Header Ads

ກອງປະຊຸມໂຕະມົນ ປະຈຳປີ 2017 ພາຍ​ໃຕ້​ຫົວ​ຂໍ້ ການ​ເຊື່ອມ​ສານ​ເປົ້າ​ໝາຍ​ ການ​ພັດທະນາ​ແບບ​ຍືນ​ຍົງ ​ແລະ ການ​ກະກຽມ​ປະ​ເທດ ຕໍ່​ການ​ປະ​ເມີນ​ຄວາມ​ພ້ອມ ​ໃນ​ການ​ຫລຸດ​ພົ້ນ ຈາກ​ສະຖານະ​ພາບ​ ປະ​ເທດ​ດ້ອຍ​ພັດທະນາ



ກອງ​ປະຊຸມ​ໂຕະມົນ ປະຈຳ​ປີ 2017 ຈະ​ຈັດ​ຂຶ້ນ​ໃນ​ວັນ​ທີ 22-23 ພະຈິກ 2017, ຢູ່ ​ແຂວງ​ ຈຳປາ​ສັກ, ​ໂດຍ​ພາຍ​ໃຕ້​ຫົວ​ຂໍ້ “ການ​ເຊື່ອມ​ສານ​ເປົ້າ​ໝາຍ​ ການ​ພັດທະນາ​ແບບ​ຍືນ​ຍົງ ​ແລະ ການ​ກະກຽມ​ປະ​ເທດ ຕໍ່​ການ​ປະ​ເມີນ​ຄວາມ​ພ້ອມ ​ໃນ​ການ​ຫລຸດ​ພົ້ນ ຈາກ​ສະຖານະ​ພາບ​ ປະ​ເທດ​ດ້ອຍ​ພັດທະນາ”.

​ໃນວັນ​ທີ 10 ພະຈິກ 2017 ຢູ່​ນະຄອນຫລວງ​ວຽງ​ຈັນ ​ໄດ້​ມີ​ກອງ​ປະຊຸມ ​ປຶກສາ​ຫາລື​ ເພື່ອ​ກະກຽມ​ຄວາມ​ພ້ອມ​ ໃຫ້​ແກ່​ກອງ​ປະຊຸມ​ໂຕະມົນ ປະຈຳ​ປີ 2017 ​ໂດຍ​ມີ ​ທ່ານ​ ນາງ ຄຳ​ເພົາ ​ເອີນ​ທະ​ວັນ ຮອງ​ລັດຖະມົນຕີ ​ກະຊວງ​ການ​ຕ່າງປະ​ເທດ, ມີ​ບັນດາ​ຫົວໜ້າ​ກົມ, ຜູ້ຕາງໜ້າ​ຈາກອົງການ​ ສະຫະ​ປະຊາ​ຊາດ​ ເພື່ອ​ການ​ພັດທະນາ, ກະຊວງ, ຂະ​ແໜງ​ການ ​ແລະ ພາກສ່ວນ​ກ່ຽວ​ຂ້ອງ ​ເຂົ້າ​ຮ່ວມ.

ໂອກາດ​ດັ່ງກ່າວ, ທ່ານ ​ນາງ ຄຳ​ເພົາ ​ເອີນ​ທະ​ວັນ ​ໄດ້​ຂຶ້ນ​ກ່າວ​ເປີດ​ກອງ​ປະຊຸມ ​ໂດຍ​ໄດ້​ຍົກ​ໃຫ້​ເຫັນ​ເຖິງ​ຈຸດປະສົງ ​ຂອງການຈັດ​ກອງ​ປະຊຸມ​ດັ່ງ​ກ່າວ, ​​ແມ່ນເພື່ອ​ປຶກສາ​ຫາລື ກ່ຽວ​ກັບ​ຄວາມ​ຄື​ບໜ້າ​ ຂອງ​ວຽກ​ງານ​ການຫລຸດ​ພົ້ນ​ ອອກ​ຈາກ​ສະຖານະ​ພາບ​ ປະ​ເທດ​ດ້ອຍ​ພັດທະນາ ​ແລະ ການ​ບັນລຸ​ເປົ້າ​ໝາຍ ​ການ​ພັດທະນາ​ແບບ​ຍືນ​ຍົງ, ​ກະກຽມ​ຄວາມ​ພ້ອມ​ ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ຕ່າງໆ ​ເຊິ່ງການ​ຊຸກຍູ້​ວຽກ​ງານ​ ດ້ານ​ການ​ຫລຸດ​ພົ້ນ ຈາກ​ສະຖານະ​ພາບ​ ປະ​ເທດ​ດ້ອຍ​ພັດທະນາ ລັດຖະບານ​ແຫ່ງ ສປປ ລາວ ​ໄດ້​ປະຕິບັດ​ພັນທະ​ຢ່າງ​ເຂັ້ມ​ງວດ ຕາມ​ແຜນ​ດຳ​ເນີນ​ງານ​ ຂອງ​ແຜນ​ງານ​ອິດ​ສະ​ຕັນ​ບູນ ກໍ​ຄື ​ການ​ເຊື່ອມ​ສານ​ເປົ້າ​ໝາຍ​ ກາ​ນພັດ​ທະນາ​ແບບ​ຍືນຍົງ ​ແລະ ຄາດໝາຍ​ສູ້​ຊົນ ​ເຂົ້າ​ໃນ​ຍຸດ​ທະ​ສາດ​ການ​ພັດທະນາ ​ເສດຖະກິດ-ສັງຄົມ ​ໄລຍະ 10 ປີ (2016-2025) ​ແລະ ວິ​ໄສ​ທັດ 2030, ພ້ອມ​ທັງ​ແຜນ​ພັດທະນາ ​ເສດຖະກິດ-ສັງຄົມ 5 ປີ ຄັ້ງ​ທີ VIII (2016-2020). ຫລັງ​ຈາກ​ນັ້ນ, ທ່ານ ​ນາງ ຄາຣີນາ ອິມ​ໂມ​ເນັນ ຜູ້ຕາງໜ້າ​ອົງການ ​ສະຫະ​ປະຊາ​ຊາດ​ ເພື່ອ​ການ​ພັດທະນາ ໄດ້​ອະທິບາຍ​ໃຫ້​ຮູ້​ວ່າ: ​ໃນ​ການ​ບັນລຸ​ຈຸດປະສົງ​ ທາງ​ດ້ານ​ການ​ເຊື່ອມ​ສານເປົ້າ​ໝາຍ​ ກາ​ນພັດ​ທະນາ​ແບບ​ຍືນຍົງ ​ແລະ ການ​ຫລຸດ​ພົ້ນ​ອອກ​ຈາກ​ ສະຖານະ​ພາບ ປະ​ເທດ​ດ້ອຍ​ພັດທະນາ, ການ​ມີ​ລະບົບ​ສະຖິຕິ​ ທີ່​ມີ​ຄວາມ​ແນ່ນອນ, ທັນ​ການ ​ແລະ ລະອຽດ​ນັ້ນ​ແມ່ນ​ມີ​ ຄວາມ​ສຳຄັນ​ທີ່​ສຸດ ​ເພາະພວກ​ເຮົາ​ຈຳ​ເປັນ​ຕ້ອງ​ໄດ້​ມີ​ ຂໍ້​ມູນ​ທີ່​ຖືກຕ້ອງ ​ເພື່ອ​ປະກອບສ່ວນ​ເຂົ້າ​ໃນ​ ການ​ວິ​ເຄາະ​ບັນຫາ, ຕິດຕາມ​ຄວາມ​ຄືບ​ໜ້າ ​ແລະ ອື່ນໆ.

ພ້ອມ​ນີ້, ທ່ານ​ຍັງ​ໄດ້​ແຈ້ງ​ຕໍ່​ກອງ​ປະຊຸມ ​ເພື່ອ​ສ້າງ​ຄວາມ​ສົນ​ໃຈ ​ໃຫ້​ແກ່​ຜູ້​ເຂົ້າຮ່ວມ​ ນຳ​ໃຊ້​ເວັບ​ໄຊ ຂອງ​ໂຕະມົນ ​(rtm.org.la), ​ເຊິ່ງ​ເປັນ​ແຫ​ລ່ງຂໍ້​ມູນ​ ກ່ຽວ​ກັບ​ກອງ​ປະຊຸມ​ໂຕະມົນ ທີ່​ທຸກ​ຄົນ​ສາມາດ​ເຂົ້າ​ເບິ່ງ​ໄດ້. 

ພາບ ແລະ ຂ່າວ: ທະນູ​ທອງ/ຂປລ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.