Header Ads

ເຊກອງ ກະກຽມເປີດປີທ່ອງທ່ຽວລາວປີ 2018







 ວັນທີ 9 ພະຈິກ 2017 ນີ້ ທີ່ຫ້ອງປະຊຸມຫ້ອງວ່າການປົກຄອງແຂວງເຊກອງ ໄດ້ມີການປະຊຸມປຶກສາຫາລື ແລະ ປະກອບຄຳຄິດຄໍາເຫັນໃສ່ແຜນການກະກຽມເປີດປີທ່ອງທ່ຽວລາວປີ 2018 ທີ່ແຂວງເຊກອງ ທີ່ຈະໄດ້ຈັດຂຶ້ນໃນຫມໍ່ໆນີ້ ໂດຍພາຍໃຕ້ການເປັນປະທານຂອງທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ປະທານຄະນະກໍາມະການຈັດງານປີທ່ອງທ່ຽວລາວ 2018 ຂັ້ນແຂວງ, ທ່ານ ບູ່ໄຊ ໄຊຍະເສນ ຫົວຫນ້າພະແນກ ຖວທ ແຂວງ ຮອງປະທານຈັດງານປີທ່ອງທ່ຽວລາວປີ 2018 ຂັ້ນແຂວງ, ມີບັນດາຄະນະກໍາມະການ ແລະອະນຸກໍາມະການທີ່ກ່ຽວຂ້ອງເຂົ້າຮ່ວມ.



ກອງປະຊຸມໄດ້ຮັບຟັງລາຍງານຄວາມຄືບໜ້າ ແລະປະກອບຄຳເຫັນໃສ່ບັນດາວຽກງານທີ່ສຳຄັນໃນການກະກຽມວຽກງານດ້ານຕ່າງໆ ເປັນຕົ້ນດ້ານບຸກຄະລາກອນຮັບຜິດຊອບການກຳນົດວາລະການເຄື່ອນໄຫວວຽກງານຕ່າງໆ ການກຳນົດກິດຈະກຳການທ່ອງທ່ຽວລາວ ໃນປີ 2018 ທີ່ແຂວງເຊກອງ, ເນື້ອໃນຈິດໃຈການຈັດງານປີທ່ອງທ່ຽວລາວປີ 2018, ພ້ອມທັງຄົ້ນຄ້ວາແຫຼ່ງທຶນ ແລະ ແຜນງົບປະມານການໃຊ້ຈ່າຍຕ່າງໆ, ການອອກແບບສັນຍະລັກ ແລະຄຳຂັວນການທ່ອງທ່ຽວ, ຈຸດປະສົງລະດັບຄາດໝາຍ, ວິທີການ ແລະມາດຕະການຈັດຕັ້ງປະຕິບັດການຈັດງານປີທ່ອງທ່ຽວລາວ 2018 ນີ້ ໂດຍແຂວງເຊກອງໄດ້ແບ່ງຄວາມຮັບຜິດຊອບແຕ່ງຕັ້ງຄະນະກໍາມະການຊີ້ນໍາຂັ້ນແຂວງ ແລະອະນຸກໍາມະການຊ່ວຍວຽກໃນການຈັດງານປີທ່ອງທ່ຽວລາວ ປີ 2018 ທີ່ແຂວງເຊກອງ ປະກອບມີ 14 ອະນຸການ ແລະໄດ້ກໍານົດເອົາວັນທີ 31 ທັນວາ 2017 ນີ້ເປັນມື້ຈັດງານເປີດປີທ່ອງທ່ຽວ ທີ່ສວນຫລັກເມືອງ ແຂວງເຊກອງ. ປະຈຸບັນການກະກຽມເປີດປີທ່ອງທ່ຽວລາວປີ 2018 ທີ່ແຂວງເຊກອງ ໃນແຕ່ລະອະນຸຮັບຜິດຊອບແມ່ນສາມາດຈັດຕັ້ງປະຕິບັດສໍາເລັດແລ້ວ 50%. 



ໃນໂອກາດນີ້ ທ່ານຮອງເຈົ້າແຂວງເຊກອງ ປະທານຄະນະກໍາມະການຈັດງານປີທ່ອງທ່ຽວລາວປີ 2018 ຂັ້ນແຂວງ ໄດ້ເນັ້ນໃຫ້ພາກສ່ວນ ແລະ ຂະແໜງການທີ່ກ່ຽວຂ້ອງເອົາໃຈໃສ່ຕື່ມ ເປັນຕົ້ນ ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍ ແລະ ຄວາມສະອາດຈົບງາມໃນສັງຄົມໂດຍ ຕ້ານ ແລະ ສະກັດກັ້ນປາກົດການຫຍໍ້ທໍ້ ການກໍ່ອາຊະຍະກຳ ແລະ ປາກົດການຫຍໍ້ທໍ້ອື່ນໆທີ່ເປັນພາບພົດທີ່ບໍ່ດີ, ປັບປຸງພື້ນຖານໂຄງລ່າງ ເພື່ອຮອງຮັບການທ່ອງທ່ຽວທີ່ຈຳເປັນ ເປັນຕົ້ນ ຄວາມສະອາດຈົບງາມຂອງເສັ້ນທາງ, ບ້ານເຮືອນປະຊາຊົນ, ສະຖານທີ່ທ່ອງທ່ຽວຕ່າງໆ, ທີ່ພັກ, ຮ້ານອາຫານ, ພາຫະນະຂົນສົ່ງ ລະບົບໂທລະຄົມມະນາຄົມ ລວມທັງການບໍລິການແຂກ ໂດຍເນັ້ນໃສ່ຄວາມສະດວກວ່ອງໄວ ທັນໃຈ ສະອາດ ປອດໄພ ຮັກສາໄດ້ວັດທະນະທຳອັນດີງາມຂອງຊາດ ຂອງເຜົ່າ, ການນຳໃຊ້ງົບປະມານ ຕ້ອງບົນພື້ນຖານປະຢັດມັດທະຍັດສົມເຫດສົມຜົນ ຫຼີກເວັ້ນການຟຸມເຟືອຍ, ໂຄສະນາເຜີຍແຜ່ສ້າງຂະບວນການ ແລະຈັດກິດຈະກຳຕ່າງໆໃຫ້ມີບັນຍາກາດຟົດຟື້ນ ມີເນື້ອເລິກເຊິ່ງ ກວ້າງຂວາງ ສາມາດສ້າງຄວາມເຊື່ອໝັ້ນ ແລະດຶງດູດນັກທ່ອງທ່ຽວໄດ້ຢ່າງແທ້ຈິງ.


ປະທານຄະນະກໍາມະການຈັດງານປີທ່ອງທ່ຽວ ທ່ານ ຖາວອນ ພົມມະໄລລຸນ ໄດ້ກ່າວເນັ້ນຕື່ມວ່າ: ບັນດາອະນຸກຳມະການທີ່ຮັບຜິດຊອບວຽກງານແຕ່ລະດ້ານ ໃຫ້ປະສານສົມທົບກັນຈັດຕັ້ງປະຕິບັດວຽກງານໃນຄວາມຮັບຜິດຊອບຂອງຕົນໃຫ້ມີຜົນສຳເລັດ ແລະ ບັນລຸຕາມຄາດໝາຍທີ່ກຳນົດໄວ້, ຜູ້ປະກອບການທີ່ກ່ຽວຂ້ອງກັບວຽກງານການທ່ອງທ່ຽວຕ້ອງເຄື່ອນໄຫວຖືກຕ້ອງຕາມກົດໝາຍ ແລະ ລະບຽບການ ທັງປະກອບພັນທະຂອງຕົນຢ່າງເຕັມສ່ວນການບໍລິການໄດ້ມາດຕະຖານຍຸຕິທຳ ເດັດຂາດບໍ່ໃຫ້ມີກໍລະນີສວຍໂອກາດ ຫຼືເອົາປຽບນັກທ່ອງທ່ຽວ ຊຶ່ງວຽກງານທັງໝົດນັ້ນ ແມ່ນເອົາໃຈໃສ່ຊຸກຍູ້ທຸກພາກສ່ວນໃນແຂວງກໍຄືທົ່ວສັງຄົມໃຫ້ມີສ່ວນຮ່ວມຢ່າງຈິງຈັງ.


ຂ່າວ-ພາບ: ນາລີວັນ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.