Header Ads

ຮອງນາຍົກເນັ້ນໃຫ້ບຸກບືນສູ້ຊົນຈັດເກັບລາຍຮັບງົບປະມານໃຫ້ໄດ້ຕາມແຜນການ








ແຂວງຈໍາປາສັກ : ວັນທີ 23 ພະຈິກ 2017, ໃນໂອກາດທ່ີທ່ານ ສົມດີ ດວງດີ ຮອງນາຍົກລັດຖະມົນຕີແຫ່ງ ສປປ ລາວ ລັດຖະມົນຕີກະຊວງການເງິນ ເດີນທາງມາຮ່ວມກອງປະຊຸມໂຕະມົນ ປະຈໍາປີ 2017 ຢູ່ແຂວງຈໍາປາສັກ ທ່ານກໍ່ໄດ້ພົບປະໂອ້ລົມອໍານາດການປົກຄອງແຂວງ ແລະ ຂະແໜງການກ່ຽວຂ້ອງ ເພື່ອຊຸກຍູ້ການຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນການ.


ການພົບປະໂອ້ລົມອໍານາດການປົກຄອງແຂວງ ແລະ ຂະແໜງການກ່ຽວຂ້ອງຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນຄັ້ງນີ້ ຈັດຂຶ້ນຢູ່ສໍານັກງານປົກຄອງແຂວງ. ເຂົ້າຮ່ວມຮັບຟັງການໂອ້ລົມ ມີທ່ານ ບົວສອນ ວົງສອງຄອນ ຮອງເຈົ້າແຂວງໆຈໍາປາສັກ, ທ່ານ ສາລີ ຄໍາຜອງ ຫົວໜ້າພະແນກການເງິນແຂວງ ພ້ອມດ້ວຍການນໍາຈາກກົມຕ່າງໆຂອງກະຊວງການເງິນ, ການນໍາ ແລະ ພະນັກງານວິຊາການຈາກພະແນກການເງິນແຂວງ, ພະແນກສ່ວຍສາອາກອນແຂວງ, ກອງກວດກາພາສີ, ຄັງເງິນແຫ່ງຊາດປະຈໍາແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນການພົບປະໂອ້ລົມ, ກ່ອນອື່ນ ທ່ານ ສາລີ ຄໍາຜອງ ຫົວໜ້າພະແນກການເງິນແຂວງ ໄດ້ລາຍງານສະພາບຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດງົບປະມານ ໃນ 10 ເດືອນ ປີ 2017 ແລະ ຕົວເລກຄາດຄະເນການຈັດເກັບລາຍຮັບ ໃນ 2 ເດືອນ ທ້າຍປີ 2017 ໃຫ້ທ່ານ ສົມດີ ດວງດີ ຮັບຊາບ. ຈາກນັ້ນ ບັນດາການນໍາຈາກກົມຕ່າງໆຂອງກະຊວງການເງິນ ແລະ ທ່ານຮອງເຈົ້າແຂວງໆຈໍາປາສັກ ກໍ່ໄດ້ປະກອບຄໍາຄິດຄໍາເຫັນຕໍ່ເນື້ອໃນບົດສະຫຼຸບ ແລະ ທິດທາງແຜນການດັ່ງກ່າວ ເພື່ອເປັນບ່ອນອີງໃນການເຄື່ອນໄຫວຈັດເກັບລາຍຮັບເຂົ້າງົບປະມານໃຫ້ມີຜົນສໍາເລັດ.


ຕອນທ້າຍ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ກໍ່ໄດ້ໃຫ້ກຽດໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນໆງານທີ່ອໍານາດການປົກຄອງແຂວງຈໍາປາສັກ ແລະ ຂະແໜງການກ່ຽວຂ້ອງ ເອົາໃຈໃສ່ຈັດຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານໃນ 10 ເດືອນ ປີ 2017. ຕໍ່ມາທ່ານກໍ່ໄດ້ເນັ້ນໃຫ້ຄະນະພັກ-ອໍານາດການປົກຄອງແຂວງ ແລະ ການນໍາຂະແໜງການທີ່ກ່ຽວຂ້ອງ ຕ້ອງບຸກບືນສູ້ຊົນຜ່ານຜ່າຂໍ້ຫຍຸ້ງຍາກຕ່າງໆ ເພື່ອເອົາໃຈໃສ່ຊີ້ນໍາ-ນໍາພາອ້າຍນ້ອງພະນັກງານວິຊາການໃນຂະແໜງການເງິນໃຫ້ເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບຕາມສິດໜ້າທີ່ ແລະ ພາລະບົດບາດຂອງຕົນ ທັງສຶກສາອົບຮົມໃຫ້ເຂົາຮັບຮູ້ເຂົ້າໃຈຄວາມຈໍາເປັນໃນດ້ານວຽກງານການຈັດເກັບລາຍຮັບເຂົ້າງົບປະມານ ແລະ ສ້າງພະນັກງານໃຫ້ບຸກທະລຸທາງດ້ານແນວຄິດ, ບໍ່ໃຫ້ມີຄວາມຫຍໍ້ທໍ້ງໍ້ງ່ຽງ, ຕ້ອງເອົາໃຈໃສ່ທຸ້ມເທສະຕິປັນຍາ, ກໍາລັງວັງຊາ ແລະ ຄວາມຮູ້ຄວາມສາມາດປະກອບສ່ວນເຂົ້າໃນການຈັດເກັບລາຍຮັບງົບປະມານໃຫ້ໄດ້ຕາມແຜນການ ທັງປະຕິບັດໃຫ້ຖືກຕ້ອງ, ສອດຄ່ອງກັບຂໍ້ກໍານົດ, ລະບຽບກົດໝາຍຕ່າງໆທີ່ລັດຖະບານວາງອອກ ແລະ ເອົາໃຈໃສ່ການເກັບກໍາຂໍ້ມູນຖານລາຍຮັບໃຫ້ໄດ້ຢ່າງລະອຽດຈະແຈ້ງ ເພື່ອເປັນບ່ອນອີງໃນການກະກຽມສ້າງແຜນຈັດເກັບລາຍຮັບງົບປະມານໃນປີ 2018 ໃຫ້ໄດ້ເລີ່ມຕົ້ນຈັດຕັ້ງປະຕິບັດແຕ່ຫົວທີ ແລະ ມີຜົນສໍາເລັດຕາມຄາດໝາຍທີ່ວາງໄວ້.


ຂ່າວ-ພາບ: ທູນທອງໃຈ ໜັງສືພິມຈໍາປາໃໝ່

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.