Header Ads

ການຄ້າມະນຸດຢູ່ແຂວງຫຼວງນໍ້າທາ ພົ້ນເດັ່ນແມ່ນການແຕ່ງງານແອບແຝງ



ບັນຫາການຄ້າມະນຸດຢູ່ແຂວງຫຼວງນໍ້າທາ ພົ້ນເດັ່ນກວ່າໝູ່ແມ່ນມາໃນຮູບແບບແຕ່ງງານແອບແຝງ ໂດຍຜ່ານນາຍໜ້າທີ່ເປັນຄົນລາວ ແລະ ຄົນຈີນ ຕິດຕໍ່ພົວພັນແຕ່ງງານ ໂດຍເອີ້ນເຖົ້າແກ່ແນວໂຮມມາຮ່ວມ ຫຼັງຈາກມອບ ເງິນຄ່າດອງແລ້ວກໍພາຍິງລາວ ອອກໄປປະເທດຈີນ ກ່ອນທີ່ຈະຖືກກັກຂັງ, ໃຊ້ແຮງງານ ແລະ ຂາຍຕໍ່ໃຫ້ບຸກຄົນອື່ນ.

ພັອ ສົມໄຊ ຈັນທະວົງ ຫົວໜ້າກອງບັນຊາການ ແຂວງຫຼວງນໍ້າທາ ເປີດເຜີຍວ່າ: ແຂວງຫຼວງນໍ້າທາ ມີຊາຍແດນຕິດກັບ ແຂວງຢຸນນານ ສປ ຈີນ, ນັບແຕ່ປີ 2015 ມາເຖິງປັດຈຸບັນ ມີຂະບວນການແຕ່ງງານຂອງຊາຍໜຸ່ມຈາກ ສປ ຈີນ ແລະ ຍິງສາວລາວ. ໃນນີ້, ແມ່ນປະກົດການເດັ່ນທີ່ສຸດດ້ວຍຮູບລັກສະນະມີການໜັ້ນໝາຍ, ໂດຍຜ່ານຄົນລາວ ແລະ ຄົນຈີນຈໍານວນໜຶ່ງທີ່ເຮັດທຸລະກິດຢູ່ລາວ ແລະ ຄົນລາວຢູ່ປະເທດຈີນ ໃນການຕິດຕໍ່ພົວພັນແຕ່ງງານ ຫຼື ເຮັດຮີດຄອງດ້ວຍການເອີ້ນເຖົ້າແກ່ແນວໂຮມບ້ານເຂົ້າຮ່ວມ ເພື່ອເປັນສັກຂີພະຍານ ຫຼັງຈາກມອບເງິນຄ່າດອງກໍພາຍິງສາວລາວ ໄປປະເທດຈີນ ໂດຍບໍ່ມີເອກະສານຖືກຕ້ອງ ແລະ ໃນບາງກໍລະນີ ແມ່ນບໍ່ໄດ້ຄ່າສິນສອດ ພຽງແຕ່ລົມກັນປາກເປົ່າກໍພາຍິງສາວໄປປະເທດຈີນ ເພື່ອໄປເບິ່ງເຮືອນຂອງຜູ້ຊາຍຄົນຈີນ ຖ້າມັກກໍເອົາ, ພາຍຫຼັງຄູ່ບ່າວສາວ ອາໄສຢູ່ປະເທດຈີນ ບາງຄົນກໍຖືກກັກຂັງ, ໃຊ້ແຮງງານ, ຂາຍຕໍ່ໃຫ້ບຸກຄົນ​ອື່ນ, ​ເຊິ່ງຫຼາຍ​ກໍລະນີ​ຖືກ​ນາບ​ຂູ່, ທໍາຮ້າຍ​ຮ່າງກາຍ ​ແລະ ຢຶດໜັງສືຜ່ານ​ແດນ, ຕໍ່​ບັນຫາ​ນີ້ ​ເຮັດ​ໃຫ້​ພໍ່-​ແມ່​ພີ່ນ້ອງ ຂໍ​ຄວາມ​ຊ່ວຍ​ເຫຼືອ​ຈາກ​ນາຍ​ໜ້າ​ຜູ້​ພາ​ໄປ ​ແລະ ​ເຂົ້າ​ຊ່ວຍ​ດ້ວຍ​ຕົນ​ເອງທັງ​ທີ່​ບໍ່​ຮູ້​ພື້ນ​ທີ່ ​ແລະ ພາສາ ​ເອົາ​ເງິ​ນຈ້າງ​ຜູ້​ພາ​ໄປ​ໃນ​ທີ່​ສຸດ​ກໍ​ຖືກ​ສໍ້​ໂກງ, ຮ້າຍ​ແຮງ​ກວ່າ​ນັ້ນ ​ເມື່ອ​ພົບ​ລູກ​ແລ້ວ ກໍ​ຖືກ​ກັກ​ຂັງ​ທັງ​ແມ່ ​ແລະ ລູກ ​ໂດຍ​ໃຫ້​ເອົາ​ເງິນ​ຄ່າ​ດອງ​ມາ​ສົ່ງ​ຄືນ​ຈຶ່ງ​ປ່ອຍຕົວ​ກັບ​ລາວ.
 
 ​ໃນ​ການ​ສະກັດ​ກັ້ນ ​ແລະ ​ແກ້​ໄຂ​ບັນຫາ​ດັ່ງກ່າວ ປກສ ​ແຂວງ​ຫຼວງ​ນໍ້າ​ທາ ​ໄດ້​ປະສານ​ຫາ​ກົມ​ສາຍ​ຕັ້ງ ​ແລະ ບັນດາ​ແຂວງ​​ໃນ​ທົ່ວ​ປະ​ເທດ​ຈັດ​ກອງ​ປະຊຸມ​ປຶກສາ​ຫາລືກັບ​ພາກສ່ວນ​ກ່ຽວຂ້ອງ​ເພື່ອ​ຊອກ​ວິທີ​ແກ້​ໄຂ. ນອກ​ນັ້ນ, ປກສ ​ແຂວງ​ຫຼວງ​ນໍ້າ​ທາ ​ຍັງ​ໄດ້​ປະສານ​ສົມທົບ​ກັບ​ຕໍາຫຼວດ​ເມືອງ​ຫຼາ ​ແຂວງ​ຢຸນນານ​ ສປ ຈີນ ​ເພື່ອ​ແລກປ່ຽນ​ຂໍ້​ມູນ​ຂ່າ​ວສານ ​​ເພື່ອ​ຊ່ວຍ​ເຫຼືອ​ຜູ້​ເຄາະ​ຮ້າຍ. ຜ່ານ​ການ​ປະສານ​ກັບ​ເຈົ້າ​ໜ້າ​ທີ່ ສປ ຈີນ ຈໍານວນ 12 ຄັ້ງ ສາມາດ​ຊ່ວຍ​ເຫຼືອ​ຜູ້​ເຄາະ​ຮ້າຍ 69 ຄົນ ເປັນຍິງ​ໝົດ.



ພັທ ອໍາ​ໄພ ສໍ​ສະຫວັນ​ແສງ ຮັກສາ​ການ​ຫົວໜ້າ​ຫ້ອງ​ຕໍາຫຼວດ ປກສ ​ແຂວງ​ຫຼວງ​ນໍ້າ​ທາ ​ໃຫ້​ຮູ້​ວ່າ: ຜູ້​ທີ່​ຕົກ​ເປັນ​ເຫຍື່ອຂອງ​ການ​ຄ້າ​ມະນຸດ ​ເປັນ​ຍິງ​ສາວ​ໜ້າ​ຕາ​ດີ ​ແລະ ຮູ້​ເທົ່າ​ບໍ່​ເຖິງ​ການ; ຕໍ່​ບັນຫາ​ດັ່ງກ່າວ, ​ກໍ​ມີມາດ​ຕະກາ​ນະ​ກັດ​ກັ້ນ ​ແລະ ​ແກ້​ໄຂ​ການ​ຄ້າ​ມະນຸດຢູ່​ແຂວງ​ຫຼວງ​ນໍ້າ​ທາ ຜ່ານ​ມາ​ໄດ້​ສຸມ​ໃສ່​ໃນ​ການ​ຊີ້​ນໍາ​ໆ-ນຳພາ​ພະນັກງານ-ນັກຮົບ​ ເຄື່ອນ​ໄຫວ​ລົງ​ໂຄສະນາ​ເຜີຍ​ແຜ່​ຜົນ​ຮ້າຍ​ ​ແລະ ​ໄພ​ອັນ​ຕະລາຍ​ທີ່​ເກີດ​ຈາກ​ການ​ຄ້າ​ມະນຸດ ຢູ່​ບັນ​ດາ​ບ້ານທີ່​ລຽບ​ຕາມ​ຊາຍ​ແດນ ​ແລະ ບ້າ​ນທີ່​ມີ​ແລວ​ລົດ​ໄຟ​ຜ່ານ. ພ້ອມ​ນັ້ນ, ຈັດ​ຕັ້ງ​ພະນັກງານ​ລົງ​ປະ​ຈໍາ​ຢູ່​ຕາມ​ແຕ່​ລະ​ດ່ານ​ເພື່ອ​ຕິດຕາມ​ກວດກາ, ຕິດຕາມ​ກຸ່ມ​ເປົ້າ​ໝາຍ​ທີ່​ອາດ​ຕົກ​ເປັນ​ເຫຍື່ອຂອງ​ການ​ຄ້າມ​ະນຸດ, ຜ່ານ​ການຈັດ​ຕັ້ງ​ປະຕິ​ບັດ​ວຽກ​ງານ​ຕົວ​ຈິງ ສາມາດ​ພົບ​ເຫັນ​ເປົ້າ​ໝາຍ ​ແລະ ກຸ່ມ​ຄົນ​ຈໍານວນ​ໜຶ່ງ​ທີ່​ມີ​ການ​ເຄື່ອນ​ໄຫວບໍ່​ຖືກຕ້ອງ ​​ໂດຍ​ໄດ້​ມີ​ການ​ສຶກສາ​ອົບຮົມ ​ແລະ ດໍ​າ​​​ເນີນ​ຄະດີ​ຕໍ່​ຜູ້​ທີ່​ກະທໍາ​ຜິດ. ມາຮອດປັດຈຸບັນ, ບັນຫາດັ່ງກ່າວປະຊາຊົນໄດ້ຮັບຮູ້ ແລະ ມີຄວາມລະມັດລະວັງຫຼາຍຂຶ້ນ.


​ໃນ​ຕໍ່ໜ້າ, ກອງ​ບັນຊາ​ການ ປກສ ​ແຂວງ​ຫຼວງ​ນໍ້າ​ທາ ຈະສືບ​ຕໍ່​ປະຕິບັດ​ຮ່ວມ​ມື​ສອງ​ຝ່າ​ຍ​ໃຫ້​ນັບ​ມື້ດີ​ຂຶ້ນ​ເລື້ອຍໆ, ​ເພີ່ມ​ທະວີ​ການ​ປະສານ​ງານ​​ແລກປ່ຽນ​ຂໍ້​ມູນ​ຂ່າວສານ​ເຊິ່ງກັນ​ແລະກັນ ພ້ອມ​ທັງ​ປະສານ​ສົມທົບ​ໃນ​ການ​ຊ່ວຍ​​ເຫຼືອຜູ້​ຖືກ​ເຄາະ​ຮ້າຍ​ໃຫ້​ຮັບປະກັນ, ທັນ​ເວລາ ​ແລະ ບັນຫາ​ອື່ນໆ. ນອກນີ້, ກໍຈະສືບຕໍ່ໂຄສະນາເຜີຍເແຜ່ຜົນຮ້າຍຂອງການຄ້າມະນຸດໃຫ້ທົ່ວເຖິງບັນດາເປົ້າໝາຍ ​ເພື່ອ​ສະກັດ​ກັ້ນ​ບັນຫາ​ດັ່ງ​ກ່າວ​ໃຫ້​ຫຼຸດ​ລົງ​​ເທື່ອ​ລະ​ກ້າວ.
ພາບ ແລະ ຂ່າວ: ນສພ ຄວາມສະຫງົບ
-------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.