Header Ads

ລັດຖະບານຍີ່ປຸ່ນ ສືບຕໍ່ຊ່ວຍເຫຼືອຂະແໜງສາທາ 33 ຕື້ກີບໃນ 3 ໂຄງການ​



ພິທີ​ມອບ-ຮັບ​ອາຄານ​ສູນ​ສຸ​ຂະພາບ​ແມ່ ແລະ ເດັກ​ ໂຄງການ​ກໍ່ສ້າງ​ຫໍ​ພັກ 4 ແຫ່ງ ສຳລັບ​ໂຮງຮຽນ​ສາທາລະນະ​ສຸກ ແລະ ວິ​ທະຍາ​ໄລ ວິທະຍາສາດ​ສຸຂະພາບ ແລະ ໂຄງການ​ກໍ່ສ້າງ​ສຸກສາລາ 26 ແຫ່ງ ພ້ອມ​ດ້ວຍ​ອຸປະກອນການ​ແພດ​ຢູ່​ເຂດ​ຫ່າງ​ໄກ​ສອກຫຼີກຂອງ​ລາວ ສະໜັບສະໜູນ​ໂດຍລັດຖະບານ​ຍີ່ປຸ່ນ ພາຍ​ໃຕ້​ກອງທຶນ​ຍີ່ປຸ່ນ-ອາ​ຊຽນ (JAIF) ເພື່ອສ້າງ​ຄວາມ​ເຂັ້ມແຂງ​ວຽກ​ງານສາທາລະນະ​ສຸກ ຈັດ​ຂຶ້ນ​ວັນ​ທີ 11 ທັນວາ 2017 ຢູ່​ບ້ານ​ດອນ​ກອຍ ເມືອງ​ໄຊ​ເຊດ​ຖາ ນະຄອນຫຼວງວຽງ​ຈັນ ມີ​ທ່ານ ບຸນ​ກອງ ສີ​ຫາວົງ ລັດຖະມົນຕີ​ກະຊວງ​ສາ​ທາລະນະ​ສຸກ ທ່ານ ທາ​ເຄ​ຊິ ຮິ​ຄິ​ຮາຣະ ທູດ​ຍີ່ປຸ່ນ ​ປະຈຳ​ລາວ ແລະ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າຮ່ວມ.
ສຳລັບ 3 ໂຄງການ​ທີ່​ລັດ​ຖະບານ​ຍີ່ປຸ່ນ​ຊ່ວຍເຫຼືອຄັ້ງ​ນີ້ ລວມມູນ​ຄ່າ​ທັງ​ໝົດ 4.220.000 ໂດລາ​ສະຫະລັດ ຫຼື ປະມານ 33 ຕື້ກີບ ໃນ​ນີ້ ມີ​ໂຄງການ​ກໍ່ສ້າງ​ອາຄານ​ສູນ​ສຸຂະພາບ​ແມ່ ແລະ ເດັກ ມູນ​ຄ່າ 1,5 ລ້ານ​ໂດ​ລາ​ຫຼື ປະມານ 12 ຕື້​ກີບ ໂຄງການ​ກໍ່ສ້າງ​ສຸກສາລາ 26 ແຫ່ງ ຢູ່​ນະຄອນ​ຫຼວງ​ວຽງ​ຈັນ 5 ແຫ່ງ ແຂວງ​ໄຊ​ຍະ​ບູ​ລີ 2 ແຫ່ງ ບໍ່​ແກ້ວ 3 ແຫ່ງ ຫົວພັນ 4 ແຫ່ງ ຫຼວງນ້ຳ​ທາ 3 ແຫ່ງ ຫຼວງ​ພະ​ບາງ 1 ແຫ່ງ ອຸດົມ​ໄຊ 5 ແຫ່ງ ຜົ້ງ​ສາລີ 2 ແຫ່ງ ແລະ ແຂວງ​ຊຽງ​ຂວງ 1 ແຫ່ງ ມູນ​ຄ່າ 1.820.000 ໂດ​ລາ ຫຼື ປະມານ 14 ຕື້​ກີບ ແລະ ໂຄງການ​ກໍ່ສ້າງ​ຫໍ​ພັກ 4 ແຫ່ງ​ສຳລັບໂຮງຮຽນ​ສາທາລະນະ​ສຸກ ແລະ ວິທະຍາໄລ​ວິທະຍາສາດ​ສຸ​ຂະພາບ ຢູ່​ແຂວງ​ສາລະ​ວັນ ຊຽງຂວາງ ສະຫວັນ​ນະ​ເຂດ ແລະ ແຂວງ​ຈຳປາ​ສັກ ມູນ​ຄ່າ 9 ແສນໂດ​ລາ ຫຼື ປະມານ 7 ຕື້​ກີບ. 
ພາບ ແລະ ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.