Header Ads

ເຈົ້າແຂວງຫຼວງພະບາງລົງເຄື່ອນໄຫວເຮັດວຽກຢູ່ເມືອງຊຽງເງີນ




ໃນຕອນເຊົ້າຂອງ ວັນທີ 15 ພະຈິກ 2017 ນີ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ພ້ອມດ້ວຍຄະນະນໍາຂອງພະແນກການອ້ອມຂ້າງຈໍານວນໜຶ່ງໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບບັນດາຄະນະນໍາຂອງເມືອງຊຽງເງີນທີ່ສະໂມສອນເມືອງຊຽງເງີນ ໂດຍໃຫ້ກຽດຕ້ອນຮັບຂອງ ທ່ານ ສາຍສະໝອນ ທິດາກອນ ເຈົ້າເມືອງໆຊຽງເງີນ ພ້ອມດ້ວຍຄະນະ ພ້ອມນັ້ນກໍ່ໄດ້ຮັບຟັງການລາຍງານສະພາບລວມຂອງການພັດທະນາເມືອງຊຽງເງີນຈາກ ທ່ານ ບຸນໄຊ ມົວເຮີ ຮອງເຈົ້າເມືອງໆຊຽງເງີນຮູ້ວ່າ: ປະຈຸບັນການພັດທະນາເສດຖະກິດ-ສັງຄົມຂອງເມືອງຊຽງເງີນ ແມ່ນດີຂື້ນໂດຍພື້ນຖານ, ເສດ ຖະກິດຂະຫຍາຍຕົວຢ່າງໝັ້ນທ່ຽງ, ທົ່ວເມືອງມີການລົງທືນທັງໝົດ 42 ໂຄງການ, ມູນຄ່າເກືອບ 47 ຕື້ກີບ ໃນນັ້ນການລົງທືນຂອງລັດມີ 17 ໂຄງການ ໃນມູນຄ່າ 37 ຕື້ກວ່າກີບ ແລະ ທີສູນກາງມາຈັດຕັ້ງປະຕິ ບັດຢູ່ເມືອງມີ 5 ໂຄງການ ມູນຄ່າເກືອບ 30 ຕື້ກີບ, ເອກະຊົນ ແລະ ຕ່າງປະເທດມີ 2 ໂຄງການມູນຄ່າເກືອບ 2 ຕື້ກີບ, ການຊ່ວຍເຫຼືອລ້າມີ 1 ໂຄງການ, ມູນຄ່າ 820 ລ້ານກີບ, ການລົງທຶນຂອງປະຊາຊົນມີ 13 ໂຄງການ, ມູນຄ່າ 3,6 ຕື້ກີບ. 



ມາຮອດປະຈຸບັນເມືອງຊຽງເງີນສາມາດເກັບລາຍຮັບເຂົ້າງົບປະ ມານໄດ້ 2.134 ລ້ານກີບ ເທົ່າກັບ 56,39% ຂອງແຜນການປີ ໃນນີ້ ຮັບຈາກອາກອນ 1.129 ລ້ານກີບ ເທົ່າກັບ 70%, ທີ່ດິນ 514 ລ້ານກວ່າກີບ, ເທົ່າກັບ 37%, ຊັບສິນ 253 ລ້ານກວ່າກີບ. ຄຽງຄູ່ກັນນັ້ນໄດ້ເອົາໃຈໃສ່ຊຸກຍູ້, ສົ່ງເສີມປະຊາຊົນຍົກສະມັດຕະພາບເຂົ້ານາປີ, ນາແຊງ, ປູກພຶດເປັນສິນຄ້າ ແລະ ສົ່ງເສີມປະຊາຊົນລ້ຽງສັດໃຫຍ່ບ່ອນທີ່ມີເງືອນໄຂຕາມຄວາມເໝາະສົມ, ປະຊາຊົນໄດ້ຊົມໃຊ້ໄຟຟ້າຈໍານວນ 43 ບ້ານ, ກວມເອົາ 87,75%, ມີ 5.881 ຄອບຄົວ, ກວມເອົາ 93,52% ຂອງຄອບຄົວທັງໝົດ, ບ້ານທີ່ຊົມໃຊ້ໄຟຟ້ານອກລະບົບມີຈໍານວນ 6 ບ້ານ, ມີ 164 ຄອບຄົວ, ສ້າງເສັ້ນທາງທຽວໄດ້ 2 ລະດູມີ 35 ບ້ານກວມ 71,42% ຂອງຈຳນວນບ້ານທັງໝົດ. 



ຈາກນັ້ນ ທ່ານເຈົ້າແຂວງໆຫຼວງພະບາງກໍ່ໄດ້ສະເໜີໃຫ້ບັນດາຄະນະນໍາຂອງເມືອງຮ່ວມປຶກສາຫາລືວຽກງານທີ່ຍັງຄ້າງຄາກັບຄະນະນໍາຂອງພະແນກການເພື່ອຊອກຫາວິທີແກ້ໄຂຊ່ວຍກັນ ພ້ອມທັງມີຄໍາເຫັນໂອ້ລົມ ເຊິ່ງທ່ານໄດ້ເນັ້ນໜັກໃຫ້ເອົາໃຈໃສ່ວຽກງານ ປກຊ, ປກສ ເລັ່ງໃສ່ແກ້ ໄຂປະກົດການຫຍໍ້ທໍ້ຕ່າງໆທີ່ເກີດຂື້ນຢູ່ໃນສັງຄົມເປັນຫຼັກ, ຍຸກຍູ້ສົ່ງເສີມຂອດການຜະ ລິດຂອງປະຊາຊົນເຮັດເປັນຈຸດສຸມເພື່ອສ້າງລາຍຮັບໃຫ້ກັບປະຊາຊົນ ສ່ວນວຽກງານ 3 ສ້າງແມ່ນໃຫ້ພ້ອມກັນສຸມໃສ່ 4 ເນື້ອໃນ 4 ຄາດໝາຍຕ້ອງຕິດພັນກັບການແຂ່ງຂັນຮັກຊາດພັດທະນາ ໂດຍເຮັດໃຫ້ດີ, ເຮັດໃຫ້ໄວ, ເຮັດໃຫ້ຫຼາຍ,ເຮັດໃຫ້ຖືກຕ້ອງກົດໝາຍ ແລະ ວຽກງານສໍາຄັນ ອື່ນໆອີກ. ໃນຕອນທ້າຍທ່ານເຈົ້າຍັງເນັ້ນໃຫ້ເມືອງກະກຽມສະຫຼອງປີທ່ອງທ່ຽວລາວ 2018 ທີ່ຈະມາເຖິງນີ້ ດ້ານກິດຈະກໍາຕ່າງໆຂອງການທ່ອງທ່ຽວທີ່ສາມາດດຶງດູດນັກທ່ອງທ່ຽວແມ່ນໃຫ້ມີຄວາມຄຶກຄື້ນກວ່າເກົ່າ.

ແຫຼ່ງຂ່າວ: ຂ່າວສານຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.