Header Ads

ເປີດໂຄງການຕົວແບບການຮ່ວມມືສາກົນລະຫວ່າງມະຫາວິທະຍາໄລ ສຸພານຸວົງ ແລະ ມະຫາວິທະຍາໄລ ເປໄຈ




ວັນທີ່ 2 ພະຈິກ 2017ຜ່ານມານີ້ ທີ່ຄະນະວິສະວະກໍາສາດ ມະຫາວິທະຍາໄລ ສຸພານຸວົງ ໄດ້ຈັດພິທີເປີດໂຄງການຕົວແບບ ໃນການຮ່ວມມືສາກົນລະຫວ່າງມະຫາວິທະຍາໄລ ສຸພານຸວົງ ສປປ ລາວ ແລະ ມະຫາວິທະຍາໄລ ເປໄຈ ສ ເກົາຫຼີ ໂດຍການເຂົ້າຮ່ວມຂອງທ່ານ ຮສ.ປອ ກອງສີ ແສງມະນີ ຮອງລັດທະມົນຕີກະຊວງສຶກສາທິການ ແລະ ກິລາ,ທ່ານ ນາງ ຄັງຈອງຈາ ຕາງໜ້າຈາກກະຊວງສຶກສາ ສ ເກົາຫຼີ,ພ້ອມດ້ວຍ,ສະມາຄົມນັກຄົ້ນຄ້ວາວິໄຈ,ສະມາຄົມເຊລາມິກ,ສະມາຄົມພະນັກງານບໍານານ,ສຈ ມະຫາວິທະຍາໄລ ຄຸມະໂມໂຕະ ຍີ່ປຸ່ນ,ສະຖາບັນ AIT ປະເທດໄທ,ສຈ ມະຫາວິທະຍາໄລ ຮັນບັດ,ສຈ ມະຫາວິທະຍາໄລ ໂພຮັງ ແລະ ນັກທຸລະກິດເກົາຫຼີ,ມີທ່ານ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ,ອະດິດອະທິການບໍດີມະຫາວິທະຍາໄລ ສຸພານຸວົງ,ອົງການຈັດຕັ້ງມະຫາຊົນ,ພະແນກການກ່ຽວຂ້ອງຂອງແຂວງຫຼວງພະບາງ,ວິຊາການ,ຄູ-ອາຈານ ແລະ ນັກສຶກສາເຂົ້າຮ່ວມ.



ທ່ານ ປອ ວິໄຊ ຈັນສະຫວ່າງ ວ່າການອະທິການບໍດີ ມະຫາວິທະຍາໄລ ສຸພານຸວົງ ໄດ້ກ່າວວ່າ: ມະຫາວິທະຍາໄລ ສຸພານຸວົງ ແມ່ນໜຶ່ງໃນ 5 ມະຫາວິທະຍາໄລຂອງລັດ ເປັນສູນກາງການສຶກສາຂົງເຂດ 8 ພາກເໜືອ ມີໜ້າທີ່ພັດທະນາຊັບພະຍາກອນມະນຸດ ເພື່ອຕອບສະໜອງໃຫ້ແກ່ການພັດທະນາເສດຖະກິດ-ສັງຄົມຂອງຊາດທີ່ມີຄຸນະພາບ ແລະ ພຽງພໍກັບຄວາມຕ້ອງການຂອງວຽກງານຕ່າງໆ ເປັນຕົ້ນແມ່ນການຮຽນ-ການສອນ,ການຄົ້ນຄ້ວາວິທະຍາສາດ,ການບໍລິການດ້ານວິຊາການໃຫ້ແກ່ສັງຄົມ,ແຕ່ລະປີໄດ້ຮັບນັກສຶກສາເຂົ້າຮຽນ ສະເລ່ຍ 1.200 ຄົນຕໍ່ປີ,ປະກອບມີ 6 ຄະນະວິຊາ ແລະ 27 ສາຂາວິຊາ.ໃນໄລຍະ 14 ປີຜ່ານມາ ໄດ້ສ້າງນັກວິຊາການ,ບຸກຄະລາກອນອອກຮັບໃຊ້ສັງຄົມແລ້ວຈໍານວນ 10 ຫຼຸ້ນ,ມີ 7.433 ຄົນ ແລະ ປີ2017-2018 ນີ້ ຄາດຄະເນວ່າຈະມີນັກສຶກສາທັງໝົດ 4.000ຄົນ,ຍິງ 1.600 ກວ່າຄົນໃນນີ້ມີພະນັກງານ-ອາຈານ 413 ຄົນ,ຍິງ 117 ຄົນ. 




ສໍາລັບໂຄງການຕົວແບບໃນການຮ່ວມມືສາກົນລະຫວ່າງມະຫາວິທະຍາໄລ ສຸພານຸວົງ ແລະ ມະຫາວິທະຍາໄລ ເປໄຈ ນີ້ ແມ່ນໂຄງການສ້າງບຸກຄະລາກອນ ໃນດ້ານວິທະຍາສາດ-ເຕັກໂນໂລຊີ ທາງດ້ານວິສະວະກໍາວັດສະດຸ ຢູ່ໃນຄະນະວິສະວະກໍາສາດ ຂອງ ມສ ,ເຊິ່ງມີຄວາມສໍາຄັນຢ່າງຍິ່ງ ແລະ ເປັນໂຄງການແຫ່ງທໍາອິດຂອງ ມສ ແລະ ທີ່ຍັງຂາດສິ່ງເອື້ອອໍານວຍຫຼາຍຢ່າງ,ແຕ່ກໍ່ເປັນໂຄງການທີ່ຖືກຕ້ອງກັບວິໄສທັດ,ແຜນຍຸດທະສາດ ແລະ ມີຄວາມຢືນຍົງ ເພື່ອຕອບສະໜອງແຮງງານຕາມຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງຊາດ ໂດຍສະເພາະແມ່ນບັນດາແຂວງພາກເໜືອ.



ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ຂື້ກ່າວເປີດໂຄງການ ຊິ່ງມີບາງຕອນທ່ານກ່າວວ່າ: ສ ປປ ລາວ ໄດ້ຮັບການຊ່ວຍເຫຼືອຈາກ ສ ເກົາຫຼີ ໃນຫຼາຍຂົງເຂດວຽກງານ ໂດຍສະເພາະດ້ານວຽກງານພັດທະນາຄຸນນະພາບການຮຽນ-ການສອນ ຂົງເຂດສຶກສາ ແລະ ໂຄງການນີ້ກໍ່ເປັນໂຄງການໜຶ່ງ ເຊິ່ງຈະເປັນການສ້າງບຸກຄະລາກອນ,ວິຊາການ ເພື່ອຕອບສະໜອງໃຫ້ແກ່ສໍານັກງານອົງການກ່ຽວຂ້ອງ ແລະ ໂຮງຈັກໂຮງງານທີ່ຜະລິດວັດສະດຸ ໃນອານາຄົດ.ຈາກນັ້ນທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ, ,ຕາງໜ້າຈາກ ກະຊວງສຶກສາ ສ ເກົາຫຼີ,ມີຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີແລະ ສະຖາບັນ AIT ປະເທດໄທ ກໍ່ໄດ້ພັດປ່ຽນກັນຂື້ນມີຄໍາເຫັນ,ກ່າວຊົມເຊີຍ ພ້ອມທັງ ຮ່ວມກັນຕັດແຖບຜ້າ ແລະ ເປີດປ້າຍໂຄງການຕົວແບບ ໃນການຮ່ວມມືສາກົນລະຫວ່າງມະຫາວິທະຍາໄລ ສຸພານຸວົງ ສປປ ລາວ ແລະ ມະຫາວິທະຍາໄລ ເປໄຈ ສ ເກົາຫຼີ ຢ່າງສົມກຽດ.


ຂ່າວ: ເພັດສາຄອນ ສິມມະວົງ

-------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.