Header Ads

ລາວ-ຫວຽດນາມວາງສະແດງສື່ສິ່ງພິມທີ່ວຽງຈັນ






ກະຊວງຖະແຫລງຂ່າວວັດທະນະທຳແລະທ່ອງທ່ຽວ ແຫ່ງ ສປປ ລາວ ຮ່ວມກັບ ກະຊວງຖະແຫລງຂ່າວແລະການສື່ສານແຫ່ງ ສສຫວຽດນາມ ຈັດ​ງານ​ວາງສະ​ແດງ​ຮູບ​ພາບ, ປື້​ມ, ໜັງສື​ພິມ ​ແລະ ວາລະສານຂອງລາວ ​ແລະ ຫວຽດນາມ​ ​​ໃນ​ວັນທີ 2-4 ພະຈິກນີ້ ທີ່​ນະຄອນຫລວງ​ວຽງຈັນ, ​​ໂດຍ​ມີ​ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ​ແຫ່ງ ສປປ ລາວ, ທ່ານ ເຈື່ອງ ມິງ ຕ່ວນ ລັດຖະມົນຕີ ກະຊວງຖະແຫລງຂ່າວ ແລະ ການສື່ສານ ແຫ່ງ ສສ ຫວຽດນາມ, ທ່ານ ກິ​ແກ້ວ ​ໄຂ​ຄຳ​ພິທູນ ​ເລຂາທິການ​ສູນ​ກາງ​ພັກ, ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ ​ແລະ ພາກສ່ວນ​ກ່ຽວຂ້ອງເຂົ້າ​ຮ່ວມ.



ທ່ານ ບໍ່ແສງຄຳ ວົງດາລາ ​ກ່າວວ່າ: ງານ​ວາງສະ​ແດງ​ຮູບ​ພາບ, ປື້​ມ, ໝັງສື​ພິມ ​ແລະ ວາລະສານຕ່າງໆ ໃນຄັ້ງ​ນີ້, ສະ​ແດງ​ໃຫ້​ເຫັນ​ເຖິງ​ ຄວາມ​ກ້າວໜ້າ ທາງ​ດ້ານ​ວຽກງານ​ສື່ສິ່ງ​ພິມຂອງ ​ລາວ-​ຫວຽດນາມ ​ແລະ ຍັງ​ສ່ອງ​ແສງ​ໃຫ້​ເຫັນ​ເຖິງ ຮີດຄອງ​ປະ​ເພນີ ​ແລະ ວັດທະນະທຳ​ອັນ​ດີງາມຂອງ​ປະຊາຊົນສອງຊາດ ​ລາວ-​ຫວຽດນາມ. ງານ​ວາງສະ​ແດງ​ດັ່ງກ່າວ, ​ປະກອບ​ມີ ສື່ສິ່ງ​ພິມ 475 ຢ່າງ, ປື້​ມຂຽນກ່ຽວກັບປະ​ເທດ​ ລາວ-​ຫວຽດນາມ​ ຫລາຍກວ່າ 80 ຫົວ, ຮູບ​ພາບ 240 ຮູບ​, ​​ເຊິ່ງມີເນື້ອ​ໃນ​ສະ​ແດງໃຫ້​ເຫັນ​ເຖິງ ​ສາຍ​ພົວພັນ​ອັນ​ເປັນ​ມູນ​ເຊື້ອ, ຄວາມ​ສາມັກ​ຄີພິ​ເສດ ​ລະ​ຫວ່າງ​ສອງ​ຊາດ ​ລາວ-​ຫວຽດນາມ.



ງານ​ວາງສະ​ແດງ​ຮູບ​ພາບ ແລະ ບັນດາສື່ສິ່ງພີມໃນ​ຄັ້ງ​ນີ້, ​ເປັນ​ການ​ເປີດໂອກາດ​​​ ໃຫ້​ສື​ມວນ​ຊົນ​ລາວ-ຫວຽດນາມ ໄດ້ພົບ​ປະ​ແລ​ກປ່ຽນບົດຮຽນ, ຍົກ​ສູງ​ປະສິດທິ​ຜົນ ​ໃນ​ວຽກງານ​ໂຄສະນາ ຖະ​ແຫ​ລງຂ່າວ, ທັງເປັນການເພີ່ມພູນຄູນສ້າງ ຄວາມສາມັກຄີີຮັກແພງ ທີ່​ເປັນ​ມູນ​ເຊື້ອ ແລະ ຄວາມ​ສາມັກຄີ​ແບບພິ​ເສດ ​ແລະ ກາ​ນຮ່ວມ​ມື​ຮອບດ້ານ ລະຫວ່າ​ງ ສອງ​ພັກສອງລັດ ກໍຄື ປະຊາຊົນສອງຊາດ ລາວ-ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນ.


ພາບ ແລະ ຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.