Header Ads

ຄະນະສານອາຍາ ພິຈາລະນາອິດສະຫຼະພາບ 3 ປີ ປັບໃໝ 3 ລ້ານກີບ ຜົວ-ເມຍຊາວຕ່າງຊາດ ຖານລັກຊັບພົນລະເມືອງ



ອີງຕາມການລາຍງານຂອງ ນສພ ຄວາມສະຫງົບ ວ່າ : ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ນໍາເອົາສໍານວນຄະດີສອງຜົວ-ເມຍຄົນຕ່າງປະເທດ ທີ່ເຄື່ອນໄຫວລັກຊັບພົນລະເມືອງຢູ່ດິນແດນ ສປປ ລາວ ຂຶ້ນພິຈາລະນາຕັດສິນໃນທ້າຍອາທິດຜ່ານມາ ຂໍ້ຫາລັກຊັບພົນລະເມືອງ. ໂດຍຈໍາເລີຍ ຊື່ທ້າວ ເມໂກ້ ອາຍຸ 50 ປີ ແລະ ນາງ ມາເລຍຊີຕິນ້າ ກິດ ອາຍຸ 50 ປີ ເຊິ່ງທັງສອງເປັນຄົນເຊື້ອຊາດ-ສັນຊາດເປຣູ, ອາຊີບຄ້າຂາຍ ພັກເຊົາຢູ່ໂຮງແຮມເຂດບ້ານໝາຍໂສກ ເມືອງຈັນທະບູລີ ນະຄອນຫຼວງວຽງຈັນ.




ຄະນະສານອາຍາ ໄດ້ພິຈາລະນາ ບັນດາຂໍ້ມູນ ແລະ ຫຼັກຖານ ການກະທໍາຜິດຂອງຈໍາເລີຍທັງສອງ ເຫັນວ່າ: ຈຳເລີຍໄດ້ມີເຈດຕະນາເຄື່ອນໄຫວລັກຊັບພົນລະເມືອງ ໂດຍໄດ້ສະແດງອອກຈາກພຶດຕິກຳທີ່ມີການວາງແຜນຈຶ່ງກໍ່ເຫດ. ສະນັ້ນ, ສານຈຶ່ງເຫັນຄວນຕັດສິນຕັດອິດສະຫຼະພາບ ທ້າວ ເມໂກ້ 3 ປີ ປັບໃໝ 3.000.000 ກີບ ແລະ ນາງ ມາເລຍ 1 ປີ 9 ເດືອນ ປັບໃໝ 1.500.00 ກີບ ສະຖານລັກຊັບພົນລະເມືອງ.ຄະດີດັ່ງກ່າວ, ເບື້ອງຕົ້ນໃນວັນທີ 6 ພະຈິກ 2016 ທ້າວ ສຸກສາຄອນ (ຜູ້ເສຍຫາຍ) ຢູ່ບ້ານສີບຸນເຮືອງ ເມືອງຈັນທະບູລີ ນະຄອນຫຼວງວຽງຈັນ, ຂັບລົດໃຫຍ່ ໝາຍເລກທະບຽນ ທຮ 5555 ກຳແພງນະຄອນ ເອົາເງິນຈຳນວນ 116.700.000 ກີບ ໄປແລກປ່ຽນເອົາເງິນບາດໄທ ຢູ່ຮ້ານແລກປຽນເງິນຕາລ້ານຊ້າງ ຢູ່ບ້ານຫັດສະດີ ເມືອງຈັນທະບູລີ ແລ້ວຈຳເລີຍທັງສອງ ແລະ ໝູ່ອີກສອງຄົນ ຊື່ທ້າວ ເດຍ ແລະ ທ້າວ ອາລີ ໄດ້ພາກັນສັງເກດຕິດຕາມການເຄື່ອນໄຫວຂອງຜູ້ເສຍຫາຍ.

ຈາກນັ້ນ, ທ້າວ ເມໂກ້ ໄດ້ນຳເອົາເຫຼັກແຫຼມໄປວາງໃສ່ຢາງລົດຂອງ ທ້າວ ສຸກສາຄອນ ເມື່ອ ທ້າວ ສຸກສາຄອນ ອອກຈາກຮ້ານແລກປ່ຽນເງິນຕາ ນຳເງິນໃສ່ຜ້າຂາວວາງໄວ້ເບາະດ້ານຫຼັງລົດ ແລ້ວຂັບອອກໄປ ເມື່ອມາຮອດເຂດບ້ານສີບູນເຮືອງ ເມືອງຈັນທະບູລີ ຢາງລົດກໍຮົ່ວ ທ້າວ ສຸກສາຄອນ ກໍນຳລົດເຂົ້າໄປຮ້ານຈອດຢາງ ໃນຂະນະທີ່ ທ້າວ ສຸກສາຄອນ ລົງໄປເບິ່ງຊ່າງປ່ຽນຢາງລົດນັ້ນ ທ້າວ ເມໂກ້ ໄດ້ເຂົ້າໄປໄຂປະຕູລົດດ້ານກົງກັນຂ້າມ ເອົາເງິນຈຳນວນດັ່ງກ່າວແລ້ວລົບໜີໄປ, ມາວັນທີ 14 ພະຈິກ 2016 ເຈົ້າໜ້າທີ່ຕໍາຫຼວດກໍສາມາດກັກຕົວ ທ້າວ ເມໂກ້ ແລະ ນາງ ມາເລຍ ຢູ່ຫ້ອງເຊົ່າບ້ານຫາຍໂສກ ຍ້ອນວ່າໃນເວລາທີ່ ທ້າວ ເມໂກ້ ລັກເອົາເງິນໃນລົດນັ້ນ ມີປະຊາຊົນຢູ່ໃນເຂດດັ່ງກ່າວເຫັນພຶດຕິກຳ ແລະ ແຈ້ງຮູບຮ່າງລັກສະນະໃຫ້ເຈົ້າໜ້າທີ່ຕິດຕາມກັກຕົວ, ພາຍຫຼັງເຈົ້າໜ້າທີ່ກັກຕົວແລ້ວ ໄດ້ກວດຄົ້ນຫ້ອງພັກພວກກ່ຽວພົບເງິນຈຳນວນ 660.000 ບາດ ມາດຳເນີນຄະດີ


ແຫຼ່ງຂ່າວ: ນສພ ຄວາມສະຫງົບ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.