Header Ads

ແຂວງຫຼວງພະບາງຫາລືກະກຽມວຽກງານສູ່ປີທ່ອງທ່ຽວລາວ 2018





ວັນທີ່ 1 ພະຈິກ 2017 ຜ່ານມາ ທີ່ປະຊຸມພະແນກ ຖວທ ແຂວງຫຼວງພະບາງ ໄດ້ຈັດກອງປະຊຸມປຶກສາຫາລື,ກະກຽມວຽກງາານຮອບດ້ານ ເພື່ອເປີດປີທ່ອງທ່ຽວລາວ ທີ່ແຂວງຫຼວງພະບາງ ໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ,ມີຫົວໜ້າພະແນກ ຖວທ ແຂວງຫຼວງພະບາງ,ພະແນກການອ້ອມຂ້າງແຂວງ,ປກສ,ປກຊ,ຕາງໜ້າເມືອງ,ຂະແໜງການກ່ຽວຂ້ອງ,ສະມາຄົມທຸລະກິດທ່ອງທ່ຽວ ແລະ ອົງການຈັດຕັ້ງມະຫາຊົນພາຍໃນແຂວງເຂົ້າຮ່ວມ.



ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ໄດ້ກ່າວວ່າ: ການເປີດປີການທ່ອງທ່ຽວລາວ ປີ 2018 ທີ່ແຂວງຫຼວງພະບາງ,ເພື່ອເປັນການດຶງດູດ ແລະ ເປີດໂອກາດໃຫ້ນັກທ່ອງທ່ຽວຈາກພາຍໃນ ແລະ ຕ່າງປະເທດເຂົ້າມາຢ້ຽມຢາມ-ທ່ຽວຊົມແຂວງຫຼວງພະບາງ ໃຫ້ຫຼາຍຂື້ນ,ໂດຍທ່ານໄດ້ຍົກໃຫ້ເຫັນ 4 ຍຸດທະສາດຂອງການເປີດປີທ່ອງທ່ຽວລາວ 2018 ເຊັ່ນ: ສ້າງສະຕິຊາດໃຫ້ແກ່ພົນລະເມືອງລາວທີ່ມີຈິດໃຈຮັກຊາດຮັກບ້ານເກີດເມືອງນອນ ໄດ້ຮູ້ຈັກສ້າງສາພັດທະນາ ແລະ ອານຸລັກປົກປັກຮັກສາທ້ອງຖິ່ນຂອງຕົນ,ເພາະວ່າປະເທດລາວເປັນປະເທດໜຶ່ງທີ່ມີຊັບພະຍາກອນທໍາມະຊາດຫຼາກຫຼາຍແຫ່ງ ທີ່ສວຍງາມບໍ່ແພ້ຊາດອື່ນໃນໂລກ,ເພື່ອຊຸກຍູ້ໃຫ້ຜູ້ປະກອບການທຸລະກິດປູກພືດຜະລິດເປັນສິນຄ້າ ຮອງຮັບດ້ານການບໍລິການແຂກຄົນທີ່ມາຢ້ຽມຢາມ,ທ່ຽວຊົມ ແລະ ພັກເຊົາຢູ່ພາຍໃນແຂວງ,ເພື່ອເປັນການໂຄສະນາໃຫ້ແຂກທັງພາຍໃນ ແລະ ຕ່າງປະເທດ ໄດ້ຮັບຮູ້ເມືອງມໍລະດົກໂລກ ເຊິ່ງໃນນັ້ນໄດ້ມີແຫຼ່ງທ່ອງທ່ຽວຫຼາຍແຫ່ງທີ່ໜ້າສົນໃຈ ເປັນຕົ້ນແມ່ນມີວັດທະນະທໍາ,ທໍາມະຊາດ ແລະ ປະຫວັດສາດທີ່ຫຼາກຫຼາຍພ້ອມຮອງຮັບໃຫ້ຜູ້ທີ່ມາທ່ຽວຊົມ ແລະ ສໍາພັດດ້ວຍບັນຍາກາດຄຶກຄື້ນ.



 ກອງປະຊຸມຄັ້ງນີ້ກໍໄດ້ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບຈັດກິດຈະກໍາປີການທ່ອງທ່ຽວລາວ 2018 ຂອງແຂວງຫຼວງພະບາງ.ຈາກນັ້ນຄະນະທີ່ຖືກແຕ່ງຕັ້ງໄດ້ຮ່ວມກັນປຶກສາຫາລືກັນກ່ຽວກັບການສ້າງກິດຈະກໍາໃຫ້ຫຼາກຫຼາຍ,ໃນນັ້ນຄາດຄະເນວ່າອາດຈະມີ 13 ກິດຈະກໍາໃຫຍ່,ເຊິ່ງແຕ່ລະກິດຈະກໍາແມ່ນຈະໄດ້ຂະຫຍາຍເປັນບູລິມະສິດ ໃຫ້ແຕ່ລະທ້ອງຖິ່ນເປັນຜູ້ຈັດຕັ້ງປະຕິບັດຕາມແຕ່ລະປະເພນີ ແລະ ມູນເຊື້ອຂອງທ້ອງຖິ່ນທີ່ເຄີຍມີມາແຕ່ກອ່ນ ລວມທັງກິດຈະກໍາອັນໃໝ່ທີ່ສ້າງຂື້ນ.

ຂ່າວ: ເພັດສາຄອນ ສິມມະວົງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.