Header Ads

ສຶກສາຄວາມເປັນໄປໄດ້ ໃນການສ້າງນະຄອນຫຼວງອັດສະຣິຍະ



ພິທີ​ເຊັນ​ບົດ​ບັນທຶກ​ຄວາມ​ເຂົ້າໃຈ ​ລະຫວ່າງ​ອົງການ​ປົກຄອງ ນວ ແລະ ບໍລິສັດ ຫົວ​ເຫວີຍ ເຕັກໂນ​ໂລ​ຊີ​ລາວ ຈຳກັດຜູ້​ດຽວ ກ່ຽວ​ກັບ​ໂຄງການນະຄອນຫຼວງວຽງ​ຈັນ​ອັດ​ສະ​ຣິ​ຍະ ຈັດ​ຂຶ້ນ​ວັນ​ທີ 8 ພະຈິກ 2017 ຜ່ານ​ມາ​ທີ່​ຫ້ອງວ່າການ ນວ ຮ່ວມ​ລົງ​ນາມ​ລະຫວ່າງທ່ານ ດາວ​ເພັດ ອາ​ລຸນ ຫົວໜ້າ​ພະ​ແນກ​ວິທະຍາສາດ ແລະ ເຕັກ​ໂນ​ໂລ​ຊີ ນວ ແລະ ທ່ານ ຈາງ ຕົງ​ຢາ ຜູ້​ອຳນວຍການ​ໃຫຍ່​ບໍລິສັດ ຫົວ​ເຫວີຍ ເຕັກໂນ​ໂລ​ຊີ​ລາວ ຈຳກັດ​ຜູ້​ດຽວ ມີທ່ານ ສິນ​ລະ​ວົງ ຄຸດ​ໄພທູນ ເຈົ້າຄອງ​ນະຄອນຫຼວງ​ວຽງ​ຈັນ ແລະ ພາກສ່ວນ​ກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ເພື່ອ​ສະໜອງ​ຂອບ​ການ​ເຮັດວຽກ​ ສຳລັບ​ໂຄງການ​ສຳ​ຫຼວດຄວາມ​ເປັນ​ໄປ​ໄດ້​ ໃນ​ການ​ສ້າງນະຄອນຫຼວງ​ວຽງ​ຈັນ​ອັດ​ສະ​ຣິຍະ ຄື: ອົງການ​ປົກຄອງ ນວ ເຫັນ​ດີ​ໃຫ້​ບໍລິສັດ​ຫົວ​ເຫວີຍ ດຳເນີນ​ການ​ສຳ​ຫຼວດ​ຄວາມ​ເປັນ​ໄດ້ໃນ​ການ​ສ້າງ​ແຜນ​ແມ່​ບົດ ການອອກ​ແບບ​ຮູບ​ແບບ​ທຸລະ​ກິດ ແລະ ການ​ສ້າງ ນວ ໃຫ້​ເປັນ​ຕົວເມືອງ​ອັດ​ສະ​ຣິ​ຍະ ຕາມ​ທິດ​ຕົວເມືອງ​ໜ້າ​ຢູ່ ແລະ ຍືນ​ຍົງ ໂດຍນຳ​ເອົາ​ເມືອງ​ໄຊ​ທານີ ເປັນ​ເມືອງທົດ​ລອງ​ເບື້ອງ​ຕົ້ນ ເຊິ່ງ​ຜ່ານ​ການດຳເນີນ​ການ​ທົດ​ລອງ ເຊິ່ງ​ບໍລິສັດ​ຫົວ​ເຫວີຍ​ເຫັນ​ດີ​ຊ່ວຍຮັບຜິດຊອບ​ຄ່າ​ໃຊ້​ຈ່າຍ​ຕ່າງໆ ເຂົ້າ​ໃນ​ການຈັດຕັ້ງ​ປະຕິບັດ​ໂຄງການ​ສຳ​ຫຼວດ​ຄວາມ​ເປັນ​ໄປ​ໄດ້ ເຊັ່ນ: ການ​ຈັດເກັບ​ພາສີ​ແບບ​ອັດ​ສະ​ຣິ​ຍະ ເຫັນດີ​ໃຫ້​ບໍລິສັດ ​ຫົວ​ເຫວີຍ ​ສຳ​ຫຼວດຄວາມ​ເປັນ​ໄປ​ໄດ້​ໃນ​ການ​ອອກແບບ​ລະບົບ​ຈັດ​ເກັບ​ພາສີ​ອັດ​ສະຣິ​ຍະ​ຢູ່​ເມືອງ​ໄຊ​ທານີ ໂດຍ​ລະບົບດັ່ງກ່າວ ​ຕ້ອງ​ສາມາດ​ເຊື່ອມ​ຕໍ່ເຂົ້າ​ກັບ​ລະບົບ​ຂອງ​ກະຊວງ​ການເງິນ​ລາວ​ ທີ່​ນຳ​ໃຊ້​ໃນ​ປັດຈຸບັນ ເຊິ່ງ​ລວມ​ມີ​ລະບົບ​ການ​ຄຸ້ມ​ຄອງໃບ​ເກັບ​ເງິນ​ສຳລັບ​ເຈົ້າ​ໜ້າທີ່​ອາກອນ ອຸປະກອນ​ທາງ​ການ​ເງິນ ສຳລັບ​ຜູ້​ເສຍ​ພາສີ​ຂະໜາດ​ໃຫຍ່ ແລະ ວິ​ສາ​ຫະ​ກິດ​ຂະໜາດ​ນ້ອຍ-ຂະໜາດ​ກາງ (SME) ເພື່ອເພີ່ມ​ທະວີ​ການ​ເຄົາລົບ​ລະບຽບ ການ​ຂອງ​ຜູ້​ເສຍ​ພາສີ​ອາກອນ ຕ້ານ​ການ​ຫຼົບ​ຫຼີກ​ເສຍ​ພາສີ ເພີ່ມອັດຕາ​ຄວາມ​ສາມາດ​ໃນ​ການຈັດ​ເກັບ​ພາສີ ແລະ ເພີ່ມ​ລາຍ​ຮັບຂອງ​ລັດຖະບານ.

ອົງການ​ປົກຄອງ​ ນວ ອັດ​ສະ​ຣິຍະ ລວມ​ມີ​ລະບົບ​ຂໍ້​ມູນ​ຂອງ ນວ ສູນ​ຂໍ້​ມູນ​ການ​ແລກປ່ຽນ​ຂໍ້​ມູນ ແລະ ລະບົບ​ຂໍ້​ມູນ​ຂ່າວສານ​ທາງພູມີສາດ ແລະ ອື່ນໆ ກໍ່ສ້າງ​ສູນບໍລິການ​ຜ່ານ​ປະຕູ​ດຽວ​ຂອງ ນວ ແລະ ການ​ບໍລິການ​ອອນ​ລາຍ ເພື່ອ​ໃຫ້​ບໍລິການ​ແບບ​ອອນ​ລາຍ ແລະ ອອນ​ລາຍ​ໂດຍ​ຜ່ານ​ປະຕູດຽວ​ຂອງ​ ນວ ໃຫ້​ແກ່​ພົນ​ລະເມືອງ ແລະ ວິ​ສາ​ຫະ​ກິດ​ຕ່າງໆ ເພື່ອ​ເຮັດ​ໃຫ້​ບັນດາ​ການ​ບໍລິການຂອງ​ລັດຖະບານ​ມີ​ຄວາມ​ສະດວກ ຍຸຕິ​ທຳ ມີ​ຄຸນະພາບ​ສູງ ມີຄວາມ​ປອດ​ໄພ ແລະ ມີ​ປະສິດທິ​ຜົນ.

ເຂດ​ອັດ​ສະ​ຣິ​ຍະ ເຫັນ​ດີ​ໃຫ້​ບໍລິ​ສັດ ​ຫົວ​ເຫວີຍ ​ດຳເນີນ​ການ​ສຳຫຼວດ​ຄວາມ​ເປັນ​ໄປ​ໄດ້​ໃນ​ການຈັດ​ຕັ້ງ​ປະຕິບັດ​ໂຄງການ​ດັ່ງກ່າວ ຢູ່​ເຂດ​ອຸດສາຫະກຳ​ຫຼັກ 21 ໂດຍສະເພາະ ການ​ກໍ່ສ້າງ​ອາຄານດ້ວຍ​ການ​ນຳ​ໃຊ້​ເຄື່ອງມື​ທີ່​ທັນ​ສະໄໝ​ທົດ​ແທນ​ແຮງ​ງານ​ຄົນ ຄວາມ​ປອດ​ໄພ​ໃນ​ເຂດ​ຕ່າງໆ ດ້ວຍ​ການ​ຫັນ​ເປັນ​ລະບົບ​ດີ​ຈິຕອນ ສາມາດ​ສັງເກດ​ເຫັນ​ໄດ້ ແລະ ຄຸ້ມ​ຄອງ​ໄດ້​ສະດວກ ເພື່ອຮັບປະກັນ​ການ​ປົກ​ປ້ອງ​ດ້ານ​ສະພາບ​ແວດ​ລ້ອມ ການ​ອະນຸ​ຮັກພະລັງງານ ແລະ ການ​ຮັກສາຄວາມ​ປອດ​ໄພ​ລະດັບ​ສູງ.

ການທ່ອງທ່ຽວ​ອັດ​ສະ​ຣິ​ຍະ ລວມ​ມີ​ປ່ອງ​ບໍ​ລິ​ການທ່ອງທ່ຽວ ການ​ປົກ​ຄຸມ​ຂອງ​ສັນຍານ​ວາຍຟາຍ ໜ້າ​ຈໍ​ໂຄສະນາ​ທີ່​ສະຫຼາດ ແລະ ອື່ນໆ ເພື່ອ​ເຊື່ອມ​ໂຍງ ແລະ ແບ່ງປັນ​ແຫຼ່ງ​ທ່ອງ​ທ່ຽວ ເພື່ອເພີ່ມ​ທະວີ​ຄວາມ​ພໍໃຈ​ຂອງ​ນັກທ່ອງ​ທ່ຽວ ດຶງ​ດູດ​ນັກ​ທ່ອງ​ທ່ຽວທັງ​ພາຍ​ໃນ ແລະ ຕ່າງປະເທດ ເພື່ອ​ສົ່ງເສີມ​ການ​ສ້າງ​ລາຍ​ຮັບດ້ານ​ເສດຖະກິດ​ການທ່ອງທ່ຽວ ແລະ ອຸດສາຫະກຳ​ການ​ທ່ອງທ່ຽວ​ຕາມ​ທິດ​ການ​ພັດທະນາແບບ​ຍືນ​ຍົງ ແລະ ສີຂຽວ.

ການ​ຄຸ້ມ​ຄອງ​ຕົວ​ເມືອງ​ອັດ​ສະຣິ​ຍະ ​ລວມ​ມີ​ລະບົບ​ໃຫ້​ແສງ​ສະຫວ່າງ​ຕາມ​ເສັ້ນທາງ ໂດຍ​ຜ່ານລະບົບ​ການ​ຄວບ​ຄຸມ​ຜ່ານ​ທາງອິນ​ເຕີ​ເນັດ ການ​ວາງ​ແຜນ​ດ້ານສຸ​ຂະ​ອະນາໄມ​ທີ່​ມີ​ປະ​ສິດທິ​ຜົນ ໜ້າ​ຈໍ​ໂຄສະນາ ລະບົບ​ເສົາ​ເກັບໄຟ ແລະ ລະບົບ​ເຕືອນ​ໄພ​ຢູ່​ຈຸດດຽວ ແລະ ອື່ນໆ ເພື່ອ​ປະຢັດ​ພະລັງ​ງານ ແລະ ຫຼຸດຜ່ອນ​ການປ່ອຍ​ມົນ​ລະ​ພິດ ຍົກ​ສູງ​ຄຸນະພາບ ແລະ ປະສິດທິພາບ​ຂອງ​ການ​ຄຸ້ມຄອງ​ຕົວ​ເມືອງ ແລະ ຍົກ​ສູງ​ຄຸ​ນະພາບ​ຂອງ​ຕົວ​ເມືອງ ແລະ ຄວາມສາມາດ​ພິເສດ​ດ້ານ​ເຕັກ​ໂນ​ໂລ​ຊີອັດ​ສະ​ຣິ​ຍະ ບໍລິສັດ ຫົວ​ເຫວີຍ ເຫັນ​ດີ​ຊ່ວຍ​ກໍ່ສ້າງ ແລະ ຍົກ​ລະດັບ​ຂີດ​ຄວາມ​ອາດ​ສາມາດ​ຂອງພະນັກງານ ນວ ທີ່​ຮັບຜິດຊອບວຽກ​ງານ​ຕ່າງໆ​ທີ່​ກ່ຽວຂ້ອງ ​ໃຫ້​ມີຄຸນະພາບ​ສູງ​ຂຶ້ນ​ໃນ​ແຕ່​ລະ​ໄລຍະ.

ພາບ ແລະ ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.