Header Ads

ເຈົ້າຄອງເນັ້ນສ້າງເມືອງວຽງຈັນ ກາຍເປັນເມືອງສະອາດໜ້າຢູ່ ແລະ ມີຄວາມຍືນຍົງ



ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ເຄື່ອນ​ໄຫວ​ຢ້ຽມຢາມ​ຫ້ອງການຄຸ້ມ​ຄອງ ແລະ ບໍລິການ​ຕົວ​ເມືອງວຽງ​ຈັນ (​ຄບຕ) ວັນ​ທີ 15 ທັນວາ 2017.

ທ່ານ​ນາງ ວິໄລ​ວອນ ຈັນທະລາຕີ ຫົວໜ້າ​ຫ້ອງການ ​ຄບຕ ໄດ້​ລາຍ​ງານ​ຂໍ້​ສະດວກ ແລະ ຂໍ້​ຫຍຸ້ງຍາກ​ການຈັດຕັ້ງ​ປະຕິ​ບັດ​ວຽກ​ງານ​ຂອງ​ຫ້ອງການ ​ຄບຕ ວ່າ: ໄລຍະ 1 ປີຜ່ານມາ ຫ້ອງການ ​ຄບຕ ໄດ້​ເອົາໃຈໃສ່ຮັບຜິດຊອບ​ຮັກສາ​ຄວາມ​ສະອາດ​ເສັ້ນທາງ​ຫຼັກ​ໃນ​ຕົວ​ເມືອງ 21 ເສັ້ນທາງ ມີ​ຄວາມ​ຍາວ 90.212 ແມັດ ສຳເລັດ​ລວງ​ຄອງລະບາຍ​ນ້ຳ​ສາຍ​ແມ່ ໂດຍ​ນຳ​ໃຊ້ງົບປະມານ​ລັດ ໄດ້​ຈຳນວນ 2 ຮ່ອງ​ຄື: ຮ່ອງນ້ຳ​ສັກ 2 ແລະ ຮ່ອງ​ທົ່ງ​ສ້າງ​ນາງ​ມີ​ຄວາມ​ຍາວ 1.962 ແມັດ ປັບປຸງ​ຂຸມ​ພັກ​ນ້ຳແຄມ​ທາງ​ຢູ່ 5 ເສັ້ນທາງ​ມີ 12 ຈຸດ ພ້ອມ​ນັ້ນ​ໄດ້​ປຸກລະດົມ​ປະຊາຊົນ​ມີ​ສ່ວນ​ຮ່ວມ​ລວງ​ຄອງ​ລະບາຍ​ນ້ຳ​ສາຍ​ແມ່​ໄດ້​ທັງ​ໝົດ 12 ຮ່ອງ ຍາວ 950 ແມັດ ນຳ​ໃຊ້ງົບປະມານ​ລັດ​ລວງ​ຄອງ​ລະບາຍ​ນ້ຳ​ແຄມ​ທາງ 7 ເສັ້ນ ມີ​ຄວາມຍາວ 265 ແມັດ ແລະ ມີ​ກອງບໍລິການ​ຂົນສົ່ງ​ຂີ້​ເຫຍື້ອ​ຂອງ ​ຄບຕ 1 ກອງ ໜ່ວຍ​ງານ​ບໍ​ລິການ​ຂົນສົ່ງ​ຂີ້​ເຫຍື້ອ​ເມືອງ​ຈັນທະ​ບູ​ລີ 1 ໜ່ວຍ​ງານ ແລະ ບໍລິສັດຜູ້​ປະກອບ​ການ​ຂົນສົ່ງ​ຂີ້​ເຫຍື້ອ 9 ບໍລິສັດ​ທີ່​ຊ່ວຍ​ບໍລິການ​ຂົນສົ່ງ​ຂີ້ເຫຍື້ອ​ຢູ່ 9 ເມືອງ ເພື່ອ​ນຳ​ເອົາ​ຂີ້ເຫຍື້ອ​ໄປ​ຖິ້ມ​ຢູ່​ສະໜາມ​ຂີ້​ເຫຍື້ອ ຫຼັກ 32 ສະເລ່ຍ​ປະລິມານ​ຂີ້ເຫຍື້ອ​ທີ່​ຂົນ​ໄປ​ຖິ້ມ 250-300 ໂຕນ​ຕໍ່​ວັນ ພ້ອມ​ນັ້ນ ໄດ້​ບົວ​ລະບັດ​ຮັກສາ​ສວນ​ສາທາລະນະສວນ​ດອນ​ກາງ​ທາງ ແລະ ເຂດຂຽວ​ຈຳນວນ 38 ພັນຕາ​ແມັດ ດ້ວຍ​ການ​ຫົດ​ນ້ຳ ຕັດ​ຫຍ້າ ໃສ່ຝຸ່ນ​ພູນ​ດິນ​ໃຫ້​ມີ​ຄວາມ​ຈົບງາມ ນອກ​ນີ້ ໄດ້​ສະເໜີ​ໃຫ້ການ​ນຳ ນວ ສະໜັບສະໜູນ​ການ​ສ້າງຕັ້ງຫ້ອງການ ​ຄບຕ ໃຫ້​ຄົບ 9 ຕົວ​ເມືອງຊ່ວຍ ແລະ ອຳນວຍຄວາມ​ສະດວກ​ໃນ​ການ​ປຸກ​ລະດົມ​ແຫຼ່ງ​ທຶນ ​ເຂົ້າ​ມາ​ຊ່ວຍ​ວຽກອະນາໄມ​ປະດັບ​ປະດາ​ຕົວ​ເມືອງໃຫ້​ຫຼາຍ​ຂຶ້ນ ພ້ອມ​ທັງ​ຂໍ​ສິດ​ອະນຸຍາດ​ການ​ຕິດ​ຕັ້ງ​ປ້າຍ​ໂຄສະນາຕ່າງໆ​ທຸກ​ປະເພດ ເພາະ​ເຫັນວ່າ​ຕິດ​ພັນ​ກັບ​ວຽກ​ຄວາມ​ງາມ ປັດຈຸບັນ​ພະ​ແນກ​ໂຍທາ​ທິ​ການ ແລະ ຂົນສົ່ງ ເປັນ​ຜູ້​ອອກ​ອະນຸຍາດ ແລະ ສະເໜີ​ໃຫ້​ອອກ​ຂໍ້​ຕົກລົງຂອງ​ທ່ານ​ເຈົ້າ​ຄອງ​ຕໍ່​ກັບ​ການມອບ​ວຽກ​ກໍ່ສ້າງ ສ້ອມແປງຮ່ອງ​ລະບາຍ​ນ້ຳ​ສາຍ​ຫຼັກ​ຄືນ​ໃຫ້​ພະ​ແນກ​ໂຍທາ​ທິ​ການ ແລະ ຂົນສົ່ງ ເພື່ອເປັນ​ບ່ອນ​ອີງ​ເຂົ້າ​ໃນ​ການ​ປັບປຸງພາລະ​ບົດບາດ​ຂອງ ​ຄບຕ ຂໍ​ທິດຊີ້​ນຳ​ບັນຫາ​ໜີ້​ສິນ​ຄ່າ​ໄຟ​ສາທາລະນະ ຄ່າ​ໄຟ​ທາງໄຟ ສວນ​ສາທາລະນະ​ທີ່​ບໍ່​ມີ​ຜູ້​ຄຸ້ມຄອງ ແລະ ສະເໜີ​ຂໍ​ພາຫະນະ ເພື່ອ​ໃຫ້​ຄະນະ​ຮັບຜິດຊອບ​ລົງເຄື່ອນ​ໄຫວ​ກວດກາ​ວຽກ​ງານ​ອະນາໄມ​ ຄວາມ​ສະອາດ​ ຄວາມ​ບໍ່ເປັນ​ລະບຽບ​ຮຽບ​ຮ້ອຍ​ໃນ​ຕົວເມືອງ ແນໃສ່​ອອກ​ກວດກາ​ທຸກ​ວັນ ແລະ ເປື້ອນ​ເຮືອນ​ໃຜ​ເຮັດ​ບົດ​ບັນທຶກ​ລົງ​ປັບ​ໃໝ​ຕາມ​ລະບຽບ​ການ.

ໂອກາດ​ນີ້​ທ່ານ​ເຈົ້າ​ຄອງ ນວ ໄດ້​ຍ້ອງຍໍ​ຊົມເຊີຍ​ຕໍ່​ກັບ​ຜົນ​ສຳເລັດ​ທີ່​ຫ້ອງການ ​ຄບຕ ຍາດ​ມາໄດ້ ເຊິ່ງ​ເປັນ​ການ​ປະກອບສ່ວນສຳຄັນ​ໃຫ້​ແກ່​ການ​ພັດທະນາ ນວ ໃຫ້​ເປັນ​ນະຄອນ​ທີ່​ໜ້າ​ຢູ່ພ້ອມ​ນັ້ນ ທ່ານ​ຍັງ​ໄດ້​ເນັ້ນ​ໃຫ້​ຄະນະ​ນຳ​ຕະຫຼອດ​ຮອດ​ພະນັກງານ​ພາຍ​ໃນຫ້ອງການ ​ຄບຕ ກວດກາ​ເບິ່ງ​ຄືນ ບັນດາ​ດ້ານ​ອ່ອນ ຂໍ້ຄົງຄ້າງ​ຂອງການ​ພັດທະນາ​ຕົວ​ເມືອງ​ວຽງ​ຈັນ ເພື່ອ​ສ້າງ​ໃຫ້​ເມືອງ​ວຽງ​ຈັນ​ກາຍເປັນ​ເມືອງ​ສະອາດ ໜ້າ​ຢູ່ ມີຄວາມ​ຍືນ​ຍົງ ແລະ ທັນ​ສະໄໝ ພ້ອມ​ທັງ​ໃຫ້​ປະຕິບັດ​ນະໂຍບາຍ 6 ສ ຂອງ​ເຈົ້າ​ຄອງ ນວ ວາງອອກ ພ້ອມ​ນັ້ນ​ທ່ານ​ໄດ້​ປຶກສາ​ຫາລື​ການຈັດຕັ້ງ​ປະຕິບັດ​ມະຕິ​ກອງປະຊຸມ ​ຄັ້ງ​ທີ VI ຂອງ ນວ ແລະ ມະຕິ X ຂອງ​ກົມ​ການເມືອງ​ສູນ​ກາງພັກ ໃນ​ນີ້​ສຸມ​ໃສ່​ການ​ປັບປຸງ​ປົວແປງ​ພັກ ແກ້​ໄຂ​ບັນດາ​ປາກົດການ​ຫຍໍ້ທໍ້​ຕ່າງໆ ແລະ ປະຕິບັດມາດ​ຕະການ 3 ບຸກ 3 ເພີ່ມ ແລະ 3 ຂະ​ບວນ​ການ​ໃຫ້​ເປັນຂະ​ບວນ​ຟົດຟື້ນ ແລະ ເປັນ​ຮູບ​ປະທຳ ເພື່ອ​ພັດທະນາ ນວ ໃຫ້​ມີຄວາມ​ສີວິໄລ​ເປັນ​ກ້າວໆ.

ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.