ແມ່ນນຳໄປຈ່າຍຄ່າຜ່ອນລົດເກັງຍີ່ຫໍ່ ເກຍເຊີລາໂຕ ສີດໍາໝາຍເລກທະບຽນ ກສ 9841 ກຳແພງນະຄອນ, ມາເດືອນມັງກອນ 2016 ນາງ ປ່າຢ່າ (ເມຍ) ອາຍຸ 19 ປີ ໄດ້ມາຢູ່ນຳຈຳເລີຍຢູ່ຫ້ອງເຊົ່າ ບ້ານຕານມີໄຊ, ຮອດເດືອນພຶດສະພາ ຈຳເລີຍໄດ້ເອົາຢາບ້າຈຳນວນ 3 ມັດ ມາໃຫ້ເມຍຮັກສາໄວ້ໃນຫ້ອງເຊົ່າ ປະມານ 2-3 ມື ຈຳເລີຍໄດ້ເອົາຢາບ້າໄປຂາຍ, ຕໍ່ມາຈຳເລີຍໄດ້ໄປບຸນກີນຈຽງຢູ່ບ້ານໄຊຈະເລີນ ເມືອງຫ້ວຍຊາຍ ແຂວງບໍ່ແກ້ວ ໄດ້ຮູ້ຈັກກັບທ້າວ ຢົງທໍ່ ອາຍຸປະມານ 40 ປີ ຢູ່ແຂວງຊຽງລາຍ ປະເທດໄທ ທັງສອງໄດ້ປຶກສາກັນກ່ຽວກັບການຄ້າຂາຍຢາເສບຕິດ ພ້ອມທັງແລກປ່ຽນເບີໂທຕິດຕໍ່ກັນໄວ້.

ວັນທີ 15 ພຶສະພາ 2016 ທ້າວ ຢົງທໍ່ ໄດ້ໂທລະສັບມາຫາບອກວ່າ ຈະມີຄົນເອົາເຮໂຣອິນຈຳນວນ 80 ແທ່ງ ແລະ ຢາບ້າຈຳນວນ 78 ມັດ ໄປສົ່ງໃຫ້ ພາຍຫຼັງໄດ້ຮັບແລ້ວ ແມ່ນໃຫ້ເອົາຢາເຮໂຣອິນຈຳນວນ 22 ແທ່ງ ແບ່ງໃສ່ຖົງຕ່າງຫາກ ເພາະຈະໃຫ້ທ້າວ ຕົງ ໄປເອົາມາຂາຍ, ພາຍຫຼັງລົມກັນແລ້ວໄດ້ປະມານ 3 ຊົ່ວໂມງ ທ້າວ ຢົງທໍ່ ໄດ້ບອກຈຸດຮັບສົ່ງຢາເສບຕິດຈຳນວນດັ່ງກ່າວ ຢູ່ເຂດບ້ານສີເກີດ ເມືອງນາຊາຍທອງ ໂດຍໃຫ້ຈຳເລີຍຈອດລົດເກັງ ສີດຳ ພ້ອມທັງເອົາກະແຈລົດປະໄວ້ໃນລົດ ແລ້ວອອກຈາກລົດໄປຢູ່ບ່ອນອື່ນລໍຖ້າ ເພາະຈະມີຄົນຂັບລົດໄປຮັບເອົາ ແລ້ວຈະນຳມາໄວ້ບ່ອນເກົ່າ, ໃນຂະນະທີ່ຈຳເລີຍລໍຖ້າຢູ່ນັ້ນ ມີລົດວີໂກ້ສີຂາວ ມາຈອດຂ້າງລົດຂອງຈຳເລີຍ ມີຊາຍຄົນໜຶ່ງລົງລົດມາແລ້ວຂັບລົດເກັງຂອງຈຳເລີຍໄປບ້ານຜາງແຫ້ງ ເມືອງນາຊາຍທອງ ປະມານ 10 ນາທີ ກໍ່ກັບມາຈອດໄວ້ບອ່ນເກົ່າ ເມື່ອຈຳເລີຍໄຂປະຕູລົດ ພົບຢາເສບຕິດຈຳນວນດັ່ງກ່າວປະໄວ້ທີ່ເບາະຫຼັງ ຈຶ່ງກັບມາຫ້ອງເຊົ່າ ແລ້ວເກັບຮັກສາໄວ້ໃນຫ້ອງນອນ.

ຮອດເວລາ 19:00 ໂມງຂອງວັນດຽວກັນ, ທ້າວ ຢົງທໍ ໂທມາບອກວ່າ: ທ້າວ ຕົງ ຈະໄປເອົາຢາເຮໂຣອິນນຳຢູ່ຫ້ອງເຊົ່າ, ໄດ້ປະມານ 30 ນາທີ ທ້າວ ຕົງ ຂັບລົດເກັງສີຂາວ ມາຮັບເອົາຢາເຮໂຣອິນນຳຈຳເລີຍ ຈຳນວນ 2 ແທ່ງ ແລ້ວຂັບອອກໄປ, ພາຍຫຼັງທ້າວ ຕົງ ອອກໄປແລ້ວ ຈຳເລີຍໄດ້ເອົາຢາເຮໂຣອິນ ຈຳນວນ 1 ແທ່ງ ອອກມາຊຸກເຊື່ອງໄວ້ໃນເບາະລົດບ່ອນຄົນຂັບ ເພື່ອຈະເອົາໄປໃຫ້ຜູ້ຊື້ເບິ່ງຕົວຢ່າງ. ໃນຂະນະນັ້ນ, ມີເຈົ້າໜ້າທີ່ເຂົ້າມາກວດຄົ້ນລົດ ແລະ ຫ້ອງພັກ ພົບຢາບ້າຈຳນວນ 78 ມັດ ແລະ ຢາເຮໂຣອິນ ຈຳນວນ 58 ແທ່ງ ຈຶ່ງໄດ້ກັກຕົວພ້ອມຂອງກາງ ມາດຳເນີນຄະດີ. 


ພາບ- ຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.