Header Ads

ຜູ້ນຳ ສປປລາວ ຕ້ອນຮັບ ບັນດາທູຕານຸທູດ ອວຍພອນວັນຊາດ ທີ 2 ທັນວາ ຄົບຮອບ 42 ປີ !


ຂປລ. ວັນ​ທີ 1 ທັນວາ 2017 ນີ້, ທີ່​ທຳນຽບປະທານ​ປະ​ເທດ ບັນດາ​ຜູ້ນຳ​ເຮົາ​ນຳ​ໂດຍ ທ່ານ ບຸນ​ຍັງ ວໍລະ​ຈິດ ປະທານ​ປະ​ເທດ, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ, ທ່ານ ພັນ​ຄຳ ວິພາ​ວັນ ຮອງ​ປະທານ​ປະ​ເທດ, ທ່ານ ສະ​ເຫລີ​ມ​ໄຊ ກົມມະ​ສິດ ລັດຖະມົນຕີ ກະຊວງ​ການ​ຕ່າງປະ​ເທດ ​ໄດ້​ຕ້ອນຮັບ​ບັນດາ​ທູຕານຸທູດ ​ແລະ ຜູ້ຕາງໜ້າ​ອົງການ​ຈັດ​ຕັ້ງ​ສາກົນ ປະຈຳ​ລາວ, ພ້ອມ​ດ້ວຍ​ຄູ່​ສົມລົດ​ເຂົ້າ​ອວຍພອນ, ​​ເນື່ອງໃນ​ໂອກາດ​ວັນ​ສະຖາປະນາ ສາທາ ລະນະ​ລັດ ປະຊາທິປະ​ໄຕ ປະຊາຊົນ​ລາວ ຄົບຮອບ 42 ປີ. ​​ເຊິ່ງ ທ່ານ ຈອນ ​ໂອ​ເວນ ວິນ​ລຽມ ທູດ​ອາວຸ​ໂສ ​ໄດ້​ຕາງ​ໜ້າ​ໃຫ້​ແກ່ບັນດາ​ທູຕານຸທູດ, ຜູ້ຕາງໜ້າ​ອົງການ​ຈັດ​ຕັ້ງ​ສາກົນ ປະຈຳ​ ລາວ ສະ​ແດງ​ຄວາມ​ຊົມ​ເຊີຍ ຕໍ່​ຜົນສຳ​ເລັດ​ໃນ​ຫລາຍ​ດ້ານ ທີ່ ສປປ ລາວ ຍາດ​ມາ​ໄດ້​​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງ ສາພັດທະນາ​ປະ​ເທດ​ຊາດ ຕະຫລອດ​ໄລຍະ 42 ປີຜ່ານມາ.



​ໃນໂອກາດນີ້​, ທ່ານ​ປະທານ​ປະ​ເທດ ​ໄດ້​ສະ​ແດງ​ຄວາມປິ​ຕິ​ຍິນ​ດີ​ເປັນ​ຢ່າງ​ຍິ່ງ​ ທີ່​ໄດ້​ຕ້ອນຮັບ​ບັນ ດາ​ທູຕານຸທູດ ແລະ ຜູ້ຕາງໜ້າ​ອົງການ​ຈັດ​ຕັ້ງ​ສາກົນ ປະຈຳ​ລາວ, ພ້ອມ​ດ້ວຍ​ຄູ່​ສົມລົດ ທີ່​ໄດ້​ເຂົ້າ​ມາ​ອວຍພອນ​ໄຊ​ອັນ​ປະ​ເສີດ ດ້ວຍ​ຄວາມ​ຮັກ​ແພງສະໜິດສະໜົມ ​ແລະ ​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ​ມາ ສູ່​ພວກ​ຂ້າພະ​ເຈົ້າ ກໍ​ຄື​ ປະຊາຊົນ​ລາວ​ທັງ​ຊາດ ​ເນື່ອງ​ໃນ​ໂອກາດ​ວັນ​ສະຖາປະນາ ສາທາລະນະ​ລັດ ປະ ຊາທິປະ​ໄຕ ປະຊາຊົນ​ລາວ ຄົບຮອບ 42 ປີ ​ແລະ ວັນ​ປີ​ໃໝ່​ສາກົນ 2018 ທີ່​ຈະ​ມາ​ເຖິງນີ້.



ປີ 2017 ​ແມ່ນ​ປີ​ໜຶ່ງ​ ທີ່​ມີ​ຄວາມ​ໝາຍ​ສຳຄັນ​ໃນ​ປະຫວັດສາດ​ຂອງ​ຊາດ​ລາວ, ຕະຫລອດ​ໄລຍະ​ເກືອບ 2 ​ປີ ​ແຫ່ງ​ການຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງ ຄົມ 5 ປີ ຄັ້ງ​ທີ VIII, ຄຽງ​ຄູ່​ກັນ​ນີ້, ຍັງ​ເປັນ​ປີ​ທີ່​ມີ​ຄວາມ​ໝາຍ​ສຳຄັນ​ ຕໍ່​ກັບ​ປະຊາ​ຄົມ​ອາ​ຊຽນ ​ແລະ ສປປ ລາວ​ ​ເຊິ່ງ​ເປັນ​ປີ​ ຄົບຮອບ 50 ປີ ​ແຫ່ງ​ການ​ສ້າງ​ຕັ້ງ​ສະມາຄົມ​ບັນດາ​ປະຊາ​ຊາດ ອາຊີ​ຕາ​ເວັນ​ອອກ​ສ່ຽງ​ໃຕ້ ຫລື ອາ​ຊຽນ ​ແລະ ​ເປັນ​ປີ​ ຄົບຮອບ 20 ປີ ທີ່ ສປປ ລາວ ​ເຂົ້າ​ເປັນ​ສະມາຊິກ​ອາ​ຊຽນ.

ທ່ານ​ປະທານ​ປະ​ເທດ​​ໄດ້ຖື​ໂອກາດ​ນີ້, ຕາງໜ້າ​ພັກ-ລັດຖະບານ ​ແລະ ປະຊາຊົນ​ລາວ​ທັງ​ຊາດ ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ​ແລະ ຄວາມ​ຮູ້​ບຸນຄຸນ​ຢ່າງ​ເລິກ​ເຊິ່ງ ຕໍ່​ບັນດາ​ປະ​ເທດ​ເພື່ອ​ມິດ ​ແລະ ອົງການ​ຈັດ​ຕັ້ງ​ສາກົນ​ຕ່າງໆ ​ທີ່​ໄດ້​ໃຫ້ການ​ສະໜັບສະໜູນ ​ແລະ ຊ່ວຍ​ເຫລືອສປປ ລາວ ​ໃນ​ການ​ປະຕິບັດ​ພາລະກິດ​ສ້າງສາ​ພັດທະນາ​ປະ​ເທດ​ຊາດ ​ໃນ​ຕະຫລອດ​ໄລຍະ​ທີ່​ຜ່ານ​ມາ.

ທ່ານ​ປະທານ​ປະ​ເທດ​ ກ່າວ​ຕື່ມວ່າ: ສປປ ລາວ ຍາມ​ໃດ​ກໍ​ຖື​ເອົາ​ການ​ສົ່ງ​ເສີມ​ການທ່ອງທ່ຽວ ​ເປັນ​ຂະ​ແໜງ​ການ​ເສດຖະກິດ​ປາຍ​ແຫລມ​ໜຶ່ງ​ທີ່​ສຳຄັນ ​ເພື່ອ​ປະກອບສ່ວນ​ພັດທະນາ​ເສດຖະກິດ-ສັງຄົມ​ ຂອງ​ປະ​ເທດ ​ເພື່ອ​ເປັນ​ການ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງປະ​ເທດ​ ເຂົ້າ​ມາ​ທ່ອງ​ທ່ຽວ ​ແລະ ມາ​ຢ້ຽມຢາມ ສປປ ລາວ ຫລາຍ​ຂຶ້ນ. ​ໃນ​ໂອກາດ​ເປີດ​ປີທ່ອງ​ທ່ຽວ​ລາວ 2018 ນີ້, ທ່ານ​ໄດ້​ເຊີນຊວນ​ບັນດາ​ທູຕານຸທູດ, ອົງການ​ຈັດ​ຕັ້ງ​ສາກົນ​ປະຈຳ​ລາວ, ພ້ອມ​ດ້ວຍ​ຍາດຕິ​ພີ່ນ້ອງ ​ແລະ ໝູ່​ເພື່ອນ​ທັງຫລາຍ ​ເດີນທາງ​ມາ​ທ່ອງ​ທ່ຽວ​ລາວ ​ເພື່ອ​ໄດ້​ມີ​ໂອກາດ​ມາ​ສຳຜັດ​ກັບ​ບັນຍາກາດ, ​ເອກະລັກ​ວັດທະນະທຳ ຮີດຄອງ​ປະ​ເພນີ​ອັນ​ຕີ​ງາມ ​ແລະ ທິວ​ທັດ​ທຳ​ມະ​ຊາດ​ອັນ​ສວຍ​ສົດ​ງົດ​ງາມ ຂອງ ສປປ ລາວ​.



ຂ່າວ: ຈັນທະ​ລອນ; ພາບ: ອ່າຍຄຳ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.