Header Ads

ສານຂອງພະນະທ່ານ ຮອງນາຍົກລັດຖະມົນຕີແຫ່ງ ສປປ ລາວ ເນື່ອງໃນໂອກາດວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ



ບັນດາທ່ານ ທີ່ນັບຖື, ພີ່ນ້ອງຮ່ວມຊາດ ທີ່ຮັກແພງທັງຫຼາຍ,

ໃນບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ພວມສືບຕໍ່ຈັດຕັ້ງປະຕິ ບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ຢ່າງເປັນຂະບວນຟົດຟື້ນ, ​​​ສະພາ​ແຫ່ງ​ຊາດ ຊຸດ​ທີ VIII ຫາ​ກໍ່ສຳ​ເລັດ​ກອງ​ປະຊຸມ​ສະ​ໄໝສາມັນ​​ເທື່ອ​ທີ 4 ຂອງ​ຕົນ ​ດ້ວຍ​ໝາກຜົນສໍາ​ເລັດທີ່​​ຈົບງາມ. ໃນໄລຍະຜ່ານມາ ລັດຖະບານແຫ່ງ ສປປ ລາວ ໄດ້ເອົາໃຈໃສ່ຢ່າງຕັ້ງໜ້າ ສຸມໃສ່ການປ້ອງກັນ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ໃນ ສປປ ລາວ ໂດຍປະຕິບັດພັນທະຂອງລັດພາຄີຂອງ ສປປ ລາວ ພາຍໃຕ້ສົນທິສັນຍາວ່າດ້ວຍ ການລຶບລ້າງທຸກຮູບການຈໍາແນກຕໍ່ແມ່ຍິງ (ຊີດໍ), ສົນທິສັນຍາສິດທິເດັກ ແລະ ຖະແຫຼງການອາຊຽນ ວ່າດ້ວຍການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ທີ່ລັດຖະບານ ໄດ້ຮັບຮອງ​ ໃນປີ 2013 ກໍ່ຄືການຜັນຂະຫຍາຍເປົ້າໝາຍການພັດທະນາແບບຍືນຍົງ ໂດຍ​ສະ​ເພາະ ​ເປົ້າ​ໝາຍ​ທີ 5 “ການ​ບັນລຸ​ຄວາມ​ສະ​ເໝີ​ພາບ ຍິງ-ຊາຍ ​ແລະ ການສ້າງຄວາມເຂັ້ມແຂງ ໃຫ້ແກ່​ແມ່ຍິງ ​ແລະ ​ເດັກ​ຍິງທຸກຄົນ”

ວັນທີ 25 ພະຈິກ ໃນປີນີ້ ກໍ່ເປັນອີກວັນໜຶ່ງ ທີ່ທົ່ວໂລກໃຫ້ຄວາມສໍາຄັນ ເພື່ອລະນຶກເຖິງວັນສາກົນຢຸດຕິຄວາມຮຸນແຮງຕໍ່ແມ່ຍິງ ພາຍໃຕ້ຫົວຂໍ້ທີ່ວ່າ “ບໍ່ປະໃຜໄວ້ເບື້ອງຫຼັງ: ຢຸດຕິການໃຊ້ຄວາມຮຸນແຮງຕໍ່ແມ່ຍິງ” ເພື່ອເປັນການໂຄສະນາເຜີຍແຜ່, ປຸກລະດົມ ແລະ ຍົກສູງຈິດສຳນຶກໃນທົ່ວປວງຊົນທັງຊາດ ໃຫ້ໄດ້ຮັບຮູ້ເຂົ້າໃຈ ແລະ ເຫັນເຖິງ ບັນຫາການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ຊຶ່ງຖືວ່າເປັນຈຳແນກຕໍ່ແມ່ຍິງ, ໄພງຽບທີ່ເຮັດໃຫ້ແມ່ຍິງຖືກໂດດດ່ຽວ ອີກທັງເປັນການລ່ວງລະເມີດຕໍ່ສິດທິຂອງແມ່ຍິງ ກໍ່ຄືສິດທິຂັ້ນພື້ນຖານຂອງມະນຸດ.
ບັນດາທ່ານທີ່ຮັກແພງທັງຫຼາຍ

ລັດຖະບານແຫ່ງ ສປປ ລາວ ຍາມໃດ ກໍ່ໃຫ້ຄວາມເປັນຫ່ວງເປັນໄຍ ແລະ ເອົາໃຈໃສ່ ຕໍ່ວຽກງານຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ. ສະນັ້ນ, ຍາມໃດ ລັດຖະບານ ກໍ່ໄດ້ພະຍາຍາມທຸ້ມເທທາງດ້ານທຶນຮອນ ແລະ ວິຊາການ ເຂົ້າໃນວຽກງານຕ່າງໆ ທີ່ປິ່ນອ້ອມວຽກງານລຶບລ້າງການໃຊ້ຄວາມຮຸນແຮງຕໍ່ແມ່ຍິງ, ບໍ່ວ່າຈະເປັນດ້ານນະໂຍບາຍ, ຍຸດທະສາດ, ນິຕິກໍາ ແລະ ສ້າງຕັ້ງກົນໄກ ຂອງຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ນັບແຕ່ລະດັບຊາດ, ລະດັບກະຊວງ-ອົງການ, ແຂວງ, ເມືອງ ແລະ ບ້ານ ເພື່ອສົ່ງເສີມຄວາມສະເໝີພາບຍິງ-ຊາຍ ເວົ້າລວມ, ເວົ້າສະເພາະ ກໍ່ແມ່ນຕິດຕາມວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກໃນແຕ່ລະຂັ້ນ ລວມທັງ ໃນຄອບຄົວ, ໂຮງຮຽນ, ສະຖາບັນການສຶກສາ ແລະ ສະຖານທີ່ເຮັດວຽກຕ່າງໆ.

ຜ່ານການຈັດຕັ້ງປະຕິບັດຕົວຈິງ ໄລຍະຜ່ານມາ ພວກເຮົາສາມາດຍາດໄດ້ຜົນສໍາເລັດເປັນກ້າວໆມາ ເປັນຕົ້ນ ໄດ້ສ້າງ ແລະ ປັບປຸງນິຕິກໍາ ຄື: ກົດໝາຍ ວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍວ່າດ້ວຍ ການຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ, ກົດໝາຍວ່າດ້ວຍຄອບຄົວ, ກົດໝາຍວ່າດ້ວຍແຮງງານ ແລະ ກໍາລັງກະກຽມສ້າງກົດໝາຍ ວ່າດ້ວຍຄວາມສະເໝີພາບ ຍິງ-ຊາຍ. ນອກນັ້ນ, ລັດຖະບານ ໄດ້ຮັບຮອງເອົາວິໄສທັດຮອດປີ 2030, ຍຸດທະສາດແຫ່ງຊາດ ເພື່ອຄວາມສະເໝີພາບ ຍິງ-ຊາຍ 10 ປີ (2016-2026) ແລະ ແຜນດໍາເນີນງານແຫ່ງຊາດ ເພື່ອຄວາມສະເໝີພາບ ຍິງ-ຊາຍ (2016-2020); ວິໄສທັດຮອດປີ 2030 ແລະ ຍຸດທະສາດ ວຽກງານແມ່ ແລະ ເດັກ (2016-2025); ແຜນດຳເນີນງານແຫ່ງຊາດ ກ່ຽວກັບການປ້ອງກັນ ແລະ ລຶບລ້າງຄວາມຮຸນ​ແຮງຕໍ່ແມ່ຍິງ ແລະ ຄວາມຮຸນ​ແຮງ ຕໍ່ແມ່-ເດັກ ໃນ ສປປ ລາວ (2014-2020); ແຜນດຳເນີນງານແຫ່ງຊາດ ວ່າດ້ວຍການຕ້ານການຄ້າມະນຸດ ໃນ ສປປ ລາວ, ເຊິ່ງໄດ້ຫັນໃຫ້ເປັນໂຄງການລະອຽດ ເພື່ອຈັດຕັ້ງປະຕິບັດຢູ່ຂັ້ນຕ່າງໆ ຢ່າງມີຜົນສໍາເລັດ. ນອກຈາກນັ້ນ, ຜ່ານມາ ພວກເຮົາໄດ້ສໍາເລັດໃນການເຮັດບົດສຶກສາ ການໃຊ້ຄວາມຮຸນແຮງຕໍ່ແມ່ຍິງ ພາຍໃຕ້ຫົວຂໍ້ “ສຸຂະພາບ ແລະ ປະສົບການຊີວິດຂອງແມ່ຍິງໃນ ສປປ ລາວ” ແລະ ບົດສຶກສາການຄາດຄະເນຄ່າໃຊ້ຈ່າຍ ຊັບພະຍາກອນທີ່ຈໍາເປັນ ຂອງຫຼາຍຂະແໜງການ ສໍາລັບໃຫ້ບໍລິການຊ່ວຍເຫຼືອແມ່ຍິງ ຜູ້ຖືກເຄາະຮ້າຍຈາກຄວາມຮຸນແຮງ ໃນ ສປປ ລາວ; ນອກນັ້ນ, ມີສູນໃຫ້ຄຳປຶກສາປົກ​ປ້ອງແມ່ຍິງ ແລະ ເດັກນ້ອຍ ຂອງສູນກາງສະຫະພັນແມ່ຍິງລາວ ໂດຍມີສາຍດ່ວນ 1362 ທີ່ບໍລິການໃຫ້ຄຳປຶກສາທາງໂທລະສັບ ກ່ຽວກັບບັນຫາການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຕະຫຼອດ 24 ຊົ່ວໂມງ​ ໂດຍ​ບໍ່​ເສຍ​ຄ່າ ແລະ ມີຕາໜ່າງບໍລິການຊ່ວຍເຫຼືອຜູ້ຖືກເຄາະຮ້າຍຈາກຄວາມຮຸນແຮງ ນັບແຕ່ຂັ້ນສູນກາງ ລົງເຖິງທ້ອງຖິ່ນ.
ເຊິ່ງທັງໝົດເຫຼົ່ານັ້ນ, ແມ່ນຄວາມເອົາໃຈໃສ່ຂອງລັດຖະບານ ເວົ້າລວມ, ເວົ້າສະເພາະ ແມ່ນຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ຮ່ວມກັບບັນດາພາກສ່ວນທີ່ກ່ຽວຂ້ອງ ທັງພາກລັດ, ເອກະຊົນ ແລະ ຄູ່ຮ່ວມພັດທະນາ ແລະ ອົງການຈັດຕັ້ງທາງສັງຄົມ ເພື່ອພັດທະນາສັງຄົມລາວ, ປັບປ່ຽນທັດສະນະຄະຕິການໃຫ້ຄຸນຄ່າແມ່ຍິງ ແລະ ຜູ້ຊາຍ ທີ່ແຕກຕ່າງກັນ, ປັບປ່ຽນແນວຄິດຄອງເດີມ, ການເຊື່ອຖືແບບງົມງວາຍ, ການປະຕິບັດຮີດຄອງປະເພນີ ທີ່ເກົ່າແກ່ຫຼ້າຫຼັງ, ຫຼຸດຜ່ອນຄວາມທຸກຍາກຂາດເຂີນ, ພັດທະນາລະດັບການສຶກສາທີ່ຕໍ່າ ຂອງແມ່ຍິງ ແລະ ເດັກຍິງ, ແລະ ລຶບລ້າງບັນດາສິ່ງຫຍໍ້ທໍ້ອື່ນໆໃນສັງຄົມ ລວມທັງຄວາມຮຸນແຮງຕໍ່ແມ່ຍິງ. ຄວາມຮຸນແຮງຕໍ່ແມ່ຍິງທີ່ເກີດຂຶ້ນ ໄດ້ສົ່ງຜົນກະທົບທາງດ້ານຮ່າງກາຍ, ຈິດໃຈ, ທາງເພດ ແລະ ທາງເສດຖະກິດຕໍ່ແມ່ຍິງ ເປັນອຸປະສັກທີ່ກີດຂວາງ ແລະ ກົດໜ່ວງທ່ວງດຶງໃຫ້ແມ່ຍິງ ບໍ່ສາມາດປະກອບສ່ວນ ແລະ ເຂົ້າຮ່ວມຢ່າງເຕັມສ່ວນ ໃນການປົກປັກຮັກສາ ແລະ ສ້າງສາພັດທະນາປະເທດຊາດ; ນອກນັ້ນ, ຄວາມຮຸນແຮງ ຍັງສົ່ງຜົນກະທົບທາງລົບ ຕໍ່ແມ່ຍິງ ແລະ ເດັກຍິງ ໃນຂະບວນພັດທະນາເສດຖະກິດ-ສັງຄົມ, ການພັດທະນາ ແລະ ປັບປຸງຍຸຕິທໍາ ທີ່ເປັນອຸປະສັກອັນໃຫຍ່ຫຼວງ ຕໍ່ການບັນລຸຄວາມສະເໝີພາບ ຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່​ແມ່ຍິງ ​ແລະ ​ເດັກ​ຍິງ.

ຄຽງຄູ່ກັນນັ້ນ, ພວກເຮົາຍັງໄດ້ດໍາເນີນການເຄື່ອນໄຫວ ເພື່ອຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ດ້ວຍການໂຄສະນາເຜີຍແຜ່ ແລະ ສ້າງຄວາມເຂັ້ມແຂງ ດ້ວຍຫຼາຍຮູບ ແລະ ຫຼາຍແບບ ເປັນຕົ້ນ ໄດ້ເອົາໃຈໃສ່​ເພີ່ມທະວີ​ການໂຄສະນາເຜີຍແຜ່ກົດໝາຍຕ່າງໆ ທີ່​ຕິດ​ພັນ​ກັບ​ການ​ປົກ​ປ້ອງ​ສິດ​ ແລະ ຜົນ​ໂຫຍ​ດຂອງ​ແມ່ຍິງ ​ແລະ ​ເດັກ​ຍິງ ​ໂດຍສະ​ເພາະ ກົດໝາຍ​ວ່າ​ດ້ວຍ​ການ​ຕ້ານ ​ແລະ ສະກັດ​ກັ້ນ​ຄວາມ​ຮຸນ​ແຮງ​ຕໍ່​ແມ່ຍິງ, ແຜນ​ດຳ​ເນີນ​ງານ​ແຫ່ງ​ຊາດ ​ກ່ຽວ​ກັບ​ການ​ປ້ອງ​ກັນ ​ແລະ ລຶບລ້າງ​ຄວາມ​ຮຸນ​ແຮງ​ຕໍ່​ແມ່ຍິງ ແລະ ​ເດັກ ​ເພື່ອ​ໃຫ້ທຸກ​ພາກສ່ວນ​ໃນ​ທົ່ວ​ສັງຄົມ ແລະ ປະຊາຊົນ ​ຮັບ​ຮູ້ ​ແລະ ​ເຂົ້າ​ໃຈຫຼາຍຂຶ້ນ ກ້າວໄປເຖິງການປັບ​ປ່ຽນ​ທັດສະນະ​ຄະຕິ, ຄວາມເຊື່ອ ແລະ ຮີດຄອງປະຕິບັດ ທີ່ຍຶດຖືການໃຊ້ຄວາມຮຸນແຮງຕໍ່ແມ່ຍິງເປັນເລື່ອງປົກກະຕິທໍາມະດາ; ປັບປຸງ​ຂອດປະສານງານ ​ແລະ ສ້າງ​ຄວາມ​ເຂັ້ມ​ແຂງ​​ ໃນ​ການ​ຮ່ວມ​ມື ​ແລະ ປະສານ​ງານ​ ກັບ​ພາກ​ສ່ວນ​ຕ່າງໆທີ່​ກ່ຽວຂ້ອງ​ ເພື່ອ​ປ້ອງ​ກັນ ​ແລະ ​ແກ້​ໄຂ​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັກຍິງ ​ໂດຍການຈັດ​ກອງ​ປະຊຸມ​ປຶກສາ​ຫາລື​ ກໍານົດວິທິການການ​ແກ້​ໄຂ​ ວຽກ​ຄວາມ​ຮຸນ​ແຮງ​ຕໍ່​ແມ່ຍິງ ແລະ ເດັກຍິງ, ຈັດ​ຝຶກ​ອົບຮົມ​ສ້າງ​ຄວາມເຂັ້ມແຂງໃຫ້ສື່ມວນຊົນ ຜູ້ທີ່ເປັນກະບອກສຽງ ແລະ ໃຫ້ຂໍ້ມູນຂ່າວສານແກ່ສັງຄົມ ໂດຍສະເພາະ ແມ່ນຜູ້ທີ່ເຮັດໜ້າທີ່ເປັນ​ບັນ​ນາ​ທິການ ​ແລະ ນັກ​ຂ່າວ ເພື່ອໂຄສະນາ​ການ​ຕ້ານ​ການ​ໃຊ້​ຄວາມຮຸນ​ແຮງ​ຕໍ່​ແມ່ຍິງ​ ແລະ ​ເດັກຍິງ​, ປູກ​ຈິດ​ສຳນຶກ​ໃຫ້ບັນດາພະນັກງານ ແລະ ​ຄູ-ອາຈານ, ນັກຮຽນ ແລະ ນັກ​ສຶກສາ ​ໃນມະຫາວິທະຍາ​ໄລ​ແຫ່ງ​ຊາດ, ມະຫາວິທະຍາ​ໄລ​ແພດສາດ, ​ໂຮງ​ຮຽນ​ສ້າງ​ຄູ ລວມທັງການເຊື່ອມສານເອົາວຽກງານການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເຂົ້າປັບປຸງຫຼັກສູດການຮຽນ-ການສອນ ໃນຂັ້ນປະຖົມ; ການສ້າງຄວາມຮັບຮູ້ ໃຫ້ເອື້ອຍນ້ອງກໍາມະກອນເພດຍິງ ໃນໂຮງຈັກ-ໂຮງງານຕ່າງໆ ເພື່ອສ້າງຄວາມຮັບຮູ້ ແລະ ຄວາມເຂົ້າໃຈວ່າ ຄວາມຮຸນແຮງຕໍ່ແມ່ຍິງ ແມ່ນການ​ລ່ວງ​ລະ​ເມີດ​ສິດທິ​ດຂັ້ນ​ພື້ນຖານ​ຂອງ​ເຂົາ​ເຈົ້າ; ການສ້າງສື່ໂຄສະນາ ເຊັ່ນ: ແຜ່ນພັບ, ສ້າງ​ໂຄສະນາ​ສັ້ນ ແລະ ປຶ້ມໂຄສະນາເຜີຍແຜ່ ທີ່​ມີ​ເນື້ອ​ໃນ​ສົ່ງ​ເສີມ​ການຈັດ​ຕັ້ງ​ປະຕິບັດ​ກົດໝາຍ​ ຕ້ານ ​ແລະ ສະກັດ​ກັ້ນ​ ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັກ; ອັນພົ້ນເດັ່ນ ແມ່ນຄະນະກຳມາ​ທິການແຫ່ງຊາດ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່-ເດັກ​ ທຸກຂັ້ນ ໂດຍ​ການ​ຊຸກຍູ້ສະໜັບສະໜູນ ​ຈາກຄະນະ​ພັກ ​ແລະ ຄະນະ​ນຳບັນດາຂະ​ແໜງ​ການ, ອົງການ ​ແລະ ​ທ້ອງ​ຖິ່ນຕ່າງໆ ​​ໄດ້ປຸກລະດົມ​ການ​ເຂົ້າ​ຮ່ວມ​ຂອງ​ທຸກ​ການຈັດ​ຕັ້ງ ​ແລະ ຫົວ​ໜ່ວຍ​ທຸລະ​ກິດ ທັງ​ພາກ​ລັດ ​ແລະ ​ເອກະ​ຊົນ, ທັງພາຍ​ໃນ ​ແລະ ຕ່າງປະ​ເທດ ລວມທັງບັນດາ​ຄູ່​ຮ່ວມ​ພັດທະນາ ​ຕະຫຼອດ​ຮອດບັນດາອົງການ​ຈັດ​ຕັ້ງ​ທີ່​ບໍ່​ສັງກັດ​ລັດຖະບານ ໄດ້ພ້ອມກັນຈັດ​ຕັ້ງ​ປະຕິບັດ​ວຽກ​ງານ​ສົ່ງ​ເສີມ​ຄວາມ​ກ້າວໜ້າ​ແມ່ຍິງ, ຄວາມ​ສະ​ເໝີ​ພາບ ​ຍິງ​-ຊາຍ ​ແລະ ການ​ລຶບລ້າງ​ທຸກ​ຮູບ​ການຈຳ​ແນ​ກ ຕໍ່​ແມ່ຍິງ ​ແລະ ​ເດັກ ​ໃນ​ຂອບ​ເຂດ​ທົ່ວ​ປະ​ເທດ ​ແລະ ​​ເປັນ​ລະບົບ​ຕໍ່​ເນື່ອງ.

ຄຽງຄູ່ກັບຜົນສໍາເລັດດັ່ງກ່າວມາຂ້າງເທິງນັ້ນ, ພວກເຮົາຍັງປະເຊີນໜ້າກັບສິ່ງທ້າທາຍຫຼາຍດ້ານ ເປັນຕົ້ນ: ບັນຫາການລ່ວງລະເມີດທາງເພດ ຕໍ່ແມ່ຍິງ ໃນສະຖານທີ່ເຮັດວຽກຕ່າງໆ, ສະພາບການໃຊ້ຄວາມຮຸນແຮງຕໍ່ແມ່ຍິງໃນຄອບຄົວ, ສະພາບການໃຊ້ຄວາມຮຸນແຮງຕໍ່ເດັກ, ການໃຊ້ແຮງງານເດັກ ລວມທັງຄວາມເຂົ້າໃຈຂອງຄົນໃນສັງຄົມ ແລະ ຮີດຄອງປະເພນີຂອງບາງເຜົ່າ ທີ່ມີຕໍ່ແມ່ຍິງ ແລະ ເດັກ ເວົ້າລວມ, ເວົ້າສະເພາະ ໃນເຂດຊົນນະບົດຫ່າງໄກສອກຫຼີກ ຍັງຕ້ອງໄດ້ເອົາໃຈໃສ່ເປັນພິເສດ.


​ສະນັ້ນ, ​ເນື່ອງ​ໃນ​ໂອກາດ​ລະນຶກ​ວັນ​ສາກົນ​ລຶບລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ 25 ພະຈິກ 2017 ພາຍໃຕ້ຫົວຂໍ້ທີ່ວ່າ “ບໍ່ປະໃຜໄວ້ເບື້ອງຫຼັງ: ຢຸດຕິການໃຊ້ຄວາມຮຸນແຮງຕໍ່ແມ່ຍິງ” ​​ຂ້າພະ​ເຈົ້າ ຂໍຮຽກຮ້ອງມາຍັງບັນດາຂະແໜງການ ທັງພາກລັດ ແລະ ເອກະຊົນ ລວມເຖິງອົງການປົກຄອງທ້ອງຖິ່ນ ແລະ ພົນລະເມືອງລາວທຸກທົ່ວໜ້າ ຈົ່ງພ້ອມກັນເອົາໃຈໃສ່ໃຫ້ຄວາມສຳຄັນຕໍ່ບັນຫາ ດັ່ງນີ້:



1. ​ສືບຕໍ່​ການໂຄສະນາເຜີຍແຜ່ ແລະ ປູກຈິດສຳນຶກທົ່ວປວງຊົນ ໃຫ້ມີຄວາມຮັບຮູ້ ແລະ ເຂົ້າໃຈອັນຖືກຕ້ອງວ່າ: ຄວາມຮຸນແຮງຕໍ່ແມ່ຍິງ ແລະ ເດັກ ແມ່ນການລ່ວງລະເມີດສິດທິຂັ້ນພື້ນຖານຂອງພວກເຂົາເຈົ້າ ເພື່ອສ້າງຈິນຕະນາການໃໝ່ ທີ່ເຄົາລົບກຽດສັກສີ ແລະ ການໃຫ້ກຽດເຊິ່ງກັນ ແລະ ກັນ ລະຫວ່າງຍິງ-ຊາຍ ແລະ ລົງໂທດຕໍ່ຜູ້ກະທໍາຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ;



2. ເອົາ​ໃຈ​ໃສ່​ປັບປຸງ ແລະ ສ້າງຄວາມເຂັ້ມແຂງໃນຫຼາຍຂະແໜງ ທີ່ໃຫ້ການບໍລິການ ແລະ ຊ່ວຍເຫຼືອແມ່ຍິງ ແລະ ເດັກຍິງ ຜູ້ຖືກເຄາະຮ້າຍຈາກຄວາມຮຸນແຮງ ໂດຍສະເພາະ ແມ່ນສູນຊ່ວ​ຍ​ເຫຼືອ​ໃຫ້​ຄຳ​ປຶກສາ, ​ດ້ານສຸຂະພາບ​, ​ດ້ານ​ຈິດ​ໃຈ, ທີ່​ພັກ​ເຊົາທີ່​ປອດ​ໄພ, ​ການ​ຊ່ວຍ​ເຫຼືອທາງ​ດ້ານ​ກົດໝາຍ​ ຈາກ​ເຈົ້າ​ໜ້າ​ທີ່​​ຍຸຕິ​ທຳ,​ ເຈົ້າ​ໜ້າ​ທີ່​ຕຳຫຼວດ, ​ໄອຍະ​ການ ​ແລະ ສານ ລວມ​ເຖິງ​ການ​ສ້າງ​ເງື່ອນ​ໄຂ​ ​ແລະ ​ໂອກາດ​ໃຫ້​ແມ່ຍິງ ແລະ ເດັກ​ບັນດາ​ເຜົ່າ ​ໄດ້​ເຂົ້າ​ເຖິງ​ການ​ສຶກສາ, ​ໄດ້​ຮັບ​ການ​ຝຶກ​ອົບຮົມ​ ແລະ ນໍາໃຊ້ເຕັກໂນໂລຊີຂໍ້ມູນຂ່າວສານທີ່ທັນສະໄໝ ແລະ ການສື່ສານ ເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ;



3. ຮັບປະກັນໃຫ້ບັນດາຂະແໜງການ ແລະ ທ້ອງຖິ່ນ ດໍາເນີນການຈັດຕັ້ງປະຕິບັດກິດຈະກຳ ລະນຶກ​ວັນ​ສາກົນ​ລຶບລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ 25 ພະຈິກ 2017 ແລະ ກິດຈະກໍາອື່ນ ທີ່ຕິດພັນ ນັບແຕ່ຂັ້ນສູນກາງ ລົງເຖິງທ້ອງຖິ່ນຮາກຖານ ເພື່ອປົກປ້ອງ, ປ້ອງກັນ, ລຶບລ້າງການໃຊ້ຄວາມຮຸນແຮງຕໍ່ແມ່ ຍິງ ແລະ ຄວາມຮຸນແຮງຕໍ່ເດັກ ໂດຍຜ່ານຂະບວນການຈັດຕັ້ງປະຕິບັດມາດຖານການສ້າງຄອບຄົວ ​ແລະ ບ້ານ ປະຕິບັດສິດສະເໝີພາບ ຍິງ-ຊາຍ ແລະ ປາສະຈາກການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ.



4. ເອົາໃຈໃສ່ສ້າງຄວາມເຂັ້ມແຂງ ໃຫ້ແກ່ກົງຈັກການຈັດຕັ້ງ ແລະ ບຸກຄະລາກອນ ແຕ່ລະຂະແໜງການກ່ຽວຂ້ອງ ເພື່ອຈັດຕັ້ງປະຕິບັດ ແລະ ດໍາເນີນການ ແນໃສ່ຮັບປະກັນຄວາມສັກສິດຂອງກົດໝາຍ ແລະ ການຈັດຕັ້ງປະຕິບັດກົນໄກປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກ.



5. ສືບຕໍ່ເພີ່ມທະວີ ແລະ ຮັດແໜ້ນການຮ່ວມມື ຂອງຫຼາຍຂະ​ແໜງ​ການ​ ທັງ​ພາຍ​ໃນ, ພາກພື້ນ ແລະ ສາກົນ ລວມທັງການຮ່ວມມືໃນກອບຂອງອາຊຽນ ແລະ ການຮ່ວມມືສອງຝ່າຍ ກັບບັນດາປະເທດໃກ້ຄຽງໃນການ​ຈັດ​ຕັ້ງ​ປະຕິບັດວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ລວມທັງ​ການແລກປ່ຽນບົດຮຽນ ແລະ ລະດົມການຊ່ວຍເຫຼືອ ທາງ​ດ້ານວິຊາ​ການ ​ແລະ ທຶນຮອນ ເຂົ້າໃນວຽກງານດັ່ງກ່າວ ໃຫ້ນັບມື້ນັບຫຼາຍຂຶ້ນ.



ທ້າຍສຸດນີ້, ອີກເທື່ອໜຶ່ງ ຂ້າພະເຈົ້າ ຂໍຮຽກຮ້ອງໃຫ້ທຸກພາກສ່ວນ ຈົ່ງເຂົ້າຮ່ວມໃນຂະບວນການດັ່ງກ່າວ ຕາມພາລະບົດບາດຂອງຕົນຢ່າງຕັ້ງໜ້າ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ແລະ ສົນທິສັນຍາສາກົນ ວ່າດ້ວຍການຕ້ານການໃຊ້ຄວາມຮຸນແຮງຕໍ່ແມ່ຍິງ ໃຫ້ໄດ້ຮັບໝາກຜົນຕົວຈິງ.




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.