Header Ads

ທະນາຄານໂລກ ເພີ່ມທຶນ 15 ລ້ານໂດລາ ເຂົ້າໃນວຽກງານ ສາທາລະນະສຸກ




ໃນ​ວັນ​ທີ 6 ພະຈິກ 2017 ທີ່​ກະຊວງ​ການ​ເງິນ ​ໄດ້​ມີ​ການ​ລົງ​ນາມ​ ການ​ຮັບຮອງ​ອະນຸມັດ​ທຶນ​ເພີ່ມ​ຕື່ມ ຈຳນວນ 15 ລ້ານ​ໂດ​ລາ​ສະຫະລັດ ​ເພື່ອ​ຂະຫຍາຍ​ໂຄງການ​ ແຜນ​ງານ​ຄຸ້ມ​ຄອງ​ບໍລິຫານ​ ສາທາລະນະ​ສຸກ ​ແລະ ​ໂພຊະ​ນາ​ການ, ​ໂດຍ​ການ​ລົງ​ນາມ​ ຂອງທ່ານ ນາງ ທິບ​ພະ​ກອນ ຈັນທະ​ວົງສາ​ ຮອງ​ລັດຖະມົນຕີ ກະຊວງ​ການ​ເງິນ ​ແລະ ທ່ານ ນາງ ​ເອ​ເລັ່ນ ​ໂກນ​ສະຕີ​ນ ຜູ້ອຳນວຍການ​ ທະນາຄານ​ໂລກ ປະຈຳ​ປະ​ເທດ ​ກຳປູ​ເຈຍ, ສປປ ລາວ ​ແລະ ມຽນມາ, ມີ​ ທ່ານ ຈອນ ວິນ​ລ້ຽມ ​ເອກ​ອັກຄະ​ລັດຖະທູດ​ ອົດ​ສະ​ຕາ​ລີ ປະຈຳ ສປປ ລາວ ​ແລະ ທ່ານ​ ກາ​ຊູ​ຮີ​ໂຣ ກູ​ໂນະ ອັກຄະລັດຖະທູດຍີ່ປຸ່ນ ປະຈຳ ສປປ ລາວ, ພ້ອມ​ດ້ວຍ​ພາກສ່ວນ​ກ່ຽວຂ້ອງ ​ເຂົ້າ​ຮ່ວມ​ເປັນ​ສັກຂີ​ພິຍານ.ການ​ເພີ່ມ​ທຶນ​​ໃນຄັ້ງນີ້​, ທະນາຄານ​ໂລກ ໄດ້​ໃຫ້ການ​ສະໜັບສະໜູນ​ທຶນ ຈຳນວນ 10 ລ້ານ​ໂດ​ລາ​ສະຫະລັດ





​​ເງິນ​ຊ່ວຍ​ເຫລືອ​ຫລ້າ 4 ລ້ານ​ໂດ​ລາ​ສະຫະລັດ ຈາກ​ກອງ​ທຶນ​ລວມຂອງ​ຜູ້​ໃຫ້​ທຶນ​ ໃນ​ຂົງ​ເຂດ​ສາທາລະນະ​ສຸກ, ​ເຊິ່ງ​ແມ່ນ​ລັດຖະບານ​ ປະ​ເທດ​ອົດ​ສະ​ຕຣາ​ລີ ​ເປັນ​ຜູ້​ບໍລິຈາກ​ເຂົ້າ​ກອງ​ທຶນ, ​ໂດຍ​ມີ​ເປົ້າ ໝາຍ​ ໃນ​ການ​ເສີມ​ສ້າງ​ ຄວາມ​ເຂັ້ມ​ແຂງ​ ຂອງ​ວຽກ​ງາ​ນສັກ​ຢາ​ກັນ​ພະຍາດ. ພ້ອມ​ນີ້, ທຶນ​ຈຳ​ນວນ 1 ລ້ານ​ໂດ​ລາ​ສະຫະລັດ ຈາກ​ລັດຖະບານ​ຍີ່​ປຸ່ນ ​ເພື່ອ​ສະໜັບສະໜູນ​ ການ​ປັບປຸງ​ລະບົບ​ຖານ​ຂໍ້​ມູນ ​ແລະ ການ​ຕິດຕາມ ​ວຽກ​ງານ​ສາທາລະນະ​ສຸກ. ພາຍຫລັງ​ສິ້ນ​ສຸດ​ໂຄງການ ຄາດ​ວ່າ​ຈະ​ສາມາດ​ ສະໜັບສະໜູນ​ໃຫ້ ສປປ ລາວ ສ້າງ​ລະບົບ​ລວມສູນ​ຂໍ້​ມູນ​ ສາທາລະນະ​ສຸກ ​ແບບ​ຄົບ​ຊຸດ ​ແລະ ຄວບ​ຄຸ​ມທົ່ວ​ປະ​ເທດ.






​​ປັດຈຸບັນທະນາຄານ​ໂລກ​ ໄດ້​ມີ​ການ​ສະໜັບ​ສະ​ໜູນ​ທຶນໃຫ້ 18 ​ໂຄງການ​ໃນລາວ, ​ເຊິ່ງ​ແນ່​ໃສ່​ການ​ລົງທຶນ ​ກັບ​ຄົນ​ເປັນ​ຫລັກ, ​ໂດຍ​ມີ​ຈຸດປະສົງ​ ເພື່ອ​ຫລຸດຜ່ອນ​ອັດຕາ​ ການ​ຂາດ​ສານ​ອາຫານ​ ໃນ​ເດັກນ້ອຍ ​ແລະ ປັບປຸງ​ການ​ເຂົ້າ​ເຖິງ ຄຸ​ນນະພາ​ບການ​ບໍລິການ​ ສາທາລະນະ​ສຸກ ​ໂດຍ​ເປັນ​ໜຶ່ງ​ໃນ​ຂົງ​ເຂດ​ຫລັກ​ ໃນ​ກອບ​ການ​ຮ່ວມ​ມື​ ຂອງ​ທະນາຄານ​ໂລກ​ ປະຈຳ ​ປີ 2017-2021.

ຂ່າວ: ສົມ​ຫວັງ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.