Header Ads

ຫົວໜ້າຄະນະຈັດຕັ້ງສູນກາງພັກລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ທ່າແຕງ





ແຂວງເຊກອງ : ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງ ທ່າແຕງ ແຂວງ ເຊກອງ ໃນຕອນເຊົ້າວັນທີ 1 ພະຈິກ 2017 ນີ້. ເຊິ່ງໄດ້ຮັບກຽດຕ້ອນຮັບຢ່າງອົບອຸ່ນຈາກທ່ານ ປອ ຄໍາພຽມ ບົວລະພາ ຮອງເລຂາພັກແຂວງ ຮອງເຈົ້າແຂວງ ເຊກອງ, ໂດຍມີກໍາມະການພັກແຂວງ, ຄະນະປະຈໍາພັກເມືອງ, ກໍາມະການພັກເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານລັດຖະກອນ ພ້ອມດ້ວຍອໍານາດການປົກຄອງບ້ານຫຼາຍຮ້ອຍຄົນເຂົ້າຮ່ວມ.



ໃນກອງປະຊຸມສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ລາຍງານສະພາບການເຄື່ອນໄຫວຂອງເມືອງ ໃຫ້ສະຫາຍຫົວໜ້າຄະນະຈັດຕັ້ງສູນກາງພັກຊາບ ເຊິ່ງມີບາງຕອນທ່ານກ່າວວ່າ: ເມືອງ ທ່າແຕງພວກເຮົາ ໄດ້ພະຍາຍາມປັບປຸງຄຸນນະພາບຂອງສະມາຊິກພັກ ດ້ວຍການສຶກສາອົບຮົມການເມືອງແນວຄິດ,ຈັດຕັ້ງຮໍ່າຮຽນແນວທາງນະໂຍບາຍ, ມະຕິ, ຄໍາສັ່ງ ແລະ ນິຕິກໍາຕ່າງໆຂອງພັກຢ່າງກວ້າງຂວາງ ໂດຍຕິດພັນກັບການຄຸ້ມຄອງປ້ອງກັນພັກ-ພະນັກງານ, ການຂະຫຍາຍພັກກໍໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ, ຖືຄຸນນະພາບເປັນກົກ, ປະຕິບັດຕາມຂັ້ນຕອນ ແລະ ກົດລະບຽບຂອງພັກ. ມາຮອດປະຈຸບັນມີຈໍານວນສະມາຊິກພັກທັງໝົດ 1.680 ສະຫາຍ, ຍິງ 335 ສະຫາຍ, ທຽບໃສ່ປີ 2016 ເພີ່ມຂື້ນ 7,97%, ໃນນີ້ ມີສະມາຊິກພັກແຂງຮອບດ້ານ 875 ສະຫາຍ, ຍິງ 143 ສະຫາຍ, ແຂງບາງດ້ານມີ 600 ສະຫາຍ, ຍິງ 157 ສະຫາຍ, ສະມາຊິກພັກກາງມີ 189 ສະຫາຍ, ຍິງ 35 ສະຫາຍ, ອ່ອນມີ 17 ສະຫາຍ, ບໍ່ໄດ້ຈັດປະເພດມີ 1 ສະຫາຍ, ສາມາດລົບລ້າງບ້ານຂາວ ທີ່ບໍ່ມີສະມາຊິກພັກໄດ້ຢ່າງສົມບູນ ແລະ ໄດ້ມີຄວາມພະຍາຍາມປັບປຸງແບບແຜນນໍາພາຂອງຕົນໃຫ້ເຂົ້າສູ່ລະບຽບຫຼັກການ, ປະຕິບັດລະບອບຄວບຕໍາແໜ່ງເປັນສວນຫຼາຍ ນັບແຕ່ຂັ້ນເມືອງລົງຮອດຮາກຖານບ້ານ, ສົມທົບການນໍາພາຂອງພັກ, ເຊີດຊູການຄຸ້ມຄອງຂອງລັດ, ເສີມຂະຫຍາຍເປັນເຈົ້າຂອງບັນດາອົງການຈັດຕັ້ງມະຫາຊົນ, ປະຕິບັດລະບອບລວມສູນປະຊາທິປະໄຕ ນໍາພາເປັນໝູ່ຄະນະ, ບຸກຄົນຮັບຜິດຊອບ, ພາຍໃນພັກມີຄວາມສາມັກຄີເປັນເອກະພາບ, ອັນພົ້ນເດັ່ນ ໄດ້ຈັດຕັ້ງການດໍາເນີນຊີວິດການເມືອງພາຍໃນທົ່ວພັກຂຶ້ນກັບເມືອງ, ການຄຸ້ມຄອງພະນັກງານໄດ້ຫັນເຂົ້າສູ່ລະບົບຕາມການແບ່ງຂັ້ນຄຸ້ມຄອງ, ຫຼາຍຫ້ອງການເຮັດໃຫ້ການຄຸ້ມຄອງຂໍ້ມູນພະນັກງານລັດຖະກອນ ໄດ້ນໍາໃຊ້ລະບົບເຕັກນິກທີ່ທັນສະໄໝເທື່ອລະກ້າວ, ສາມາດຕິດຕາມ, ກວດກາດ້ານຈໍານວນ, ຊີວະປະຫວັດມີຄວາມສະດວກວ່ອງໄວ ແລະ ຊັດເຈນຂຶ້ນກວ່າເກົ່າ. ມາຮອດປະຈຸບັນມີພະນັກງານລັດຖະກອນທົ່ວເມືອງທັງໝົດ 922 ສະຫາຍ, ຍິງ 379 ສະຫາຍ, ອັນພົ້ນເດັ່ນ ໄດ້ສໍາເລັດການແຈ້ງຊັບສິນຂອງພະນັກງານໃນຮອບທີ 1 ແລະ ກ້າວເຂົ້າມາຮອບທີ 2 ໃນປັດຈຸບັນ.



ໃນໂອກາດນີ້ ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ ຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດໂອ້ລົມຕໍ່ພະນັກງານຫຼັກແຫຼ່ງ ພາຍໃນເມືອງ ທ່າແຕງ ເຊິ່ງທ່ານໄດ້ ສະແດງຄວາມຍ້ອງຍໍຊົມເຊີຍເປັນຢ່າງສູງທີ່ໄດ້ເອົາໃຈໃສ່ປະຕິບັດໜ້າທີ່ ແລະ ຄວາມຮັບຜິດຊອບຂອງຕົນ ໂດຍສະເພາະ ວຽກງານພັກ-ພະນັກງານ, ວຽກງານປ້ອງກັນຊາດປ້ອງກັນຄວາມສະຫງົບ, ເສດຖະກິດ, ການພັດທະນາພື້ນຖານໂຄງລ່າງ, ເຂດຊົນນະບົດ, ວັດທະນະທໍາ-ສັງຄົມ, ການດໍາເນີນຊີວິດການເມືອງ ພ້ອມທັງເນັ້ນໜັກໃຫ້ກວດກາເບິ່ງຄືນບັນດາຄາດໝາຍ ແລະ ແຜນພັດທະນາເສດຖະກິດ-ສັງຄົມຂອງເມືອງ, ມີອັນໃດທີ່ເຫັນວ່າຍັງປະຕິບັດບໍ່ທັນໄດ້ດີ ແມ່ນໃຫ້ພ້ອມກັນຮີບຮ້ອນຫາທາງແກ້ໄຂ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ-ທັນກັບເວລາ, ສືບຕໍ່ເອົາໃຈໃສ່ທຸກຂົງເຂດວຽກງານຢ່າງແຂງແຮງ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆໃນສັງຄົມ, ຂີ້ລັດງັດແງະ, ການແບ່ງແຍກຄວາມສາມັກຄີ, ການຍຸໂຍງສົ່ງເສີມ ປະຊາຊົນໄປໃນທາງທີ່ບໍ່ຖືກຕ້ອງ, ສືບຕໍ່ຊີ້ນໍາໆພາປະຊາຊົນເຂົ້າໃນການປູກຝັງ, ລ້ຽງສັດ, ການບໍລິການ, ຫັດຖະກຳ-ອຸດສາຫະກຳຂະໜາດນ້ອຍ ໂດຍເລີ່ມຈາກທ່າແຮງຂອງແຕ່ລະຄອບຄົວເປັນສຳຄັນເຊັ່ນ: ທ່າແຮງດ້ານທີ່ດິນ, ແຮງງານ ທີ່ເປັນມູນເຊື້ອຂອງປະຊາຊົນ ແລະ ທຶນຮອນເປັນຫຼັກ ໃຫ້ຄຽງຄູ່ກັບຄວາມດຸໝັ່ນຂະຫຍັນພຽນໃຫ້ໄດ້ທັງປະລິມານ ແລະ ຄຸນນະພາບ, ທັງນີ້ ກໍເພື່ອປະກາດເມືອງ ທ່າແຕງ ໃຫ້ເປັນເມືອງຫຼຸດພົ້ນອອກຈາກຄວາມທຸກຍາກໃນປີ 2020.

ຂ່າວ : ພອນ ບຸນອຸທິດ/ຂ່າວແຂວງເຊກອງ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.