Header Ads

ເມືອງຊະນະຄາມ ແຂວງວຽງຈັນ ປະກາດເປັນເມືອງຈົບຊັ້ນມັດທະຍົມຕອນຕົ້ນບໍາລຸງ



ໃນວັນທີ 22 ທັນວາ 2017 ນີ້, ຢູ່ທີ່ສະໂມສອນໃຫຍ່ຫ້ອງວ່າການປົກຄອງເມືອງຊະນະຄາມ ແຂວງວຽງຈັນໄດ້ຈັດພິທີປະກາດຈົບຊັ້ນມັດທະຍົມຕອນຕົ້ນບໍາລຸງທົ່ວເມືອງຂຶ້ນຢ່າງເປັນທາງການ ໂດຍພາຍໃຕ້ການເປັນປະທານຮ່ວມຂອງ ທ່ານ ນາງ ຈັນແພງວິພາວັນ ຄະນະປະຈຳພັກແຂວງ, ຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ, ມີທ່ານ ກ້າ ສະເຫຼີມສຸກ ຫົວໜ້າກົມການສຶກສານອກໂຮງຮຽນ, ກະຊວງສຶກສາທິການ ແລະ ກິລາ, ທ່ານ ສະໝານ ວິເສດຍະພົງສ໌ ເລຂາພັກເມືອງ, ເຈົ້າເມືອງໆຊະນະຄາມ, ເຂົ້າຮ່ວມຄັ້ງນີ້ມີບັນດາຫົວໜ້າ,ຮອງຫົວໜ້າພະແນກຂອງແຂວງ, ຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະກິລາ 11 ຕົວເມືອງຂອງແຂວງ, ພ້ອມດ້ວຍພະນັກງານ ແລະ ປະຊາຊົນພາຍໃນເມືອງຊະນະຄາມເຂົ້າຮ່ວມ.



ທ່ານ ສະໝານ ວິເສດຍະພົງສ໌ ເລຂາພັກເມືອງ, ເຈົ້າເມືອງໆຊະນະຄາມ ກ່າວວ່າ: ເມືອງຊະນະຄາມຕັ້ງຢູ່ຫ່າງຈາກເທສະບານແຂວງ ປະມານ 206 ກິໂລແມັດ, ມີພົນລະເມືອງທັງໝົດ 41.332 ຄົນ, ຍິງ 20.848 ຄົນ, ປະກອບມີ 34 ບ້ານ, ແບ່ງເປັນ 4 ກຸ່ມບ້ານ ແລະ 9 ບ້ານຂຶ້ນກັບເມືອງ, ດ້ານເສດຖະກິດໄດ້ມີການຂະ ຫຍາຍຕົວຢ່າງຕໍ່ເນື່ອງ ສະເລ່ຍ7.77%ຕໍ່ປີ ສະເລ່ຍລາຍຮັບຕໍ່ຫົວຄົນ 15ລ້ານກວ່າກີບ ຕໍ່ຄົນຕໍ່ປີ, ທຸກຄອບ ຄົວ ມີໄຟຟ້າໄດ້ 100%, ອັດຕາການຮຽນຮູ້ຫນັງສືຂອງປະຊາກອນ 15 ປີ ຂຶ້ນໄປ ບັນລຸໄດ້ 93.85%.

ທ່ານ ຈັບ ຊະນະເລີດ ຫົວໜ້າຫ້ອງການສຶກສາທິການ ແລະ ກິລາ ເມືອງຊະນະຄາມ ໃຫ້ຮູ້ວ່າ:ນັບແຕ່ປີ2003-2016 ເມືອງຊະນະຄາມ ມີນັກຮຽນຊັ້ນມັດທະຍົມຕົ້ນບຳລຸງທັງໝົດ 683 ຄົນ; ຍິງ 406 ຄົນ. ໃນນີ້ສຳເລັດການບໍາລຸງ ໄດ້ຈຳນວນ 641 ຄົນ; ຍິງ 394 ຄົນ, ເທົ່າກັບ 93,85% ຂອງປະຊາກອນໃນເກນອາຍຸ 15-30 ປີ. ເຊິ່ງຜົນການປະເມີນທັງໝົດໄດ້ດັ່ງນີ້: ບ້ານຄົກເຂົ້າດໍ 95,55%,ບ້ານຫ້ວຍເຕົ່າ100%, ບ້ານໃໝ່ 100%, ບ້ານດອນພຸງ 100%, ບ້ານປາກພາງ 87,50%, ບ້ານນາພຽງ, ນາປາຝາ, ບົວຈະເລີນ 94,28%, ບ້ານນາເດື່ອ, ບ້ານຫ້ວຍຕາວ 97,29%, ບ້ານຊະນະຄາມ, ສີພູມ, ປາກມີ້, ຕາກແດດ 92,30%, ບ້ານນາສັກ, ໂນນສະຫວັນ, ດົງຂ່າ 95,12%, ບ້ານນໍ້າກວນ 89,65%, ບ້ານນາດີ, ນາມອຍ 94,73%, ບ້ານໂພນງາມ, ບ້ານນາກາງ 90,90%, ບ້ານແສນຈະເລີນ 100% ແລະ ບ້ານໂນນນາແກບ 100%, ຜູ້ເຂົ້າຮ່ວມການປະເມີນ ລວມທັງໝົດ 486 ຄົນ, ຍິງ 296 ຄົນ, ປະເມີນໄດ້ 462 ຄົນ, ຍິງ 283 ຄົນ ເທົ່າກັບ 95,06%. ດັ່ງນັ້ນ, ອີງຕາມການປະເມີນຜົນຈົບຊັ້ນມັດທະຍົມຕອນຕົ້ນບຳລຸງທົ່ວເມືອງຊະນະຄາມທີ່ກະຊວງສຶກສາທິການ ແລະ ກິລາ ໄດ້ກຳນົດໄວ້, ເມືອງຊະນະຄາມ ແມ່ນມີເງື່ອນໄຂຄົບຖ້ວນໃນການປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງ. ທັງນີ້ກໍ່ຍ້ອນຄວາມເອົາໃຈໃສ່ ແລະ ຮັບຜິດຊອບສູງຂອງຄະນະ ພັກ,ອົງການປົກຄອງ, ຄະ ນະພັດທະນາການສຶກສາແຕ່ລະຂັ້ນ, ຕະຫຼອດຮອດພະນັກງານໜ່ວຍງານການສຶກ ສານອກໂຮງຮຽນ, ຄູສອນທຸກທ່ານ, ຕະຫຼອດຮອດອຳນາດການປົກຄອງຂັ້ນບ້ານໄດ້ຕັ້ງໜ້າປຸລະດົມຂົນຂວາຍພໍ່ແມ່ປະຊາຊົນໃນເກນອາຍຸ 15-30 ປີ ໃນແຕ່ລະບ້ານໃຫ້ເຂົາເຈົ້າມາຮຽນຢ່າງທົ່ວເຖິງ. ສະນັ້ນ, ຈິ່ງເຮັດໃຫ້ການຈັດຕັ້ງການຮຽນ-ການສອນມັດທະຍົມຕອນຕົ້ນບຳລຸງໃນຄັ້ງນີ້ປະສົບຜົນສຳເລັດຕາມລະດັບຄາດໝາຍ.
 
ໃນໂອກາດນີ້ ທ່ານ ນາງ ຈັນແພງ ວິພາວັນ ຄະນະປະຈຳພັກແຂວງ, ຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ ຍັງໄດ້ໃຫ້ກຽດຂຶ້ນມອບໃບຢັ້ງຢືນເມືອງຊະນະຄາມສຳເລັດການສຶກສາຊັ້ນມໍຕົ້ນບໍາລຸງ ແລະ ຂຶ້ນຮັບໂດຍ ທ່ານ ສະໝານ ວິເສດຍະພົງສ໌ ເລຂາພັກເມືອງ, ເຈົ້າເມືອງໆຊະນະຄາມ. ໃນຕອນທ້າຍຍັງໄດ້ມີພິທີລັ່ນຄ້ອງ, ເປີດປ້າຍ ແລະ ປ່ອຍປຸມເປົ້າເພື່ອເປັນສິຣິມຸງຄຸນແກ່ງານດັ່ງກ່າວອີກດ້ວຍ.
 

ຮູບ-ຂ່າວ: ແກ້ວອຸດົມ

 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.