Header Ads

ເປີດກອງປະຊຸມແຫ່ງຊາດ ດ້ານໂພສະນາການ ຄັ້ງທີ III






ໃນຕອນເຊົ້າ ຂອງວັນທີ 02 ພະຈິກ 2017 ຢູ່ທີ່ສູນຝຶກອົບຮົມ ລາວ-ຍີ່ປຸ່ນ (ICTC) ໄດ້ຈັດກອງປະຊຸມແຫ່ງຊາດ ດ້ານໂພສະນາການ ຄັ້ງທີ III ແລະ ຄະນະກຳມະການແຫ່ງຊາດ ດ້ານໂພສະນາການ ປະຈໍາປີ 2017 ຂຶ້ນ ໂດຍພາຍໃຕ້ການເປັນປທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການແຫ່ງຊາດ ດ້ານໂພສະນາການ, ໂດຍມີທ່ານລັດຖະມົນຕີ, ບັນດາຮອງລັດຖະມົນຕີ, ທ່ານເອກອັກຄະລັດຖະທູດສະຫະພາບເອີລົບ ປະຈໍາ ສປປ ລາວ, ບັນດາຜູ້ຕາງ ໜ້າຈາກຄະນະກໍາມະການແຫ່ງຊາດ ດ້ານໂພສະນາການ ຂັ້ນສູນກາງ ແລະ ທ້ອງຖິ່ນ, ອົງການຈັດຕັ້ງສາກົນຕ່າງໆ ພ້ອມດ້ວຍ ພະນັກງານທີ່ກ່ຽວຂ້ອງ ເຂົ້າຮ່ວມ.



ໃນໂອກາດກ່າວເປີດກອງປະຊຸມ ທ່ານ ສອນໄຊ ສີພັນດອນ ໄດ້ກ່າວວ່າ: ການຈັດກອງປະຊຸມຄັ້ງນີ້ ແມ່ນມີຄວາມໝາຍ ແລະ ຄວາມສໍາຄັນ, ຊຶ່ງໄດ້ໄຂຂຶ້ນໃນທ່າມກາງບັນຍາກາດ ທີ່ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ພວມຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ VIII ຂອງລັດຖະບານ ແນໃສ່ເຮັດໃຫ້ປະເທດຊາດ ຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ ໃນປີ 2020, ໃນນີ້ ວຽກງານໂພສະນາການ ເປັນໜຶ່ງໃນວຽກງານບູລິມະສິດ ທີ່ສໍາຄັນຂອງຊາດ ຍາມໃດ ພັກ ແລະ ລັດຖະບານ ກໍ່ໄດ້ເອົາໃຈໃສ່ຕະຫຼອດມາ ໂດຍໄດ້ມີການອະນຸມັດສ້າງຕັ້ງ ກົນໄກການປະສານງານ ກັບຫຼາຍພາກສ່ວນຂຶ້ນ ພ້ອມທັງ ມີການປັບປຸງແຕ່ລະໄລຍະ, ຈັດສັນງົບປະມານ ແລະ ປຸກລະດົມຂົນຂວາຍ ເອົາການສະໜັບສະໜູນ ຈາກທຸກພາກສ່ວນໃນສັງຄົມ ທັງພາຍໃນ ແລະ ຕ່າງປະເທດ ເພື່ອຈັດຕັ້ງປະຕິບັດວຽກງານດັ່ງກ່າວ. ຈາກການລາຍງານຂອງຂະແໜງການທີ່ກ່ຽວຂ້ອງ ເຫັນວ່າ: ສະຖານະພາບ ດ້ານໂພສະນາການ ຂອງແມ່ຍິງ ແລະ ເດັກນ້ອຍ ຢູ່ ສປປ ລາວ ໄດ້ຮັບການປັບປຸງດີຂຶ້ນ ເຊິ່ງອັດຕາຂາດສານ ອາຫານຊໍ້າເຮື້ອ (ເຕ້ຍ) ໃນເດັກອາຍຸຕໍ່າກວ່າ 5 ປີ ຫຼຸດລົງປະມານ 10 ສ່ວນຮ້ອຍ ໃນໄລຍະ 5 ປີຜ່ານມາ (2011-2015) ແຕ່ເຖິງຢ່າງໃດກໍ່ຕາມ ຕົວເລກດັ່ງກ່າວ ຍັງກວມເອົາອັດຕາຕົວເລກ ທີ່ສູງກວ່າໝູ່ ເມື່ອທຽບໃສ່ບັນດາປະເທດອາຊຽນ ແລະ ທຽບໃສ່ຄາດໝາຍ ຂອງການພັດທະນາ ແບບຍືນຍົງ SDGs ຂອງໂລກ ໂດຍສະເພາະແມ່ນ ການລົບລ້າງທຸກຮູບແບບ ຂອງການຂາດສານອາຫານ ໃນປີ 2030 ຍິ່ງເປັນສິ່ງທ້າທາຍອັນໃຫຍ່ຫຼວງ ສໍາລັບປະເທດເຮົາ.


ສະນັ້ນ, ບັນຫາດັ່ງກ່າວ ແມ່ນຕ້ອງໄດ້ຮີບຮ້ອນແກ້ໄຂໃຫ້ສໍາເລັດໂດຍໄວ ເຊິ່ງການແກ້ໄຂ ບັນຫາການຂາດສານອາຫານ ຢູ່ ສປປ ລາວ ແມ່ນທຸກພາກສ່ວນທີ່ກ່ຽວຂ້ອງ ຕ້ອງເອົາໃຈໃສ່ ຮ່ວມກັນແກ້ໄຂບັນຫາດັ່ງກ່າວ ບໍ່ແມ່ນຜູ້ໃດຜູ້ໜຶ່ງ ຫຼື ຂະແໜງການໃດໜຶ່ງ ຈະແກ້ໄຂໄດ້ໂດຍລໍາພັງ. ດັ່ງນັ້ນ, ກອງປະຊຸມໃນຄັ້ງນີ້ ຈຶ່ງມີຄວາມໝາຍ ແລະ ຄວາມສໍາຄັນຫຼາຍ ເຊິ່ງພວກເຮົາຈະໄດ້ຮັບຟັງ ການລາຍງານ ກ່ຽວກັບຜົນສໍາເລັດ ໃນການແກ້ໄຂວຽກງານໂພສະນາການ ໂດຍການມີສ່ວນຮ່ວມຂອງຫຼາຍພາກສ່ວນ ໃນໜຶ່ງປີຜ່ານມາ ພ້ອມທັງ ພ້ອມກັນປຶກສາຫາລື ເພື່ອຖອດຖອນບົດຮຽນ ກ່ຽວກັບຂໍ້ຄົງຄ້າງ, ບັນດາສິ່ງທ້າທາຍ ແລະ ວິທີທາງແກ້ໄຂໃນຕໍ່ໜ້າ, ການຈັດຕັ້ງປະຕິບັດ ຍຸດທະສາດໂພຊະນາການ ແບບໜຶ່ງດຽວ, ການຈັດສັນງົບປະມານ, ການສະໜັບສະໜູນ ຈາກສາກົນ ແລະ ການກໍານົດແຜນການ ໃນປີ 2018 ເພື່ອຫຼຸດຜ່ອນການຂາດສານອາຫານ ແລະ ເຮັດໃຫ້ເດັກນ້ອຍ ມີການຈະເລີນເຕີບໂຕ, ມີສຸຂະພາບທີ່ດີ ແລະ ກາຍເປັນກໍາລັງແຮງສໍາຄັນຂອງຊາດ ໃນອານາຄົດ ຄືດັ່ງທີ່ນັກວິທະຍາສາດຫຼາຍທ່ານ ໄດ້ຢັ້ງຢືນວ່າ: ໂພສະນາການ ພັດທະນາຄົນ, ຄົນພັດທະນາຊາດ, ການເອົາໃຈໃສ່ແກ້ໄຂ ວຽກງານໂພສະນາການ ແມ່ນການພັດທະນາປະເທດຊາດ.



ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.