Header Ads

ຊາວເມືອງເງິນສ້າງຂະບວນການຄໍານັບຮັບຕ້ອນວັນປະຫວັດສາດສໍາຄັນຂອງຊາດ


    ເພື່ອເປັນການສ້າງຂະບວນການ ແລະ ຜົນງານໄວ້ຄໍານັບຮັບຕ້ອນວັນປະຫວັດສາດສໍາຄັນຂອງຊາດ ກໍ່ຄື ວັນຊາດທີ 2 ທັນວາ ຄົບຮອບ 42 ປີ, ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 97 ປີ ທີ່ຈະໝູນວຽນມາບັນຈົບຄົບຮອບອີກວາລະໜຶ່ງ ທັງເປັນຫ້າງຫາກະກຽມ ໃຫ້ແກ່ການສະເຫຼີມສະຫລອງ ວັນສ້າງຕັ້ງເມືອງເງິນ ຄົບຮອບ 25 ປີ ແລະ ງານແຂ່ງຂັນເຮືອຊ່ວງປະຈໍາປີ2017 ເພື່ອໃຫ້ມີຂະບວນການຜົນງານ ປະດັບເອ້ນັ້ນ ມາໃນຕອນເຊົ້າຂອງວັນທີ 1 ພະຈິກ 2017  ນີ້ ຢູ່ອ່າງເກັບນໍ້າຫ້ວຍນານ້ອຍ ເມືອງເງິນ ແຂວງ ໄຊຍະບູລີ 



ພະນັກງານ ທະຫານ ຕຳຫຼວດ ໄດ້ສົມທົບກັບ ພໍ່ແມ່ປະຊາຊົນ ເທດສະບານເມືອງ ໄດ້ສາມັກຄີກັນສ້າງຂະບວນການອອກແຮງງານລວມ ດ້ວຍການອານາໄມຖາງຫຍ້າຕັດຫຍ້າ ອອກຈາກແຄມອ່າງເກັບນໍ້າຫ້ວຍນານ້ອຍ ເພື່ອກະກຽມຈັດງານແຂ່ງຂັນເຮືອຊ່ວງປະຈຳປີ ການອອກແຮງງານສ້າງຂະບວນການໃນຄັ້ງນີ້ ແມ່ນໄດ້ມີອານຸກໍາມະການສະຖານທີ່ລົງຊີ້ນໍາຕົວຈິງ ເພື່ອເຮັດໃຫ້ບໍລິເວນຂອງໜ້າອ່າງເກັບນໍ້າດັ່ງກ່າວມີຄວາມສວຍສົດງົດງາມ ແລະ ສະອາດງາມຕາ ທັງເປັນການຮັດແໜ້ນຄວາມສາມັກຄີ ລະຫວ່າງພະນັກງານ ກັບປະຊາຊົນ ໃຫ້ ແໜ້ນແຟ້ນຍິງຂື້ນ ນອກຈາກການອານາໄມໜ້າອ່າງ ແລ້ວ ຍັງໄດ້ສາມັກຄີກັນຕັດຫຍ້າເດີນກິລາເມືອງ,ໃນຂອບເຂດ ຮັບຜິດຊອບຂອງຕົນ, ເສັ້ນທາງໄປດ່ານສາກົນນໍ້າເງິນ, ອານາໄມຫ້ອງການ,ທາສີຫ້ອງການ, ຕິດທຸງຊາດ, ທຸທິວ, ທຸງພັກ, ຄຳຂວັນ ໄປພ້ອມກັບຂະບວນການດັ່ງກ່າວ ຍັງໄດ້ມີການແຂ່ງຂັນກິລາບານເຕະຊາຍ ຊິງຂັນເຈົ້າເມືອງ ເພື່ອຄຳນັບຮັບຕ້ອນ ວັນຊາດທີ 2 ທັນວາ ຄົບຮອບ 42 ປີ ,  ສຳລັບງານແຂ່ງຂັນເຮືອຊ່ວງປີນີ້ ແມ່ນຈະໄດ້ຂື້ນໃນວັນທີ 18 ພະຈິກ 2017 ທີ່ຈະມາເຖິງນີ້

ໂດຍ: ອິນແປງ ແຫວນຄຳ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.