Header Ads

ຮອງນາຍົກເນັ້ນໃຫ້ແຂວງຄໍາມ່ວນ ເພີ່ມທະວີແກ້ໄຂປະກົດການ ຫຍໍ້ທໍ້ໃນສັງຄົມ




ກອງປະຊຸມກສະຫລຸບ ບັ້ນດຳເນີນຊີວິດການເມືອງ ປັບປຸງປົວແປງພາຍໃນພັກ ຂອງອົງຄະນະພັກ ແຂວງຄຳມ່ວນ ໄດ້ຈັດຂຶ້ນໃນວັນທີ 30 ຕຸລາ ຜ່ານມາ ໂດຍໃຫ້ກຽດເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ,  ຮອງນາຍົກລັດຖະມົນຕີ , ສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງຄຳມ່ວນ, ພ້ອມດ້ວຍບັນດາສະຫາຍ ໃນຄະນະ ປະຈຳ, ກຳມະການພັກແຂວງ, ເລຂາພັກເມືອງ, ຄະນະພັກຮາກຖານ ພະແນກການອ້ອມຂ້າງ ແຂວງເຂົ້າຮ່ວມ.





ສະຫາຍ ໂອໄດ ສຸດາພອນ ໄດ້ລາຍງານ ແລະ ຕີລາຄາດ້ານດີ, ດ້ານອ່ອນ ລວມທັງຜົນໄດ້ຮັບ ຂອງການດຳເນີນຊີວິດການເມືອງ ປັບປຸງປົວແປງພາຍໃນພັກ ນັບຕັ້ງແຕ່ຂອດການກະກຽມ, ການດຳເນີນຊີວິດ ການເມືອງຕົວຈິງ ລວມເຖິງວຽກງານປ້ອງກັນ ຊາດ-ປ້ອງກັນຄວາມສະຫງົບ, ວຽກງານການນຳພາ ພັດທະນາ ເສດຖະກິດ-ສັງຄົມ ຂອງແຂວງ. ແຂວງຄຳມ່ວນ ມີ 10 ອົງຄະນະພັກເມືອງ, ມີ 2 ຄະນະພັກ ອົງການ, ມີ 93 ຄະນະພັກຮາກຖານ, ມີໜ່ວຍພັກທັງໝົດ 1.017 ໜ່ວຍ, ມີສະມາຊິກພັກທັງໝົດ 15.600 ສະຫາຍ ໃນນີ້ມີສະມາຊິກພັກສົມບູນ 13.877 ສະຫາຍ ແລະ ອື່ນໆ. 

ໂອກາດດຽວດັ່ງກ່າວນີ້ ສະຫາຍ ຮອງນາຍົກລັດຖະມົນຕີ ໄດ້ໂອ້ລົມ ແລະ ກ່າວຍ້ອງຍໍຊົມເຊີຍ ຕໍ່ການຈັດຕັ້ງດຳເນີນ ຊີວິດການເມືອງປັບປຸງ ປົວແປງພາຍໃນພັກ ເຊິ່ງໄດ້ຖືສຳຄັນ ແລະ ມີຄວາມຮັບ ຜິດຊອບສູງ ຕໍ່ບັນຫາດັ່ງກ່າວ ເພື່ອສືບຕໍ່ຜັນຂະຫຍາຍ ຜົນສຳເລັດການດຳເນີນ ຊີວິດການເມືອງ ປັບປຸງປົວແປງພັກຄັ້ງນີ້ ໃຫ້ເຂົ້າສູ່ລວງເລິກໂດຍ ສະຫາຍຮອງນາຍົກລັດຖະມົນຕີ ໄດ້ຮຽກຮ້ອງໃຫ້ສືບຕໍ່ ໃນການຄົ້ນຄວ້າ, ວິເຄາະ, ວິໃຈ ແລະ ລົງເລິກກວດກາຕີລາຄາຄືນ ກ່ຽວກັບບັນຫາຕ່າງໆ ທີ່ພະນັກງານ, ສະມາຊິກພັກ ໄດ້ປະກອບຄຳຄິດຄຳເຫັນ ຕໍ່ການນຳພາລວມ ໃຫ້ເລິກເຊິ່ງ ພ້ອມທັງຄົ້ນຄວ້າ ທິດທາງລວມ ແລະ ຫາວິທີແກ້ໄຂ ແຕ່ລະບັນຫາຕາມແຕ່ລະຂົງເຂດ ໃຫ້ມີການຫັນປ່ຽນຢ່າງຕັ້ງໜ້າ, ສືບຕໍ່ກວດກາລົງເລິກ ແລະ ມີມາດຕະການແກ້ໄຂ ດ້ວຍຫລາຍວິທີ ຕາມຄວາມເໝາະສົມ ຕໍ່ບັນດາ ສະຫາຍສະມາຊິກພັກ ທີ່ມີຄຸນທາດການ ເມືອງ-ຄຸນສົມບັດ ສິນທຳປະຕິວັດ ທີ່ບໍ່ທັນໜັກແໜ້ນ, ຄວາມຮັບຜິດຊອບ ຕໍ່ໜ້າທີ່ການເມືອງ ທີ່ໄດ້ຮັບມອບໝາຍຍັງບໍ່ທັນສູງ, ຄວາມເປັນແບບຢ່າງນຳໜ້າດ້ານ ແບບແຜນການ ດຳລົງຊີວິດບໍ່ທັນດີ ພ້ອມນັ້ນ ກໍໃຫ້ສືບຕໍ່ເພີ່ມທະວີ ວຽກງານປ້ອງກັນຊາດ-ປ້ອງກັນ ຄວາມສະຫງົບຢ່າງເຂັ້ມແຂງ, ສຸມໃສ່ແກ້ໄຂສະພາບຫຍໍ້ທໍ້ໃນສັງຄົມ, ເປັນຕົ້ນບັນຫາຢາເສບຕິດ, ອຸປະຕິເຫດ ຕາມທ້ອງຖະໜົນ, ການຄ້າຂາຍເຖື່ອນ, ລັກລອບຂຸດຄົ້ນໄມ້-ສົ່ງອອກໄມ້, ນຳເຂົ້າພາຫະນະບໍ່ຖືກຕ້ອງ, ບັນຫາທີ່ດິນ ແລະ ອື່ນໆ.

ພາບ-ຂ່າວ: ກອງຄຳ/ ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.