Header Ads

ຊາວໜຸ່ມນໍ້າປະປາແຂວງ ສາລະວັນເປີດຂະບວນການ 4ບຸກ





ວັນທີ 3 ພະຈິກ 2017 ຜ່ານມານີ້ ໜ່ວຍຮາກຖານຊາວໜຸ່ມລັດວິສາຫະກິດນ້ຳປະປາແຂວງສາລະວັນ ໄດ້ເປີດຂະບວນການຂໍ້ແຂ່ງຂັນ 4 ບຸກ ຄັ້ງທຳອິດ, ໂດຍການເປັນປະທານ ທ່ານ ນາງ ລັດດາພອນ ກຸນລະວົງ ເລຂາຄະນະຮາກຖານຊາວໜຸ່ມນ້ຳປະປາແຂວງ, ໃຫ້ກຽດເຂົ້າຮ່ວມຂອງ ທ່ານ ສຸວຽງທອງ ສຸຂະວົງ ຮອງເລຂາຄະນະບໍລິຫານງານຊາວໜຸ່ມແຂວງ, ມີບັນດາຄະນະພັກຮາກຖານ, ສະມາຊິກຊາວໜຸ່ມອ້ອມຂ້າງ ແລະແຂກທີ່ຖືກເຊີນເຂົ້າຮ່ວມ.



ທ່ານ ເທບດວງຈັນ ຈິດຕະວົງ ຮອງເລຂາຄະນະຮາກຖານຊາວໜຸ່ມ ໄດ້ຂຶ້ນຜ່ານແຜນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ເຊິ່ງເປັນຄັ້ງທຳອິດ ຂອງລັດວິສາຫະກິດນ້ຳປະປາແຂວງເປັນຕົ້ນ: 1, ບຸກບືນທາງດ້ານແນວຄິດໃຫ້ໄດ້ 87% ຈະເອົາໃຈໃສ່ສຶກສາອົບຮົມຄຸນທາດການເມືອງໃຫ້ໜັກແໜ້ນເຂັ້ມແຂງ ແລະໃຫ້ມີຄວາມຮັບຮູ້, ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ, ເປັນເຈົ້າການໃນການປະຕິບັດໜ້າທີ່ວຽກງານຕາມການຈັັດຕັ້ງມອບໝາຍໃຫ້ສຳເລັດດ້ວຍຄວາມຮັບຜິດຊອບສູງ. 2, ສູ້ຊົນເອົາໃຈໃສ່ຝຶກຝົນຫຼໍ່ຫຼອມຮ່ຳຮຽນໃຫ້ໄດ້ 87%, ຍົກສູງຄວາມຮູ້ຄວາມສາມາດໃຫ້ສະມາຊິກຊາວໜຸ່ມໃຫ້ກາຍເປັນຄົນທີ່ມີຫົວຄິດປະດິດສ້າງ, ມີຄຸນສົມບັດສິນທຳປະຕິວັດ ແລະ ມີແບບແຜນການດຳລົງຊີວິດທີ່ປອດໃສຂາວສະອາດ, ແລະມີທັດສະນະຫ້າວຫັນຕໍ່ການປະຕິບັດໜ້າທີ່ວຽກງານ ແລະສູ້ຊົນໃຫ້ສະມາຊິກໄດ້ຮັບການຍົກລະດັບຄວາມຮູ້ໃນວຽກງານຕ່າງໆ. 3, ບຸກບືນທາງດ້ານການຈັດຕັ້ງໃຫ້ໄດ້ 90% ເອົາໃຈໃສ່ປັບປຸງແບບແຜນວິທີເຮັດວຽກໃຫ້ສອດຄ່ອງ ແລະຮັບປະກັນທາງດ້ານຄຸນນະພາບ, ປະລິມານ, ພ້ອມກັນນັ້ນເອົາໃຈໃສ່ຕິດພັນສະໜິດແໜ້ນກັບອົງການຈັດຕັ້ງມະຫາຊົນພາຍນອກ ແລະຮາກຖານອື່ນເພື່ອສ້າງຄວາມສາມັກຄີ ເພື່ອເຮັດໃຫ້ໜ່ວຍໄດ້ຮັບການປະກາດເປັນໜ່ວຍຊາວໜຸ່ມ 4 ບຸກໃນຕໍ່ໜ້າ ແລະ 4, ບຸກດ້ານວິຊາອາຊີບວຽກເຮັດງານທຳ ເອົາໃຈໃສ່ຍົກສູງຄວາມຮັບຜິດຊອບຕໍ່ອາຊີບຂອງສະມາຊິກຊາວໜຸ່ມເປັນຕົ້ນ: ການດຳລົງຊີວິດດ້ວຍຄວາມປະຢັດມັດທະຍັດ, ເປັນເຈົ້າການໃນການສ້າງຄວາມເຂັ້ມແຂງທາງດ້ານອາຊີບ, ສ້າງເສດຖະກິດຄອບຄົວເພີ່ງຕົນເອງກຸ້ມຕົນເອງ ແລະກາຍເປັນຄອບຄົວທີ່ເຂັ້ມແຂງໃນສັງຄົມ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ ໂດຍສະເພາະພາຍໃນໜ່ວຍຈະສູ້ຊົນໃຫ້ໄດ້ 87%.



ຮາກຖານຊາວໜຸ່ມນ້ຳປະປາແຂວງສາລະວັນ ມີສະມາຊິກຊາວໜຸ່ມທັງໝົດ 19 ສະຫາຍ, ຍິງ 8 ສະຫາຍ, ໃນນັ້ນຢູ່ໃນອົງການຈັດຕັ້ງພັກ 9 ສະຫາຍ, ຍິງ 2 ສະຫາຍ, ອົງການຈັດຕັ້ງກຳມະບານ 19 ສະຫາຍ ແລະອົງການຈັດຕັ້ງສະຫາພັນແມ່ຍິງ 8 ສະຫາຍ. ໃນຕອນທ້າຍກໍ່ໄດ້ມີການຈັບມືເປີດຂະບວນການແຂ່ງຂັນຊາວໜຸ່ມ 4 ບຸກຂອງໜ່ວຍຮາກຖານຊາວໜຸ່ມລັດວິສາຫະກິດນ້ຳປະປາແຂວງສາລະວັນ.




ຂ່າວ-ພາບ: ທິດລານີ ໂຄດໂຍທາ (ໜັງສືພິມ ສາລະວັນ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.