Header Ads

ນັກທ່ອງທ່ຽວ ເປັນຫ່ວງ ທັດສະນິຍະພາບ ທີ່ວັງວຽງ ຖືກປິດບັງຈາກ ຕຶກອາຄານສູງ!


ມື້ນີ້ ທາງຮັກລາວໂທລະໂຄ່ງ ຂໍນຳເອົາ ເລື່ອງລາວຈາກ ລາວໂພດສ ແລະ ຈາກ ແຟສເພຈ ພ້ອມທັງບັນດານັກທ່ອງທ່ຽວທັງລາວແລະຕ່າງປະເທດ ທີ່ໄດ້ສົ່ງຂ່າວ ເຖິງບັນຫາ ທີ່ເມືອງວັງວຽງທີ່ສວຍງານກຳລັງປະສົບບັນຫາທ້າທາຍ ຈາກການສ້າງຕຶກອາຄານທີ່ສູງ ປິດບັງທັດສະນິຍະພາບ.



ທ່າມກາງການເຕີບໂຕ ທາງດ້ານການທ່ອງທ່ຽວຢ່າງຕໍ່ເນື່ອງ ທີ່ເມືອງວັງວຽງ ທີ່ມີຄົນມາທ່ຽວຈຳນວນຫຼາຍ ໂດຍສະເພາະ ແມ່ນ ເກົາຫຼີ, ໄທ, ແລະ ອາເມລິກາ ແລະ ເອີຣົບ. ແມ້ກະທັງ ຄົນລາວເອງກະພາກັນໄປທ່ຽວຫຼາຍທີ່ສຸດ. ເຊິ່ງຈຳຕ້ອງໄດ້ມີການສ້າງສິ່ງອຳນວຍຄວາມສະດວກເພື່ອຮອງຮັບການເຕີບໂຕທາງດ້ານການທ່ອງທ່ຽວ.


ເຖິງຢ່າງໃດກໍ່ດີ ການພັດທະນາ ສິ່ງປຸກສ້າງກໍ່ຕ້ອງໄດ້ຄຳນຶງເຖິງຜົນກະທົບ. ໂດຍມີຂໍ້ຄວາມຈາກນັກທ່ອງທ່ຽວທ່ານໜຶ່ງຈາກປະເທດອົດສະຕາລີ່ກ່າວວ່າ ຂ້ອຍມາເຮັດວຽກຢູ່ລາວດົນແລ້ວ ແລະມື້ນີ້ຂ້ອຍໄດ້ພາໝູ່ເພື່ອນມາທ່ຽວວັງວຽງ ບ່ອນທີ່ຂ້ອຍເຄີຍມາທ່ຽວເມື່ອຫຼາຍປີກ່ອນ. ແຕ່ວ່າມາເທື່ອນີ້ຮູ້ສຶກເສຍດາຍທັດສະນີຍະພາບມູມໜຶ່ງ ທີ່ກຳລັງຖືກອາຄານຫຼັງໃຫຍ່ບົດບັງຄວາມງາມຂອງມັນ.



ນັກທ່ອງທ່ຽວຜູ້ໜຶ່ງເປັນພະນັກງານ ປະຈຳມະຫາວິທະຍາໄລແຫ່ງຊາດ ທີ່ໄປປະຊຸມຢູ່ເມືອງວັງວຽງໄດ້ຖ່າຍຮູບ ແລະສົ່ງໃຫ້ພວກເຮົາ ພ້ອມກ່າວວ່າ ພາກສ່ວນທີ່ອະນຸຍາດໃຫ້ມີການກໍ່ສ້າງດັ່ງກ່າວ ອາດຈະລືມຄິດເຖິງວ່າການກໍ່ສ້າງດັ່ງກ່າວຈະບົດບັງທຳມະຊາດທີ່ສວຍງາມ ແລະຮູ້ສຶກເສຍດາຍຖ້າຫາກບໍ່ມີການພິຈາລະນາຍົກເລີກການກໍ່ສ້າງ ແລ້ວວິວທັດໃນມູມນີ້ກໍຈະຖືກບິດບັງ.



ຕຶກທີ່ກຳລັງກໍ່ສ້າງນີ້ບໍ່ແມ່ນຕຶກດຽວທີ່ ສ້າງຂຶ້ນສູງເກີນໄປຈົນປິດບັງຄວາມງາມຂອງພູຜາ ວັງວຽງ,​ ແຕ່ມີໂຮງແຮມໃຫຍ່ ໃນເຂດ ກາງເມືອງທີ່ສ້າງຂຶ້ນ ຢູ່ອີກຝັ່ງ ກໍ່ປິດບັງເຊັ່ນກັນ,​ ເຮັດໃຫ້ບັນດາໂຮງແຮມບ້ານພັກ ນ້ອຍທີ່ໃກ້ຄຽງຕ່າງກໍ່ຈົ່ມເຖິງ ການປິດບັງທັດສະນິຍະພາບ ອັນເປັນຈຸດຂາຍສຳຄັນ ເວລາທີ່ແຂກຕ່າງປະເທດມາທ່ຽວມາຊົມ.



ມີໝູ່ຂອງ ຮັກລາວໂທລະໂຄ່ງ ທີ່ເປັນຄົນຕ່າງປະເທດ ບອກວ່າ ພວກເຂົາບໍ່ຢາກມາເບິ່ງຕຶກຊີມັງສູງໆ ຢູ່ວັງວຽງ ເພາະບ້ານຂະເຈົ້າເຫັນຈົນເບື່ອແລ້ວ. ພວກເຂົາຢາກເຫັນທຳມະຊາດ, ແລະ ເຫັນຕຶກອາຄານ ແບບລາວໆ ທີ່ເປັນສະເໜ່, ຮູ້ສຶກ ເຖິງຄວາມລຽບງ່າຍ ແລະ ເປັນທີ່ໜ້າມາທ່ຽວຊົມ. ລາວຍັງເວົ້າອີກວ່າ, ຫາກວັງວຽງບໍ່ຮັກສາ ຄວາມເປັນວັງວຽງແລ້ວ ອີກບໍ່ດົນ ຈຸດໝາຍປາຍທາງ ທີ່ໂດ່ງດັງແຫ່ງນີ້ ອາດຈະກາຍເປັນຕຳນານ.

ເລື່ອງລາວນີ້ ມັນເປັນສິ່ງເຕືອນໃຫ້ ໜ່ວຍງານທີ່ຮັບຜິດຊອບໂຄ່ງລ່າງພື້ນຖານ ແລະ ພັດທະນາແຫຼ່ງທ່ອງທ່ຽວ ແລະ ສິ່ງອຳນວຍຄວາມສະດວກ ຕ້ອງໄດ້ຄຳນຶງເຖິງຄວາມສຳຄັນ ຂອງການທ່ອງທ່ຽວແບບທຳມະຊາດ ແລະ ວິຖີຊີວິດ. ຄວນພິຈາລະນາໃຫ້ເໝາະສົມ ໃນການສ້າງຕຶກອາຄານຕ່າງໆ ເພື່ອບໍ່ໃຫ້ເປັນຜົນກະທົບ ຕໍ່ຄວາມເພິ່ງພໍໃຈຂອງນັກທ່ອງທ່ຽວ.



ສ່ວນທາງຜູ່ປະກອບການ ກໍ່ຕ້ອງໄດ້ຄຳນຶງທີ່ສຸດ, ເພາະຖ້າຈະເນັ້ນ ເພື່ອການໄດ້ເງິນຫຼາຍໆ ໂດຍບໍ່ສົນເຖິງຜົນກະທົບໂດຍລວມແລ້ວ ພວກທ່ານກໍ່ຈະສ້າງຕຶກຂຶ້ນມາ ໂດຍທີ່ບໍ່ມີແຂກຈະມາພັກເຊົາ.

ເອົາລະນໍ້! ກໍ່ຝາກໃຫ້ຊ່ວຍໆກັນ ໂດຍສະເພາະອຳນາດການປົກຄອງ ທີ່ເມືອງວັງວຽງ ທີ່ເປັນເຈົ້າຂອງ ເມືອງທີ່ສວຍງາມແຫ່ງນີ້ ໃຫ້ຊ່ວຍໆ ກັນຄົ້ນຄວ້າໃຫ້ເໝາະສົມ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.