Header Ads

ຈັບເປົ້າໝາຍນັດຂາຍຢາບ້າ 17 ມັດ ເທົ່າກັບ 34.000 ເມັດ



ໃນອາທິດຜ່ານມາ, ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໄດ້ເຂົ້າຈັບຕົວເປົ້າໝາຍນັດຊື້ຂາຍຢາບ້າ ຢູ່ບ້ານນາໂພໃຕ້ ເມືອງໂພນໂຮງ ແຂວງວຽງຈັນ ພ້ອມກາງຢາບ້າໄດ້ 17 ມັດ ເທົ່າກັບ 34.000 ເມັດ ພ້ອມກັກຕົວຊື່ ທ້າວ ຕູ້ທ່າວ ອາຍຸ 24 ປີ ຢູ່ບ້ານໂພນງາມ ເມືອງໝຶ່ນ ແຂວງວຽງຈັນ.

ທ້າວ ຕູ້ທ່າວ ໄດ້ຮັບສາລະພາບວ່າ: ໃນເບື້ອງຕົ້ນໃນວັນທີ 20 ພະຈິກ 2017 ໄດ້ມີຜູ້ຮ່ວມຂະບວນການນໍາກັນຢູ່ເມືອງໂພນໂຮງ ແຂວງວຽງຈັນ ໂທລະສັບສັ່ງຊື້ຢາບ້າ ຈຳນວນ 60 ມັດ ແຕ່ຜູ້ກ່ຽວໄດ້ຕອບວ່າ ມີພຽງ 17 ມັດ. ຈາກນັ້ນ, ຈຶ່ງໄດ້ນັດບ່ອນສົ່ງຢູ່ບ້ານນາໂພໃຕ້ ເມືອງໂພນໂຮງ ແຂວງວຽງຈັນ ມາວັນທີ 21 ພະຈິກ 2017 ຜູ້ກ່ຽວພ້ອມໝູ່ 1 ຄົນ ໄດ້ພາກັນຂີ່ລົດຈັກຊ້ອນກັນມາ ພໍໄປຮອດຈຸດນັດໝາຍເວລາປະມານ 14:30 ໂມງ ໃນຄະນະທີ່ກຳລັງຫິ້ວຖົງຢາບ້າໄປສົ່ງໃຫ້ບ່ອນຈຸດນັດໝາຍ ຈຶ່ງຖືກເຈົ້າໜ້າທີ່ຕຳຫຼວດເຂົ້າຈັບຕົວ ພ້ອມຂອງກາງຢາບ້າຈໍານວນດັ່ງກ່າວ. ສ່ວນໝູ່ອີກ 1 ຄົນ ແມ່ນເອົາຕົວຫຼົບໜີ. ປັດຈຸບັນເຈົ້າໜ້າທີ່ກໍາລັງເລັ່ງຕິດຕາມຊອກຫາຜູ້ຮ່ວມຂະບວນການ ເພື່ອນຳຈັບຕົວມາດໍາເນີນຄະດີຕາມກົດໝາຍ.
ປັດຈະບັນ, ຄະດີດັ່ງກ່າວ ເຈົ້າໜ້າທີ່ ປກສ ແຂວງວຽງຈັນ ພວມເລັງສອບສວນຂະຫຍາຍຜົນ ເພື່ອຊອກຫາຜູ້ຮ່ວມຂະບວນການ ແລະ ສະຫຼຸບສໍານວນຄະດີສົ່ງໃຫ້ໄອຍະການດໍາເນີນຄະດີຕາມກົດໝາຍ.
ພາບ ແລະ ຂ່າວ: ນສພ ຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.