Header Ads

ໜ່ວຍຊາວໜຸ່ມຮາກຖານຄະນະຈັດຕັ້ງແຂວງເຊກອງເປີດບັ້ນຂໍ້ແຂ່ງຂັນ 4 ບຸກ




ແຂວງເຊກອງ : ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງເຊກອງ ໜ່ວຍຊາວໜຸ່ມຮາກຖານຄະນະຈັດຕັ້ງແຂວງເຊກອງ ໄດ້ເປີດບັ້ນຂໍ້ແຂ່ງຂັນ 4 ບຸກ ຂຶ້ນໃນຕອນເຊົ້າວັນທີ 3 ພະຈິກ 2017 ນີ້ ໂດຍການເປັນປະທານຂອງທ່ານ ກາວີນ ແກ້ວຈັນທະວົງ ເລຂາໜ່ວຍຊາວໜຸ່ມມຮາກຖານຄະນະຈັດຕັ້ງແຂວງ, ເປັນກຽດເຂົ້າຮ່ວມຂອງທ່ານ ແຜນວັນທອງ ຈະເລີນເພັດ ຮອງເລຂາຄະນະບໍລິຫານງານຊາວໜຸ່ມ ປປ ລາວ ແຂວງ, ທ່ານ ປທ ຄໍາພາ ໄຊຍະແສງ ຮອງເລຂາໜ່ວຍພັກ ຮອງຫົວໜ້າຄະນະຈັດຕັ້ງແຂວງ ຜູ້ຊີ້ນໍາຂົງເຂດວຽກງານອົງການຈັດຕັ້ງມະຫາຊົນຄະນະຈັດຕັ້ງແຂວງ, ມີຄະນະໜ່ວຍຊາວໜຸ່ມອ້ອມຂ້າງ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍຊາວຫນຸ່ມຮາກຖານຄະນະຈັດຕັ້ງແຂວງເຂົ້າຮ່ວມຢ່າງພ້ອມພຽງ.



ໃນກອງປະຊຸມໄດ້ຮັບຟັງເນື້ອໃນແຜນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຕິດພັນກັບຂໍ້ແຂ່ງຂັນຮັກຊາດ ແລະພັດທະນາຂອງຄະນະໜ່ວຍຊາວໜ່ມ ປປ ລາວ ປະຈໍາປີ 2017 ຈາກທ່ານ ກາວີນ ແກ້ວຈັນທະວົງ ເລຂາໜ່ວຍຊາວໜຸ່ມຮາກຖານຄະນະຈັດຕັ້ງແຂວງ: ສໍາລັບທິດທາງແຜນການແຕ່ລະດ້ານໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃຫ້ປະກົດຜົນເປັນຈິງມີດັ່ງນີ້:



1. ບຸກທາງດ້ານການເມືອງແນວຄິດ: ຄະນະໜ່ວຍຊາວໜຸ່ມຮາກຖານຄະນະຈັດຕັ້ງແຂວງຈະໄດ້ເຜີຍແຜ່ເອກະສານຕ່າງໆໃຫ້ໄດ້ 15 ຄັ້ງ/ປີ ໃຫ້ມີຜູ້ເຊົ້າຮ່ວມທັງໝົດ 90 ກວ່າຄົນ, ກວມເອົາ 88 % ຂອງຈໍານວນສະມາຊິກທັງໝົດ ເພື່ອເຊື່ອມຊຶມ ແລະກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຕ່າງໆຂອງລັດ ຢ່າງເຂັ້ມງວດ ແລະສ້າງສະມາຊິກ ຊປປ ລາວ ມີແນວຄິດຮັກຊາດ, ຮັກລະບອບໃໝ່, ຮັກວັດທະນທໍາອັນດີງາມຂອງຊາດຂອງເຜົ່າ, ມີວິໄສທັດເບິ່ງກວ້າງມອງໄກໃຫ້ກວມເອົາ 90 % ຂອງຈໍານວນສະມາຊິກທັງໝົດ.



2. ບຸກທາງດ້ານການຝຶກຝົນຫຼໍ່ຫຼອມ ແລະການຮໍ່າຮຽນ: ສ້າງສະມາຊິກຊາວໜຸ່ມມີຄຸນສົມບັດສິນທໍາປະຕິວັດໃຫ້ໄດ້ 85 %, ສ້າງສະມາຊິກຊາວໜຸ່ມມີມາລະຍາດທີ່ດີໃຫ້ໄດ້ 75 %, ສະມາຊິກຊາວໜຸ່ມຕ້ອງຮໍ່າຮຽນແນວທາງນະໂຍບາຍມະຕິຄໍາສັ່ງຂອງພັກ, ລະບຽບກົດໝາຍຂອງລັດ ໃຫ້ໄດ້ 85 %, ສ້າງສະມາຊິກຊາວໜຸ່ມຮໍ່າຮຽນ 5 ດີ ໃຫ້ໄດ້ 70 % ແລະສ້າງສະມາຊິກຊາວໜຸ່ມຮໍ່າຮຽນວິຊາສະເພາະ ຫຼືວິຊາຊີບໃດໜຶ່ງເພື່ອຍົກລະດັບຂອງຕົນໃຫ້ສູງຂຶ້ນເລື້ອຍໃຫ້ໄດ້ 55 % ຂອງຈໍານວນສະມາຊິກທັງໝົດ.

3. ບຸກທາງດ້ານວຽກງານການຈັດຕັ້ງ: ຕ້ອງໄດ້ປັບປຸງການຈັດຕັ້ງໃຫ້ມີຄວາມເຂັ້ມແຂງ, ສະມາຊິກທຸກສະຫາຍນັບຖືການຈັດຕັ້ງ, ປະຕິບັດສໍາເລັດໜ້າທີ່ການຈັດຕັ້ງມອບໝາຍໃຫ້ຢ່າງມີປະສິດທິຜົນສູງ, ການຈັດຕັ້ງຊາວໜຸ່ມທີ່ຮອດອາຍຸເປີດກອງປະຊຸມໃຫຍ່ຕາມກົດລະບຽບແລ້ວ ຕ້ອງເປີດກອງປະຊຸມໃຫຍ່ຂອງຕົນໃຫ້ທັນເວລາ, ເອົາໃຈໃສ່ຂະຫຍາຍການຈັດຕັ້ງຊາວໜຸ່ມ, ເຍົາວະຊົນ-ອະນຸຊົນເຊັ່ນ: ໜ່ວຍ, ຈຸ ຊາວໜຸ່ມ ແລະກອງຮ້ອງ, ໝວດ, ໝູ່ ຂອງເຍົາວະຊົນ-ອານຸຊົນ ໃຫ້ໄດ້ 80 %, ເອົາໃຈໃສ່ຂະຫຍາຍເປັນສະມາຊິກຊາວໜຸ່ມ-ເຍົາວະຊົນ ແລະອະນຸຊົນ ໃຫ້ໄດ້ 50 %, ເອົາໃຈໃສ່ຈັດປະເພດສະມາຊິກຊາວໜຸ່ມ, ເຍົາວະຊົນ-ອານຸຊົນ ໃນແຕ່ລະເດືອນໃຫ້ຄົບຖ້ວນ ເພື່ອສະເໜີຍ້ອງຍໍ ແລະນາມມະຍົດຕ່າງໆ, ເຂົ້າຮ່ວມການລວມໜ່ວຍຊາວໜຸ່ມ ແລະເສຍເງິນສະຕິແຕ່ລະເດືອນເປັນປົກກະຕິ, ສ້າງໃຫ້ສະມາຊິກ ມີຄວາມສາມັກຄີແໜ້ນແຟ້ນ-ກວ້າງຂວາງ ແລະປະກອບຄໍາຄິດເຫັນທີມີຄຸນປະໂຫຍດເພື່ອພັດທະນາການຈັດຕັ້ງທີ່ດີຂຶ້ນ.

4. ບຸກທາງດ້ານວິຊາຊີບ-ສ້າງວຽກເຮັດງານທໍາ: ສ້າງໃຫ້ສະມາຊິກຊາວໜຸ່ມໄດ້ຮຽນ ແລະມີວີຊາຊີບໃນດ້ານໃດໜຶ່ງທີ່ແນ່ນອນ (ຍົກເວັ້ນຊາວໜຸ່ມທີ່ເປັນນັກຮຽນ) ໃຫ້ໄດ້ 70%, ຕ້ອງມີວຽກເຮັດງານທໍາ ແລະມີລາຍຮັບເປັນປົກກະຕິໃຫ້ໄດ້ 90%, ຕ້ອງສ້າງເສດຖະກິດຄອບຄົວ-ມີລາຍຮັບເປັນປົກກະຕິ, ດໍາເນີນທຸລະກິດທີ່ຖືກກົດໝາຍໃຫ້ໄດ້ 90%, ແລະ ແລະແກ້ໄຂຄວາມທຸກຍາກໃຫ້ໄດ້ 30% ຂອງຈໍານວນສະມາຊິກທັງໝົດ.

ໃນຕອນທ້າຍຂອງກອງປະຊຸມກໍໄດ້ຮັບຟັງການໂອ້ລົມຂອງທ່ານ ແຜນວັນທອງ ຈະເລີນເພັດ ຮອງເລຂາຄະນະບໍລິຫານງານຊາວໜຸ່ມ ປປ ລາວ ແຂວງ ເຊິ່ງທ່ານໄດ້ເນັ້ນໜັກຫຼາຍບັນຫາຄື:

1. ໃນໄລຍະທີ່ເປີດຂະບວນການຂໍ້ແຂ່ງຂັນ 4 ບຸກ ຄະນະໜ່ວຍຊາວໜຸ່ມຕ້ອງດໍາເນີນໄປຕາມຂະບວນການຂອງຂໍ້ແຂ່ງຂັນໃຫ້ປະກົດຜົນເປັນຈິງ ໂດຍສະເພາະ ບຸກທາງດ້ານການເມືອງແນວຄິດໃຫ້ປະຕິບັດໄດ້ 95%, ບຸກທາງດ້ານການຝຶກຝົນຫຼໍ່ຫຼອມ ແລະການຮໍ່່າຮຽນໃຫ້ໄດ້ 90%, ບຸກທາງດ້ານການຈັດຕັ້ງໃຫ້ໄດ້ 90% ແລະບຸກທາງດ້ານວິຊາຊີບສ້າງວຽກເຮັດງານທໍາໃຫ້ໄດເ 85%.

2. ການເຮັດວຽກງານຕົວຈິງຂອງຄະນະໜ່ວຍຊາວໜຸ່ມຕ້ອງໄດ້ແບ່ງຄວາມຮັບຜິດຊອບໃຫ້ກັນລະອຽດ ແລະມີຄວາມເປັນເອກະພາບໃນການຈັດຕັ້ງປະຕິບັດທິດທາງແຜນການທີ່ວາງອອກໃຫ້ບັນລຸຜົນ ແລະຖືຄວາມສາມັກຄີເປັນກໍາລັງມະຫາສານ.

3. ການລາຍງານສ່ອງແສງໃຫ້ສາຍຕັ້ງສາຍຂວາງເປັນປົກກະຕິ ຂໍທິດຊີ້ນໍາເພື່ອຖອດຖອນບົດຮຽນແຕ່ລະໄລຍະເປັນພື້ນຖານໃນການຈັດຕັ້ງປະຕິບັດຕົວຈິງຕິດພັນກັບໜ້າທີ່ວຽກງານວິຊາສະເພາະຂອງແຕ່ລະສະຫາຍ.

ຂ່າວ-ພາບ: ນາລີວັນ / ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.