Header Ads

ເຈົ້າໜ້າທີ່ ປກສ ເມືອງຫາດຊາຍຟອງຈັບຕົວເປົ້າໝາຍລັກຊັບພົນລະເມືອງ ກໍ່ເຫດມາແລ້ວເກືອບ 20 ຄັ້ງ



ບັນດາປະກົດການຫຍໍ້ທໍ້ຕ່າງໆໃນນະຄອນຫຼວງວຽງຈັນ ຍັງສືບຕໍ່ເກີດຂຶ້ນຢ່າງຕໍ່ເນື່ອງ ໂດຍສະເພາະກຸ່ມຄົນບໍ່ດີກໍ່ເຫດເຄື່ອນໄຫວລັກລົດຈັກ ເຊິ່ງເປັນປະກົດການຊໍາເຮື້ອເລື່ອຍໆມາ. ຈາກສະພາບດັ່ງກ່າວນັ້ນ, ເຈົ້າໜ້າທີ່ສືບສວນ-ສອບສວນທີ່ເຮັດວຽກຕົວຈິງໃຫ້ທັດສະນະວ່າ: ໃນບັນດາຄະດີທີ່ເກີດຂຶ້ນ ສ່ວນຫຼາຍເກີດມາຈາກເຈົ້າຂອງຊັບເອງທີ່ມັກງ່າຍ ແລະ ຂາດສະຕິໃນການຮັກສາຊັບ; ດັ່ງນັ້ນ, ຈຶ່ງເປັນຊ່ອງວ່າງຂອງກຸ່ມຄົນບໍ່ດີ ທີ່ມັກຈະສວຍໂອກາດລັກໄປ. ແຕ່ເຖິງຢ່າງໃດກໍຕາມ, ເຈົ້າໜ້າທີ່ກໍໄດ້ສຸມໃສ່ແກ້ໄຂສະພາບດັ່ງກ່າວ ເພື່ອໃຫ້ຫຼຸດລົງເທື່ອລະກ້າວ. ດັ່ງໃນວັນທີ 21 ກັນຍາ 2017 ທີ່ຜ່ານມາ ເຈົ້າໜ້າທີ່ ປກສ ເມືອງຫາດຊາຍຟອງ ໄດ້ຕິດຕາມຈັບຕົວເປົ້າໝາຍລັກຊັບພົນລະເມືອງໄດ້ 2 ຄົນ. ພວກກ່ຽວຮັບສາລະພາບ ວ່າ: ໄດ້ເຄື່ອນໄຫວລັກລົດຈັກມາແລ້ວເກືອບ 20 ຄັ້ງ ສ່ວນຫຼາຍແມ່ນສວຍໂອກາດລັກຕອນເຈົ້າຂອງລົດໄປຈອດຕາມແຄມທາງ, ໄປຕະຫຼາດ ຫຼື ຊື້ສິ່ງຂອງ ໂດຍບໍ່ຝາກ ແລະ ຈອດໄວ້ໜ້າບ້ານໂດຍບໍ່ລັອກຄໍລົດ.




ເຈົ້າໜ້າທີ່ ປກສ ເມືອງຫາດຊາຍຟອງ ນະຄອນຫຼວງວຽງຈັນ ເປີດເຜີຍໃຫ້ຮູ້ວ່າ: ໃນວັນທີ 19 ກັນຍາ 2017 ໄດ້ຮັບແຈ້ງຄວາມຈາກຜູ້ຖືກເສຍຫາຍຢູ່ບ້ານຖິ່ນຕົມ ວ່າ: ພາຍຫຼັງກັບມາແຕ່ວຽກໄດ້ເອົາລົດຈັກຈອດໄວ້ໜ້າເຮືອນ. ໃນເວລານັ້ນ, ໄດ້ປະມານ 30 ນາທີ ຕົນເອງໄດ້ອອກມາເບິ່ງລົດ ແຕ່ບໍ່ເຫັນ, ລົດຈັກຖືກຄົນຮ້າຍໄດ້ລັກໄປແລ້ວ. ພາຍຫຼັງໄດ້ຮັບແຈ້ງຄວາມ ກໍໄດ້ແຕ່ງຕັ້ງພະນັກງານວິຊາສະເພາະຕິດຕາມເປົ້າໝາຍ ມາຮອດວັນທີ 21 ກັນຍາ 2017 ຈຶ່ງສາມາດກັກຕົວຜູ້ຖືກຫາຊື່ ທ້າວ ໄວຄູນ ຫຼື ແຕນ ອາຍຸ 24 ປີ ຢູ່ບ້ານໜອງພົງ ເມືອງຫາດຊາຍຟອງ ນະຄອນຫຼວງວຽງຈັນ ພ້ອມກັບລົດຈັກທີ່ລັກໄປຈໍານວນໜຶ່ງ.


ຈາກນັ້ນ, ນໍາຕົວມາສອບສວນຂະຫຍາຍຜົນ ກໍສາມາດກັກຕົວຜູ້ຮ່ວມຂະບວນການໄດ້ອີກ 1 ຄົນ ຊື່ ທ້າວ ອໍາ ອາຍຸ 26 ປີ ຢູ່ບ້ານໜອງພົງ ເມືອງຫາດຊາຍຟອງ ນະຄອນຫຼວງວຽງຈັນ. ຜ່ານການສອບສວນຂະຫຍາຍຜົນຂອງເຈົ້າໜ້າທີ່ ທ້າວ ໄວຄູນ ແລະ ທ້າວ ອໍາ ສາລະພາບວ່າ: ພວກກ່ຽວໄດ້ຮ່ວມກັນລັກຊັບ ຈໍານວນ 17 ຄັ້ງ ໄດ້ລົດຈໍານວນ 17 ຄັນ ຄື: ໃນເດືອນກໍລະກົດ 2017 ພວກກ່ຽວໄດ້ໄປລັກເອົາລົດຈັກ ສຳເລັດ 4 ຄັ້ງ ເຊັ່ນ: ໃນເວລາປະມານ 21:00 ໂມງ ໄດ້ໄປລັກເອົາລົດຈັກເວບ 100 ສີຟ້າດໍາ ຢູ່ເຂດບ້ານໜອງແປນເໜືອ ເມືອງຫາດຊາຍຟອງ ແລ້ວພາກັນໄປຂາຍໄດ້ເງິນ 1.000.000 ກີບ; ວັນຕໍ່ມາ ໄດ້ພາກັນໄປລັກເອົາລົດຈັກເວບ 100 ສີແດງດໍາ ຢູ່ເຂດບ້ານຖິ່ນຕົມ ເມືອງຫາດຊາຍຟອງ ແລ້ວນໍາໄປຂາຍຕໍ່ໄດ້ເງິນ 1.500.000 ກີບ; ໃນເດືອນດຽວກັນ ໄດ້ພາກັນໄປລັກເອົາລົດຈັກເວບ 100 ສີແດງດໍາ ຢູ່ເຂດບ້ານທ່ານາແລ້ງ ແລະ ເວລາປະມານ 22:00 ໂມງ ໃນທ້າຍເດືອນກໍລະກົດ ໄດ້ພາກັນໄປລັກເອົາລົດຈັກເວບໄອ໌ ສີແດງດໍາ ເຂດບ້ານຄວາຍແດງ ແລ້ວນໍາໄປຂາຍເຂດບ້ານໜອງພົງ ເມືອງຫາດຊາຍຟອງ ໄດ້ເງິນ 1.000.000 ກີບ;



ມາເດືອນສິງຫາ 2017 ໄດ້ເຄື່ອນໄຫວລັກຮ່ວມກັນອີກ 6 ຄັ້ງ ໄດ້ລົດ 6 ຄັນ ຄື: ໄດ້ພາກັນໄປລັກເອົາລົດສະແມັດ ສີແດງ ຢູ່ເຂດບ້ານຖິ່ນແທ່ນ ແລ້ວນໍາໄປຂາຍໄດ້ເງິນ 1.000.000 ກີບ, ເວລາປະມານ 22:00 ໂມງ ພວກກ່ຽວໄດ້ພາກັນໄປລັກເອົາລົດຈັກເວບ 100 ສີຟ້າດໍາ ຢູ່ເຂດບ້ານທ່າພະ. ຈາກນັ້ນ, ນໍາໄປຂາຍໄດ້ເງິນ 1.000.000 ກີບ, ຕໍ່ມາໄດ້ພາກັນໄປລັກເອົາລົດຈັກເວບ ສີຟ້າ ຈອດຢູ່ແຄມທາງ, 3 ວັນຕໍ່ມາ ໄດ້ໄປລັກເອົາລົດຈັກເວບ 100 ສີປອນດໍາ ຢູ່ເຂດບ້ານທ່າເດື່ອ ແລ້ວນໍາໄປຂາຍຕໍ່ໄດ້ເງິນ 1.200.000 ກີບ ແລະ ໃນເວລາ 24:00 ໂມງຂອງເດືອນດຽວກັນ ໄດ້ພາກັກໄປລັກເອົາລົດຈັກເວບ 100 ສີແດງດໍາ ຢູ່ເຂດບ້ານນາໂນ ເມືອງໄຊເສດຖາ ເມື່ອໄດ້ລົດມາກໍນໍາໄປຂາຍຕໍ່ ໄດ້ເງິນ 1.000.000 ກີບ.



ມາເດືອນກັນຍາ 2017 ໄດ້ອອກເຄື່ອນໄຫວລັກຮ່ວມກັນ ຈໍານວນ 7 ຄັ້ງ ໄດ້ລົດຈັກ 7 ຄັນ ຄື: ໃນວັນທີ 1 ກັນຍາ 2017 ພວກກ່ຽວໄດ້ພາກັນໄປລັກເອົາລົດຈັກເທນາ ສີແດງດໍາ ຈອດຢູ່ຂ້າງເຮືອນເຂດສີ່ແຍກບ້ານຊຽງຄວນ. ຈາກນັ້ນ, ນໍາໄປຂາຍໄດ້ເງິນ 1.500.000 ກີບ; ວັນທີ 13 ກັນຍາ 2017 ໄດ້ພາກັນໄປລັກເອົາລົດຈັກເວບ 100 ສີໝາກຄໍ້ ຢູ່ເຂດບ້ານປ່າຫວ້າ ນໍາໄປຂາຍໄດ້ເງິນ 1.000.000 ກີບ; ວັນທີ 14 ກັນຍາ 2017 ໄດ້ພາກັນໄປລັກເອົາລົດຈັກເວບ 100 ສີຟ້າດໍາ ຢູ່ເຂດບ້ານທ່າພະ. ຈາກນັ້ນ, ນໍາໄປຂາຍໄດ້ເງິນ 700.000 ກີບ; ວັນຕໍ່ມາໄດ້ໄປລັກເອົາລົດຈັກເວບ 100 ສີຟ້າດໍາ ຢູ່ເຂດບ້ານດົງໂພນແຮ່ ນໍາໄປຂາຍໄດ້ເງິນ 1.800.000 ກີບ.


3 ວັນຕໍ່ມາໄດ້ຮ່ວມກັນໄປລັກ ເອົາລົດຈັກຟີໂນ ສີຂາວນໍ້າຕານ ຢູ່ເຂດບ້ານທ່ານາແລ້ງ ແລ້ວເອົາມາດັດແປງສະພາບເຕັກນິກ. ຈາກນັ້ນ, ກໍມານໍາໃຊ້ເອງ; ເວລາຕໍ່ມາໄດ້ໄປລັກເອົາລົດຈັກເທນາ ຢູ່ເຂດບ້ານຊຽງຄວນ ແລະ ມາວັນທີ 19 ກັນຍາ 2017 ໄດ້ພາກັນໄປລັກເອົາລົດຈັກບີດ ສີຟ້າອ່ອນ ຢູ່ເຂດບ້ານຖິ່ນຕົມ ເມືອໄດ້ລົດມາແລ້ວ ກໍຂີ່ລົດໜີໄປທາງຄອງນໍ້າບ້ານທ່າພະ ແຕ່ນໍ້າມັນລົດໝົດໃນລະຫວ່າງທາງ ຈຶ່ງໄດ້ເອົາໄຟຈູດລົດຄັນດັ່ງກ່າວ. ຈາກນັ້ນ, ມາວັນທີ 21 ກັນຍາ 2017 ໄດ້ມີເຈົ້າໜ້າທີ່ເຂົ້າມາກັກຕົວທ້າວ ໄວຄູນ ຢູ່ເຮືອນ ພ້ອມກັບລົດຈັກຟີໂນ ແລະ ກັກຕົວທ້າວ ອໍາ ໃນເວລາຕໍ່ມາ.


ຂ່າວຈາກ: ໜັງສືພິມ ປກສ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.