Header Ads

ພະອາຈານໃຫຍ່ຄຳເງິນ ຄຳວົງ ປະທານ ອພສ ແຂວງບໍ່ແກ້ວ, ເຈົ້າອະທິການວັດດອຍແດງພ້ອມດ້ວຍຄະນະໄດ້ລົງຢ້ຽມຢາມ ແລະ ສຶກສາອົບຮົມສິນທຳໃຫ້ແກ່ນັກໂທດຜູ້ຖືກດັດສ້າງ



ໃນຕອນເຊົ້າຂອງວັນທີ່ 10 ພະຈິກນີ້ ພະອາຈານ ຄຳເງິນ ຄຳວົງ ປະທານ ອພສ ແຂວງບໍ່ແກ້ວ, ເຈົ້າອະທິການວັດດອຍແດງ ພ້ອມດ້ວຍຄະນະໄດ້ລົງຢ້ຽມຢາມ ແລະ ສຶກສາອົບຮົມສິນທຳໃຫ້ແກ່ນັກໂທດຜູ້ຖືກດັດສ້າງຢູ່ຄ້າຍຄຸມຂັງ-ດັດສ້າງ ປກສ ແຂວງບໍ່ແກ້ວ ເປັນກຽດເຂົ້າຮ່ວມຂອງທ່ານ ພັທ ສີພົນ ອິນຕະວົງ ຮອງຫົວໜ້າຄ້າຍຄຸມຂັງ-ດັດສ້າງ ປກສ ແຂວງບໍ່ແກ້ວ ພ້ອມດ້ວຍພະນັກງານວິຊາການຕະຫຼອດຮອດນັກໂທດ ແລະ ຜູ້ຖືກດັດສ້າງເຂົ້າຮ່ວມ.





ໃນພິທີພະອາຈານ ຄຳເງິນ ຄຳວົງ ປະທານ ອພສ ແຂວງບໍ່ແກ້ວ, ເຈົ້າອະທິການວັດດອຍແດງກໍ່ໄດ້ເຊື່ອມຊຶມເອກະສານວ່າດ້ວຍ ບາບ-ບຸນ, ຄຸນ-ໂທດ ບາບຄືສິ່ງທີ່ບໍ່ດີ ບໍ່ເປັນປະໂຫຍດ ເຮັດແລ້ວກໍ່ໃຫ້ເກີດໂທດຫຼາຍຢ່າງຕາມມາ ໃນທາງພຸດທະສາສະໜາ ເມື່ອເຮັດບາບກໍ່ຄືເຮັດຊົ່ວ, ບຸນຄືສິ່ງທີ່ເປັນປະໂຫຍດ ຖ້າຜູ້ໃດເຮັດບຸນ ຜູ້ນັ້ນໄດ້ຊື່ວ່າຜູ້ເຮັດດີ ໃນທາງພຸດທະສາສະໜາ ການທີ່ຈະເຮັດດີນັ້ນບໍ່ໄດ້ຈຳກັດພຽງແຕ່ການກະທຳທາງກາຍເທົ່ານັ້ນ ການຄິດດີ ເວົ້າດີ ກໍ່ຄືການເຮັດບຸນຢ່າງໜຶ່ງ, ເວົ້າລວມແລ້ວ ການຄິດດີ ເວົ້າດີ ແລະ ເຮັດດີ ເປັນຊ່ອງທາງໃນການເຮັດຄວາມດີ ເອີ້ນວ່າບຸນ, ຄຸນຄືຄວາມງາມ ຄວາມດີ, ຜູ້ໃຫ້, ຜູ້ຊ່ວຍ, ຜູ້ສັ່ງສອນ, ຜູ້ເບິ່ງແຍງດູແລະ ແລະ ຜູ້ສະໜັບສະໜູນໃຫ້ຄວາມອົບອຸ່ນ, ໂທດຄືຜູ້ກະທຳຄວາມຜິດ, ຜິດຕໍ່ລະບຽບກົດໝາຍ, ຜິດຕໍ່ສິນທຳ, ຜິດຕໍ່ຂໍ້ຫ້າມ, ຝ່າຝືນບໍ່ຢ້ານກົວຕໍ່ລະບຽບກົດໝາຍຂອງບ້ານເມືອງ ເຊິ່ງຈະໄດ້ຮັບການລົງໂທດດ້ວຍກົດໝາຍ. 


 
ດັ່ງນັ້ນ, ນັກໂທດ, ຜູ້ຖືກດັດສ້າງ ຕ້ອງກຳແໜ້ນ ແລະ ເປັນແບບຢ່າງໃນການປະຕິບັດເນື້ອໃນ ບາບ-ບຸນ, ຄຸນ-ໂທດ ນຳໄປເປັນແນວທາງໃນການດຳລົງຊີວິດ ແລະ ການເຄື່ອນໄຫວໃນສັງຄົມຢ່າງຖືກຕ້ອງ, ຕ້ອງມີຄວາມອົດທົນໃນການອອກແຮງງານ ທຳການຜະລິດ ແກ້ໄຂຊີວິດການເປັນຢູ່, ຝຶກວິຊາຊີບ, ເຂົ້າຮ່ວມເຄື່ອນໄຫວກິດຈະກຳຕ່າງໆ ແລະ ປະຕິບັດກົດລະບຽບຂອງຂອງຄ້າຍຄຸມຂັງ-ດັດສ້າງວາງອອກຢ່າງເຂັ້ມງວດ.

ຂ່າວ: ຮຕ ລິນດາ ດວງປະເສີດ (ປກສ ແຂວງບໍ່ແກ້ວ )

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.