Header Ads

ເຈົ້າແຂວງຫຼວງພະບາງລົງພື້ນທີ່ເບິ່ງບ່ອນລ້ຽງສັດໃຫຍ່ຂອງເມືອງຊຽງເງີນ



ຍ້ອນຄວາມເປັນຫ່ວງເປັນໃຍໃນການດໍາລົງຊີວິດຂອງພໍ່ແມ່ປະຊາຊົນໃນເຂດຊົນນະ ບົດກໍ່ຄືຢູ່ບັນດາເມືອງອ້ອມຂ້າງແຂວງ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ, ທ່ານ ສາຍສະໝອນ ທິດາກອນ ເຈົ້າເມືອງໆຊຽງເງີນ ພ້ອມດ້ວຍຄະນະນໍາຂອງບັນດາພະແນກການ, ຫົວໜ້າຂະແໜງການທີ່ກ່ຽວ ຂ້ອງເມືອງ ໄດ້ລົງພື້ນທີ່ສໍາຫຼວດເບິ່ງບ່ອນລ້ຽງສັດໃຫຍ່ທີ່ ບ້ານໜອງຄວາຍ, ຫ່າງຈາກເທດສະບານເມືອງປະມານ 14 ກິໂລ ແມັດ, ເຊິ່ງເປັນເຂດທີ່ເໝາະສົມ ແລະ ເປັນເປົ້າໝາຍຂອງເມືອງຊຽງເງີນທີ່ໄດ້ກໍານົດໄວ້ເພື່ອລ້ຽງສັດໃຫຍ່ສົ່ງອອກຂາຍສ້າງລາຍຮັບໃຫ້ກັບພໍ່ແມ່ປະຊາຊົນນັບມື້ໃຫ້ດີຂື້ນແລະກ້າວອອກຄວາມ ທຸກຍາກໄດ້ໃນອະນາຄົດ. 


 
ສໍາລັບບ້ານໜອງຄວາຍ ແມ່ນຕັ້ງຢູ່ເຂດພູສູງ ໄປທາງທິດຕາເວັນຕົກຂອງເມືອງຊຽງເງີນ ມີເນື້ອທີ່ທັງໝົດ 2.700 ເຮັກຕາ, ມີຄອບຄົວທັງໝົດ 53 ຄອບຄົວ, ພົນລະເມືອງ 388 ຄົນ, ຍິງ 199 ຄົນ ປະກອບມີ 3 ຊົນເຜົ່າຄື: ເຜົ່າລາວ, ມົ້ງ ແລະ ເຜົ່າກຶມມຸ ໃນນັ້ນສ່ວນໃຫຍ່ແມ່ນເຜົ່າມົ້ງກວມເອົາເຖິງ 57% ຂອງພົນລະເມືອງ, ໃນບ້ານມີນໍ້າລິນ ແລະ ໄຟຟ້າໃຊ້ ທຸກຫຼັງຄາເຮືອນ ແຕ່ຍັງຂາດສັນຍານໂທລະສັບເນື່ອງຈາກບ້ານຕັ້ງຢູ່ຮ່ອມພູສູງ. ປະຊາຊົນສ່ວນໃຫຍ່ແມ່ນທໍາອາຊີບປູກຝັງລ້ຽງສັດ ທົ່ວບ້ານມີເນື້ອທີ່ທໍາການຜະລິດ 493,08 ເຮັກຕາ, ຜຶດສ່ວນໃຫຍ່ປະຊາຊົນປູກແມ່ນ ເຂົ້າ, ສາລີ, ໝາກງາ, ກາເຟ,ໝາກ ແໜ່ງ.



ທົ່ວບ້ານມີງົວ 421 ໂຕ, ຄວາຍ 2 ໂຕ, ໝູ 167 ໂຕ, ໄກ່ 1.051 ໂຕ, ມີເນື້ອທີ່ປູກຫຍ້າ 176 ເຮັກຕາ ສະນັ້ນການລົງໄປສໍາຫຼວດເບິ່ງຈຸດປູກຫຍ້າລ້ຽງສັດຕົວຈິງຂອງທ່ານເຈົ້າແຂວງໃນຄັ້ງນີ້ແມ່ນໄດ້ສະແດງເຖິງຄວາມເປັນຫ່ວງເປັນໃຍຕໍ່ພໍ່ແມ່ປະຊາຊົນ ແລະ ຊອກຫາວິທີການຕ່າງໆເພື່ອປັບປຸງໃຫ້ຊີວິດການເປັນຢູ່ຂອງພໍ່ແມ່ປະຊາຊົນໃຫ້ສະດວກສະບາຍແລະມີລາຍຮັບທີ່ດີສູ່ຄອບຄົວເຮັດໃຫ້ຄອບຄົວມີເສດຖະກິດດີຂື້ນ ແລະ ບໍ່ສະເພາະແຕ່ເມືອງຊຽງເງີນ ບັນເມືອງອື່ນໆກໍ່ເຊັ່ນກັນເຊິ່ງໃນຊ່ວງນີ້ທ່ານເຈົ້າແຂວງໄດ້ລົງເຄື່ອນໄຫວຢູ່ບັນດາເມືອງຕ່າງໆເພື່ອຊີ້ນໍາແລະລົງເບິ່ງຈຸດເປົ້າໝາຍຂອງແຕ່ລະເມືອງທີ່ມີເງື່ອນໄຂສະດວກໃນການສົ່ງເສີມພໍ່ແມ່ປະຊາຊົນປູກຝັງ-ລ້ຽງສັດ ແນໃສ່ເຮັດໃຫ້ຊີວິດການເປັນຢູ່ກໍ່ຄືການພັດທະນາເສດຖະກິດ-ສັງຄົມຂອງບັນດາເມືອງອ້ອມຂ້າງໂດຍສະເພາະແມ່ນເຂດຊົນນະບົດຂອງແຕ່ລະເມືອງໃຫ້ນັບມື້ນັບຂະຫາຍຕົວຂື້ນໄປຢ່າງບໍ່ຢຸດຢັ້ງ.


ພາບ ແລະ ຂ່າວ: ຂ່າວສານຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.