Header Ads

ຢຶດສິນຄ້າເກືອດຫ້າມ ຈາກຮ້ານຂາຍເຄື່ອງໄຟຟ້າ ຢູ່ເມືອງໄຊ ແຂວງອຸດົມໄຊ




ໃນວັນທີ 30 ຕຸລາ 2017, ເຈົ້າໜ້າທີ່ພະແນກຕຳຫຼວດຊັບພະຍາກອນທຳມະຊາດ ແລະ ສິ່ງແວດລ້ອມ ປກສ ແຂວງອຸດົມໄຊ ໄດ້ຢຶດສິນຄ້າທີ່ເກືອດຫ້າມປະເພດຈັກສະຕິນ ແລະ ໝໍ້ຊ໋ອດປາ ເກືອບ 40 ກ່ວາເຄື່ອງ ຈາກຮ້ານຂາຍເຄື່ອງໄຟຟ້າ ຂອງ ທ້າວ ລີ້ວ ຫຸ້ຍ ອາຍຸ 23 ປີ ເຊື້ອຊາດ ແລະ ສັນຊາດຈີນ ເຊົ່າຮ້ານຢູ່ບ້ານນາຫວານນ້ອຍ ເມືອງໄຊ ແຂວງອຸດົມໄຊ ພ້ອມທັງກັກຕົວໄປດໍາເນີນຄະດີຕາມກົດໝາຍ.

ເຈົ້າໜ້າທີ່ສອບສວນ ພະແນກຕຳຫຼວດຊັບພະຍາກອນທຳມະຊາດ ແລະ ສິ່ງແວດລ້ອມ ປກສ ແຂວງອຸດົມໄຊ ໃຫ້ຮູ້ວ່າ: ທ້າວ ລີ້ວ ໄດ້ເຂົ້າມາຢູ່ ສປປ ລາວ ແຕ່ວັນທີ 16 ມິຖຸນາ 2014. ໃນເບື້ອງຕົ້ນແມ່ນໄດ້ໄປເປັນກຳມະກອນຂາຍເຄື່ອງໃຫ້ຄົນຈີນ ຢູ່ນະຄອນຫຼວງວຽງຈັນ, ຮອດປີ 2016 ໄດ້ຍ້າຍໄປເຮັດທຳທຸລະກິດສ່ວນຕົວ ໂດຍເຊົ່າ-ຂາຍເຄື່ອງໃຊ້ໄຟຟ້າ, ເຄື່ອງຈັກ, ອຸປະກອນ (ເຄື່ອງມື) ເຮັດການຜະລິດກະສິກໍາ ຢູ່ບ້ານນາຫວານນ້ອຍ ເມືອງໄຊ ແຂວງອຸດົມໄຊ ໂດຍໄດ້ລັກລອບນຳເອົາເຄື່ອງຕ້ອງຫ້າມທີ່ຜິດກົດໝາຍ ປະເພດຈັກສະຕິນ ແລະ ໝໍ້ຊ໋ອດປາ ຈາກ ສປ ຈີນ ເຂົ້າມາຂາຍ; ເຊິ່ງຂອງກາງທີ່ຢຶດໃນຄັ້ງນີ້ມີ: ຈັກສະຕິນ ລຸ້ນເຄື່ອງໃຫຍ່ 9 ເຄື່ອງ, ລຸ້ນນ້ອຍ 6 ເຄື່ອງ ແລະ ໝໍ້ຊ໋ອດປາ 28 ເຄື່ອງ ລວມທັງໝົດ 43 ເຄື່ອງ ເຊິ່ງເປັນການກະທຳຜິດຕໍ່ລະບຽບກົດໝາຍໃນມາດຕາ 145 ຂອງກົດໝາຍອາຍາແຫ່ງ ສປປ ລາວ.


ທ້າວ ລີ້ວ ສາລະພາບວ່າ: ເຄື່ອງຈໍານວນດັ່ງກ່າວ ແມ່ນນໍາເຂົ້າຈາກປະເທດຈີນ ເຊິ່ງຊື້ຈັກສະຕິນລຸ້ນໃຫຍ່ ໃນລາຄາ 1 ເຄື່ອງ ຕໍ່ 500 ຢວນ, ມາຈຳໜ່າຍໃນລາຄາ 1.300.000 ກີບ ຕໍ່ 1 ເຄື່ອງ; ຈັກສະຕິນລຸ້ນນ້ອຍ ແມ່ນຊື້ໃນລາຄາ 100 ຢວນ, ມາຈຳໜ່າຍ 400.000 ແລະ ໝໍ້ຊ໋ອດປາ ໃນລາຄາ 1 ເຄື່ອງ ຕໍ່ 42 ຢວນ ມາຈໍາໜ່າຍໃນລາຄາ 130.000 ກີບ ເຊິ່ງໄດ້ຂາຍຈໍານວນໜຶ່ງ ສ່ວນທີ່ເຫຼືອແມ່ນເຈົ້າໜ້າທີ່ຕໍາຫຼວດຢຶດໄວ້.

ພາບ- ຂ່າວ: ນສພ ຄວາມສະຫງົບ ------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.