Header Ads

ມາລະຍາດ ໃນການ ນຳໃຊ້ຮູບຖ່າຍຂອງຄົນອື່ນ! ສຽງຈົ່ມຈາກຊ່າງພາບ


ມື້ນີ້ຮັກລາວ ໂທລະໂຄ່ງ ຈະໄດ້ນຳເອົາ ເລື່ອງລາວຈາກ ບັນດາຊ່າງພາບ ທີ່ໄດ້ສ້າງສັນຜົນງານ ຖ່າຍທອດຄວາມງົດງາມ ຂອງເມືອງລາວ, ບໍ່ວ່າຈະເປັນບຸນງານປະເພນີ້, ເຫດການສຳຄັນ, ສະຖານທີ່ສຳຄັນຕ່າງໆ. ເຮັດໃຫ້ຄົນລາວ ໃນຍຸກນີ້ ສາມາດໄດ້ຮັບຮູ້, ໄດ້ຍິນ ໄດ້ຊົມ ເລື່ອງລາວໄດ້ຢ່າງວ່ອງໄວ, ງົດງາມ ແທ້ໆ.

ຄຽງຄູກັບ ຜົນງານທີ່ບັນດາຊ່າງພາບຕ່າງໆໄດ້ສ້າງສັນໄວ້ນັ້ນ, ຍັງມີບາງກຸ່ມຄົນທີ່ ເອົາພາບໄປນຳໃຊ້ແບບ ບໍ່ຖືກຕ້ອງ ຫຼື ຂາດມາລະຍາດ,​ ຖ້າຈະເວົ້າໄປໃນທາງ ກົດໝາຍ ກະຊິແມ່ນລະເມີດ ຊັບສິນທາງປັນຍາ. ບາງຄົນ ກະເປັນຮອດ ລະດັບພະນັກງານຂັ້ນສູງ ກະຍັງບໍ່ທັນເຊື່ອມຊຶມ ແລະ ເຂົ້າໃຈເຖິງ ມາລະຍາດໃນການໃຊ້ຮູບ. 

ເພາະສະນັ້ນ, ມື້ນີ້ກະເລີຍ ຈະນຳເອົາຄຳແນະນຳງ່າຍໆ ເພື່ອໃຫ້ທຸກໆທ່ານທີ່ ຕ້ອງການນຳເອົາຮູບຂອງຊ່າງພາບຕ່າງໆໄປນຳໃຊ້ ຫຼື ແຊ ທາງໂຊຊຽວ ຂອງທ່ານ ມີດັ່ງນີ້.


ຂໍ້ທີ່ບໍ່ຄວນເຮັດ:
1. ຢ່າຕັດຕໍ່, ດັດແປງ ຫຼື ຕັດຂໍ້ມູນຂອງຮູບຕົ້ນສະບັບ. ເຫດການນີ້ຖືວ່າກຳລັງເປັນທີ່ນິຍົມຂອງ ຜູ່ໃຊ້ເຟສບຸກບາງກຸ່ມ. ທີ່ເອົາຮູບຂອງຄົນອື່ນມາແລ້ວມັດຕັດ ລາຍນໍ້າ ທີ່ເປັນສັນຍາລັກ ຂອງຊ່າງພາບຄົນນັ້ນໆ ອອກ ເພື່ອຄິດວ່າ ຮູບນັ້ນຈະເປັນຂອງຕົນເອງ. ຂໍ້ນີ້ ຈົ່ງຢ່າໄດ້ເຮັດແທ້ໆເດີ. ເພາະຖືວ່າເປັນການຂາດມາລະຍາດ ສຸດໆ ໃນການທີ່ຈະໄປຕັດຮູບລາຍນໍ້າ ຫຼື ສັນຍາລັກຂອງຊ່າງພາບຄົນດັ່ງກ່າວ.


2. ຢ່າເອົາໄປນຳໃຊ້ໃນເຊີງພານິດ (ເພື່ອຫວັງກຳໄລ) ໂດຍທີ່ບໍ່ໄດ້ຮັບອານຸຍາດ ຫຼື ຮັບການເຫັນດີ ຈາກເຈົ້າຂອງພາບ. ປະເດັນນີ້ ກໍ່ຖືວ່າສຳຄັນ ເພື່ອຈະເປັນການໃຫ້ກຳລັງໃຈ ແລະ ເຄຣດິດ ແລະ ຊ່ວຍຊຸກຍູ້ ນໍ້າໃຈຊ່າງພາບ.​ ສະນັ້ນ, ຫາກທ່ານຕ້ອງການ ຈະເອົາຮູບດັ່ງກ່າວ ໄປນໍາໃຊ້ ໃນງານສຳຄັນ ຫຼື ສິ່ງພິມຕ່າງໆ ຈຳຕ້ອງໄດ້ຂໍອານຸຍາດ ຈາກເຈົ້າຂອງພາບເສຍກ່ອນ. ຖາກຫາກວ່າລັກເອົາໄປໃຊ້ ແລ້ວ ເຈົ້າຂອງພາບຮູ້ ທ່ານອາດຈະຖືກປັບໃໝໄດ້ເດີ.


3. ຈົ່ງຂອບໃຈ ແລະ ໃຫ້ເຄຣດິດ ຊ່າງພາບທຸກຄັ້ງທີ່ນຳໃຊ້ຮູບ ຂອງເຂົາເຈົ້າ. ອັນນີ້ ຈົ່ງໃຫ້ຖືເປັນສິ່ງທີ່ຄວນປະຕິບັດ. ວ່າຮູບທີ່ທ່ານໄດ້ມາ ຫຼື ນຳໃຊ້ໃນການເຜີຍແຜ່ນັ້ນ ແມ່ນຂອງບຸກຄົນໃດ. ກໍ່ຈະເປັນການໃຫ້ກຳລັງໃຈ. ການແຊ ອາດຈະມີໃນຮູບແບບການແຊ ຈາກຕົ້ນສະບັບ ຫຼື ບາງຄັ້ງອາດຈະບັນທຶກຮູບ ແລ້ວລົງອີກຄັ້ງ ແຕ່ກໍ່ຕ້ອງ ໃຊ້ເຄຣດິດເຈົ້າຂອງພາບຕະຫຼອດ. ໝາຍເຫດ: ຊ່າງພາບບາງຄົນຈະເປັນປະເພດຮັກຮູບຂະເຈົ້າ ສະນັ້ນ, ອາດຈະໃຈຮ້າຍເວລາຄົນທີ່ເອົາຮູບ ໄປໂດຍບໍ່ຂໍອານຸຍາດ. ກໍ່ໃຫ້ກວດການນິໃສໃຈຄໍ ຂອງຊ່າງພາບຄົນນັ້ນໆ.

ນອກຈາກຄົນເອົາພາບໄປແລ້ວ, ສ່ວນຊ່າງພາບເອງ ກໍ່ຕ້ອງໃຈໃຫຍ່ແດ່. ເພາະຊ່າງພາບບາງຄົນຕອນຍັງບໍ່ທັນດັງ ກໍ່ແມ່ນຢາກໃຫ້ໝູ່ແຊໆ ແລະ ເຜີຍແຜ່ ໃຫ້ບາດວ່າ ດັງມີຊື່ສຽງ ກໍ່ເລີ່ມຈະຫວງພາບ. ຄັນຜູ່ທີ່ແຊໄປເຂົາບອກທີ່ໄປທີ່ມາ ໃຫ້ເຄຣດີດ ກໍ່ຖືວ່າໂອເຄແລ້ວ.


ເອົາລະນໍ້! ກໍ່ຂໍເປັນກຳລັງໃຈໃຫ້ກັບຊ່າງພາບທຸກຄົນ ໃຫ້ສ້າງສັນຜົນງານ.

ຂອບໃຈພາບປະກອບຈາກ:
1. Houmphet Manisouk
2. Kham Kham
3. Anouphon Phomhacsar
4. Sanasone i Wedding Studio
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.