Header Ads

ທ່ານນາຍົກລັດຖະມົນຕີ ຕ້ອນຮັບຊາວໜຸ່ມເດີນທະເລອາຊຽນ-ຍີ່ປຸ່ນ







ໃນຕອນບ່າຍ ຂອງວັນທີ 17 ພະຈິກ 2017 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຄະນະຊາວໜຸ່ມເດີນທະເລອາຊຽນ-ຍີ່ປຸ່ນ ເຊິ່ງນຳໂດຍທ່ານ Ken ichi KOMAGATA ຜູ້ບໍລິຫານໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ທີ່ໄດ້ເດີນທາງມາເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 17-19 ພະຈິກ 2017.



ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ເຊິ່ງເປັນໂຄງການທີ່ດີ, ເຮັດໃຫ້ຊາວໜຸ່ມບັນດາປະເທດອາຊຽນ ໄດ້ມີການແລກປ່ຽນບົດຮຽນເຊິ່ງກັນ ແລະ ກັນ ໃນດ້ານຕ່າງໆ ເປັນຕົ້ນ ວັດທະນະທຳ, ການພັດທະນາເສດຖະກິດ-ສັງຄົມ, ການທ່ອງທ່ຽວ ແລະ ອື່ນໆ ພ້ອມທັງ ຍົກໃຫ້ເຫັນຄວາມແຕກຕ່າງລະຫວ່າງ ເງື່ອນໄຂການດຳລົງຊີວິດ ຂອງຊາວໜຸ່ມລາວໃນເມື່ອກ່ອນ ກັບປະຈຸບັນ ໂດຍສະເພາະ ກ່ອນປີ 1975 ແມ່ນຢູ່ໃນເງື່ອນໄຂສົງຄາມ, ມີຄວາມສ່ຽງຕໍ່ການດຳລົງຊີວິດ, ໂອກາດໃນການພັດທະນາຕົນເອງ ແມ່ນຈຳກັດ. ສ່ວນປະຈຸບັນ ແມ່ນມີຄວາມພາກພູມໃຈຫຼາຍ ທີ່ເຫັນຊາວໜຸ່ມສ່ວນໃຫຍ່ໃນທົ່ວໂລກ ໄດ້ດໍາລົງຊີວິດ, ເຄື່ອນໄຫວວຽກງານ, ພັດທະນາຕົນເອງ ແລະ ປະເທດຊາດ ພາຍໃຕ້ເງື່ອນໄຂສັນຕິພາບ, ທັງມີສ່ວນຮ່ວມ ໃນການຊຸກຍູ້ສົ່ງເສີມໃຫ້ຊາວໜຸ່ມ ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ຮັກຫອມສັນຕິພາບ, ມີການເຄື່ອນໄຫວວຽກງານຕ່າງໆຮ່ວມກັນ ນັບມື້ນັບຫຼາຍ ແລະ ກວ້າງຂວາງອອກເປັນກ້າວໆ.


​​​​​ ໃນໂອກາດດຽວກັນ, ທ່ານ Ken ichi KOMAGATA ກໍ່ໄດ້ສະແດງຄວາມຂອບໃຈຢ່າງສູງ ຕໍ່ການໃຫ້ກຽດຕ້ອນຮັບ ຂອງທ່ານນາຍົກລັດຖະມົນຕີ ໃນຄັ້ງນີ້. ພ້ອມທັງ ແຈ້ງໃຫ້ທ່ານນາຍົກລັດຖະມົນຕີ ຮັບຊາບ ກ່ຽວກັບການເຄື່ອນໄຫວວຽກງານ ກໍ່ຄືກິດຈະກຳຕ່າງໆ ຂອງຄະນະຊາວໜຸ່ມເດີນທະເລອາຊຽນ ທັງຢູ່ ສປປ ລາວ ແລະ ບັນດາປະເທດທີ່ກ່ຽວ ຂ້ອງ.​
​​​​​ ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.